ជនជាតិបរទេសពីរនាក់ ត្រូវបានគេស្គាល់ថា ជាជនជាតិអាមេរិកាំង ត្រូវបានក្រុមចោរឆក់ពីរនាក់ ធ្វើ​សកម្មភាព ឆក់យកទូរស័ព្ទដៃមួយគ្រឿង បានសម្រេច នៅពេលដែលជន រងគ្រោះទាំងពីរ កំពុងជិះម៉ូតូតាមផ្លូវ កាលពី​វេលា​ម៉ោង១១ និង៤០នាទីយប់ថ្ងៃទី ០៨ ខែមិថុនា ឆ្នាំ២០១៥ នៅតាមបណ្តោយផ្លូវ ព្រះសីហនុរាជ ត្រង់ចំណុច​ទល់​មុខ វត្តមហាមន្ត្រី ស្ថិតក្នុងសង្កាត់វាលវង្ស ខណ្ឌ៧មករា រាជធានីភ្នំពេញ។

សាក្សីដែលបានឃើញ ហេតុការណ៍នេះ ប្រាប់ឲ្យដឹងថា នៅមុនពេលកើតហេតុ គេឃើញជនបររទេសពីនាក់ ម្នាក់ប្រុស ម្នាក់ស្រី មិនស្គាល់ឈ្មោះ បានជិះម៉ូតូពីកើតទៅលិច ដោយអ្នកនៅខាងក្រោយ កំពុងចុចទូរស័ព្ទ។ ស្រាប់តែមកដល់កន្លែងកើតហេតុ មានបុរសពីរនាក់ជិះម៉ូតូ តាមពីក្រោយ ជនរងគ្រោះទាំងពីរ ពេលមកដល់ជិត បានអែប ហើយធ្វើសកម្មភាពឆក់ យកទូរស័ព្ទដៃនោះតែម្តង។

អ្នកនៅកន្លែងកើតហេតុ បានបន្តថា ពេលភ្លាមៗ ជនរងគ្រោះបានជិះម៉ូតូ ចេញតាមចោរនោះដែរ តែមិនទាន់ ព្រោះក្រុមចោរបើកម៉ូតូដូចហោះ សូម្បីតែម៉ាកអី ក៏មើលសឹងមិនទាន់ផង។ បន្ទាប់ពីរចោរឆក់ យកទូរស័ព្ទបាន​សម្រេច អ្នកទាំងពីរបាននៅឈរជាយផ្លូវ ដើម្បីហៅអ្នកដំណើរ ឲ្យជួយខ្លួនយកទូរស័ព្ទម៉ាក ASUS Phone 6 នោះ​មកវិញ។ តែទោះជាយ៉ាងណា ក៏តាមមិនទាន់ដែរ ហើយបុរសម្នាក់ បាននាំអ្នកទាំងពីរ ទៅដាក់ពាក្យប្តឹង នៅ​ប៉ុស្តិ៍​នគរបាលវាលវង្ស ឲ្យជួយដោះស្រាយ និងតាមចាប់ចោរ។

តែជនរងគ្រោះទាំងពីនាក់ ហាក់មិនបានយល់នោះទេ នៅតែប្រកែក នៅពេលទៅដល់ប៉ុស្តិ៍ថា ខ្លួនមិនចង់ប្តឹងទេ ខ្លួនគ្រាន់តែចង់បាន ទូរស័ព្ទមកវិញ តែប៉ុណ្ណោះ។ បន្ទាប់ពីនោះ មន្ត្រីប៉ូលិសម្នាក់ បានជូនអ្នកទាំងពីរ ឲ្យត្រឡប់​មកផ្ទះវិញ នៅតាមផ្លូវ ១១៥ សង្កាត់ទូលទំពូង ខណ្ឌចំការមន រាជធានីភ្នំពេញ៕