នាយកខុទ្ទកាល័យប្រធានាធិបតី នៃប្រទេសកូរ៉េខាងត្បូង លោក «Im Jong-seok» បានប្រកាសនៅថ្ងៃព្រហស្បត្តិ៍នេះថា លោកប្រធានាធិបតី មូន ចេ-អ៊ីន (Moon Jae-in) នឹងទទួលជួបសមភាគីរបស់លោក ជាលក្ខណៈនិមិត្តរូប នៅលើផ្នែកម្ខាង នៃខ្សែបន្ទាត់ខណ្ឌចែក រវាងប្រទេសកូរ៉េខាទាំងពីរ ដែលជាតំបន់គ្មានយោធា។

«ផ្នែកម្ខាង»នេះ ស្ថិតក្នុងទឹកដី នៃប្រទេសកូរ៉េខាងត្បូង។ បើសិនជាលោក គីម ជុង-អ៊ុន (Kim Jong-un) អគ្គមគ្គុទេសក៍ នៃប្រទេសកូរ៉េខាងជើង បានឈានជំហាន ឆ្លងកាត់ខ្សែបន្ទាត់នេះ លោកនឹងក្លាយ​ជា​មេដឹកនាំ​កូរ៉េ​កុម្មុយនីស្ដិ៍​លើក​ដំបូង​បង្អស់ ដែលបានជាន់ដីកូរ៉េខាងត្បូង រាប់ចាប់តាំងពីសង្គ្រាមកូរ៉េ ដែលបានបញ្ចប់ទៅ ដោយកិច្ចព្រមព្រៀងឈប់បាញ់មួយ កាលពី៦៥ឆ្នាំមុន។

នៅក្នុងគម្រោងជំនួប រវាងមេដឹកនាំទាំងពីរ លោក គីម នឹងធ្វើការត្រួតពល ដែលជាពិធីការកិត្តិយស សម្រាប់ទទួលមេដឹកនាំបរទេស ហើយបន្ទាប់មក លោក​ទាំងពីរ នឹងដើរដោយថ្មើរជើង ទៅកាន់វិមានសន្តិភាព ដែលសង់ឡើងដោយថ្មបេតុង និងកញ្ចក់ ស្ថិតនៅក្បែរក្រុង «Panmunjom» ទីក្រុង​ដែលភាគីកូរ៉េ​ទាំងសងខាង បានចុះហត្ថលេខា ព្រមព្រៀងឈប់បាញ់ នៅឆ្នាំ១៩៥៣។

លោក «Im Jong-seok» បានបន្តទៀតថា មេដឹកនាំកូរ៉េខាងជើង នឹងចុះហត្ថលេខា នៅលើសៀវភៅក្រាំងមាសមួយ ហើយបន្ទាប់មក គណៈប្រតិភូនៃប្រទេសទាំងពីរ នឹងទទួលទានអាហារថ្ងៃត្រង់ នៅតាមការរៀបចំ ដោយរៀងៗខ្លួន (គណៈប្រតិភូកូរ៉េខាងជើង នឹងដើរត្រឡប់ចូលក្នុងទឹកដីខ្លួនវិញ ដើម្បីទៅបរិភោគលៀងអាហារ របស់ផងខ្លួន នៅទីនោះ)។

សម្រាប់របៀបវារៈ ក្នុងពេលរសៀល លោក គីម និងលោក មូន នឹងដាំដើមឈើមួយដើម នៅលើខ្សែព្រំដែន​ជានិមិត្តរូបមួយ ក្នុងវិមានសន្តិភាព។ សេចក្ដីថ្លែងការណ៍រួមមួយ នឹងត្រូវចេញផ្សាយឲ្យដឹង បន្ទាប់ពីការចុះហត្ថលេខា រវាងមេដឹកនាំទាំងពីរ។ នៅនាទីចុងក្រោយ ជំនួបកំពូលនឹងត្រូវបិតបញ្ចប់ ដោយពិធីជប់លៀងតូចមួយ និងពិធីលាគ្នា មុននឹងគណៈប្រតិភូ នៃប្រទេសកូរ៉េខាងជើង ចាកចេញទៅកាន់ទឹកដីរបស់ខ្លួនវិញ។

សមាសភាព នៃគណៈប្រតិភូកូរ៉េខាងជើង នឹងមានវត្តមានចូលរួម របស់លោក គីម យ៉ុង-ណាម (Kim Yong-nam) ប្រមុខរដ្ឋកូរ៉េខាងជើង និងជាពិសេស វត្តមានរបស់អ្នកស្រី គីម យ៉ូ-ចុង (Kim Yo-jong) ប្អូនស្រីរបស់លោក គីម ជុង-អ៊ុន។ អ្នកស្រី គីម បានត្រួសត្រាយផ្លូវជាមុនរួចហើយ តាំងពីប៉ុន្មានខែកន្លងមក ក្នុងព្រឹត្តិការណ៍កីឡាអូឡាំពិកសិសិររដូវ  មុននឹងឈាន មកដល់​ជំនួបកំពូលមួយនេះ៕