ក្រុមបាល់ទាត់ បាសឺឡូន របស់ប្រទេសអេស្ប៉ាញ បានទទួលជ័យជំនះ យកពានជាជើងឯងអ៊ឺរ៉ុប ឆ្នាំ២០១៥ (Champions League) បន្ទាប់ពីក្រុមដែលសម្បូរ ទៅដោយកីឡាករល្បីៗមួយនេះ បានទាត់ផ្ដួល​ក្រុម​បាល់ទាត់ ជូវេនទូស របស់ប្រទេសអ៊ីតាលី នៅវគ្គផ្ដាច់ព្រ័ត្រ កាលពីយប់ទី៦ ខែមិថុនា ឆ្នាំ២០១៥ ក្នុង​ពហុ​កីឡាដ្ឋាន​អូឡាំពិក នៃរដ្ឋធានី​ប៊ែរឡាំង ប្រទេសអាល្លឺម៉ង់។

ក្រុម បាសឺឡូន បានបង្កភាពលំបាក ឲ្យក្រុម ជូវេនទូស តាំងពីនាទីទី៤ ដោយកីឡាករជាតិក្រូអាត អ៊ីវ៉ាន រ៉ាគីទីគ (Ivan Rakitic) បានរកបានគ្រាប់បាល់ដំបូងគេ ឲ្យក្រុម បាសឺឡូន របស់ខ្លួន។ គ្រាប់បាល់នេះ បាន​ក្លាយ​ជាគ្រាប់បាល់ដែលលឿនជាងគេ នៅក្នុងប្រវត្តិនៃការប្រកួត ក្នុងវគ្គផ្ដាច់ព្រ័ត្រ របស់ក្រុមបាសឺឡូន។

រី​ឯក្រុម ជូវេនទូស ដែលបានបញ្ចប់ពាក់កណ្ដាលម៉ោងដំបូង ដោយគ្មានធ្វើអ្វីក្រុម បាសឺឡូន សូម្បីបន្តិចនោះ បានរកឃើញ ក្ដីសង្ឃឹមរបស់ខ្លួនមកវិញ ដោយសារកីឡាករ អាលវ៉ារូ ម៉ូរ៉ាតា (Alvaro Morata) របស់ខ្លួន បាន​រកគ្រាប់បាល់ បានពិន្ទុស្មើរ ១-១ មកវិញ នៅនាទីទី៥៥។

ប៉ុន្តែចលនាបាល់ និងបច្ចេកទេសលេងបាល់ របស់ក្រុមបាសឺឡូន រួមផ្សំនឹងកីឡាករល្បីៗរបស់ខ្លួននោះ មិនអាច​ធ្វើឲ្យគេជឿ សូម្បីតែមួយវិនាទីថា ក្រុមបាសឺឡូន នឹងត្រូវលុតជង្គង់ នៅចំពោះក្រុមបាល់ទាត់ ណាមួយ​ផ្សេង​ឡើយ នៅក្នុងពេលបច្ចុប្បន្ន។ នៅនាទីទី ៦៨ កីឡាករ ល្វីស ស្វារ៉េស (Luis Suarez) បានរកមួយគ្រាប់​បន្ថែម ឲ្យ​ក្រុមបាសឺឡូន ធ្វើឲ្យពិន្ទុរបស់ក្រុម មកពីប្រទេសអេស្ប៉ាញ នាំមុខជាថ្មីទៀត លើក្រុម ជូវេនទូស ២-១។

ការឈ្នះដោយពិន្ទុខាងលើនេះ បានធ្វើឲ្យក្រុមបាល់ទាត់ មកពីប្រទេសអ៊ីតាលី ពិបាកនឹងរត់តាមពីក្រោយ រហូត​ដល់នាទីបន្ថែមម៉ោង ៩០+៧ ចុងបញ្ចប់ កីឡាករ ណីម៉ា (Neymar) បានសម្រេចក្ដីចុងក្រោយ ឲ្យក្រុម​បាសឺឡូន ដោយរកគ្រាប់បាល់បានមួយគ្រាប់ទៀត សម្រាប់ពិន្ទុ ៣-១។

ជ័យជំនះនៅឆ្នាំ២០១៥នេះ បានធ្វើឲ្យក្រុម បាសឺឡូន ទទួលបានពានជើងឯងអ៊ឺរ៉ុប ជាលើកទី៥ បន្ទាប់ពី​ទទួល​បាន​៤ដង រួចហើយ ក្នុងឆ្នាំ១៩៩២ ២០០៦ ២០០៩ និងឆ្នាំ២០១១៕