បើស្រវឹង កុំបើកបរ ហើយបើបើកបរ កុំផឹកឲ្យស្រវឹង។ ការបើកបរទាំងស្រវឹង ជាទង្វើល្មើសច្បាប់ ហើយការ​បើក​បរទៅបុក ថ្មខណ្ឌចែកទ្រូងផ្លូវ ក៏ជាទង្វើ«បំផ្លាញទ្រព្យសម្បត្តិសាធារណៈដែរ»។ ប៉ុន្តែសួរថា តើអង្កាល់ទៅ ទើប​ច្បាប់អាចត្រូវគេអនុវត្តន៍ ទៅលើអ្នកបើកបរ ទាំងស្រវឹងទាំងនេះ?

នេះជាករណី បើកបរទាំងស្រវឹង មើលឃើញថ្មពុះចែកថ្នល់ ថាជាផ្លូវ បើកទៅបុក លុះត្រារបើកខ្ចាត់ខ្ចាយអស់។ សំណាងល្អ ដែលបានបើកឡាន ឡើងទ្រូងផ្លូវ ខ្ទេចទ្រូងផ្លូវ ឡានរងការខូចខាតខ្លះ តែម្ចាស់អ្នកបើកបរ នៅមាន​សុវត្តិភាពធម្មតា។ ហើយបុរសអ្នកបើកឡាន ដែលគេបានឃើញ បើកឡើងបុកទ្រូងផ្លូវនោះ ឈ្មោះ ឈ្មោះ អ៊ុន ចន្ថា បច្ចុប្បន្ន ជាអ្នកធ្វើការ នៅក្នុងក្រសួងពាណិជ្ជកម្ម។

សាក្សីដែលបានឃើញហេតុការណ៍នេះ បានប្រាប់ឲ្យដឹងថា ករណីគ្រោះថ្នាក់ចររាចរណ៍ បើកឡានបុកទ្រូង​ផ្លូវ​ពេញទំហឹងនេះ បានកើតឡើង កាលពីវេលាម៉ោង ១២ និង៣០ នាទីយប់ថ្ងៃទ០៧ ឈានចូលថ្ងៃទី០៨ ខែ​មិថុនា ឆ្នាំ២០១៥ នៅត្រង់ចំណុច ជិតស្ពានអាកាសពេទ្យលោកសង្ឃ តាមបណ្តោយផ្លូវ ២៧១ ក្នុងសង្កាត់ទឹកថ្លា ខណ្ឌ​សែនសុខ រាជធានីភ្នំពេញ។

ឡានដែលបើកបុកដុំថ្ម ធុន កាម៉ារី ពាក់ស្លាកលេខ ភ្នំពេញ ២Y-១៥៣៦ រងកាខូចខាតមួយចំនួន ចំណែក​អ្នក​បើក​បរ មិនមានរងបួសនោះទេ។

បន្ទាប់ពីទទួលបានអត្តសញ្ញាណអ្នកបើកបរ និងការពិនិត្យ របស់នគរបាលចររាចរណ៍ នៅកន្លែងកើតហេតុ​រួច​រាល់ ឃើញថា គ្មានបង្កការប៉ះពាល់ ទៅដល់អ្នកធ្វើដំណើរ នៅជិតនោះទេ។ នគរបាលបានធ្វើកំណត់ហេតុ រួច​បានប្រាប់អ្នកសារព័ត៌មានថា នៅក្នុងខ្លូនអ្នកបើកបរ មានជាតិស្រវឹងយ៉ាងជោគជាំ ទើបបានជាបើកឡាន ជ្រុល​ចង្កូតទៅបុកទ្រូងផ្លូវបែបនេះ។ អ្នកធ្វើចររាចរណ៍ផ្សេងទៀត នៅកន្លែងកើតហេតុបាននិយាយថា នេះជា​សំណាង​ទីមួយហើយ បើប្រៀបធៀប ទៅក្នុងចំណោមមួយរយគ្រោះថ្នាក់ ដែលមិនមានបញ្ហាធ្ងន់ធ្ងរ ដល់ជីវិត​អ្នក​បើក​បរ៕