«យើងចង់ឃើញសារព័ត៌មាន ទូរទស្សន៍ ឲ្យបានច្រើនថែមទៀត ក្នុងការចូលរួម ដើម្បីផ្សព្វផ្សាយ ទាំងរបាយការណ៍ និង​កម្មវិធី ដែលយើងបានធ្វើកន្លងមក (ពាក់ព័ន្ធអំពើពុករលួយ)។ (...) កន្លងមក យើងឃើញច្រើន ការផ្សាយព័ត៌មាន តាម​វ៉េបសាយ និងវិទ្យុ តែមិនសូវឃើញព័ត៌មាន ផ្សាយតាមទូរទស្សន៍ទេ។ យើងចង់ឃើញ មានការចូលរួមពីពួកគាត់ ឲ្យ​បាន​ច្រើន។» នេះជាការលើកឡើងរបស់លោក ព្រាប កុល នាយកប្រតិបត្តិអង្គការតម្លាភាពកម្ពុជា ដែលមានជំនាញ ខាងការ​ឃ្លាំមើល អំពើពុករលួយក្នុងប្រទេសកម្ពុជា។

ក្នុងកិច្ចសម្ភាសជាមួយអ្នកសារព័ត៌មាន និងទូរទស្សន៍នាពេលកន្លងមកនេះ លោក ព្រាប កុល បានទទួលស្គាល់ថា អ្នក​សារព័ត៌មានជាតួអង្គយ៉ាងសំខាន់ ក្នុងការបំពងសំលេង ក៏ដូចជាការអប់រំ ឬការបំផុសឲ្យមានការពិភាក្សា និងស្វែង​ទៅ​រក​ដំណោះស្រាយ ទៅលើបញ្ហា ទប់ស្កាត់«អំពើពុករលួយ»ជាដើម។ លោកថា តាមរយៈនេះ អ្នកសារព័ត៌មាន គ្រប់ស្ថាប័ន​ផ្សព្វផ្សាយ រាប់ទាំងទូរទស្សន៍ផង ជាការលើកកំពស់ ការអប់រំទាក់ទងនឹងតម្លាភាព សុច្ចរិតភាពក្នុងសង្គមកម្ពុជា តាម​រយៈ​ការ​ផ្សាយ​ព័ត៌មាន ពាក់ព័ន្ធនឹងអំពើពុករលួយនេះ។

តេលោកបានបង្ហាញ ការសោកស្តាយ ដែលភាគច្រើននៃបណ្តាទូរទស្សន៍របស់កម្ពុជា មិនសូវយកចិត្តទុកដាក់ ឬចាប់​អារម្មណ៍ លើការផ្សព្វផ្សាយ ពីបញ្ហានៃអំពើពុករលួយនេះ ដែលផ្ទុយពីបណ្តាប្រទេសជឿនលឿន និងប្រទេស​ប្រជា​ធិបតេយ្យ ដែលបណ្តាញសារព័ត៌មានរបស់គេ ពិសេសទូរទស្សន៍ មានការយកចិត្តទុកដាក់ជាខ្លាំង ទៅលើរឿង ដែល​ពាក់​ព័ន្ធ នឹងការ«ប្រឆាំងអំពើពុករលួយ»។

នាយកប្រតិបត្តិអង្គការតម្លាភាពកម្ពុជា បានបញ្ជាក់ថា៖ «ប្រទេសដែលមានលិទ្ធិប្រជាធិបតេយ្យ គាត់យកចិត្តទុកដាក់ ទៅ​លើប្រធានបទ នៃអំពើពុករលួយនេះណាស់។ រាល់កម្មវិធីធំៗ (ពាក់ព័ន្ធអំពើពុករលួយ) មានការចូលរួមច្រើន ពិសេស​ទូរទស្សន៍ ដែលគាត់ចូលរួម ដើម្បីផ្សព្វផ្សាយព័ត៌មាន។ នៅប្រទេសយើង សង្កេតឃើញទូរទស្សន៍ដែលមានឥទ្ធិពល ទូរទស្សន៍​ធំៗ នៅកម្ពុជាយើងភាគច្រើន មិនទាន់បានយកចិត្តទុកដាក់ ទៅលើបញ្ហាអំពើពុករលួយនេះទេ។ គាត់ច្រើន​តែ​គេច ពីកម្មវិធីណា ដែលទាក់ទងនឹងអំពើពុករលួយ។ (...) មិនសូវធ្វើបទសម្ភាស មិនសូវចាក់ផ្សាយ នូវការពិភាក្សា ដែល​ទាក់​ទង​នឹងប្រធានបទ (អំពើពុករលួយ) នេះ នៅឡើយដែរ។»

យ៉ាងណា លោកបានទទួលស្គាល់ថា នាពេលកន្លងមក គ្រប់អ្នកសារព័ត៌មានទាំងអស់ មានកិច្ចសហការគ្នាល្អ ជាមួយ​អង្គការលោក ក្នុងការចូលរួម ដើម្បីទប់ស្កាត់ និងកាត់បន្ថយ អំពើពុករលួយ តាមរយៈការផ្សព្វផ្សាយ នូវព័ត៌មាន​នានា ដែល​ទាក់ទងនឹងអំពើពុករលួយនេះ។ លោកបន្តថា ទាក់ទងនឹងអំពើពុករលួយនេះ អង្គការលោក ក៏មាន​កិច្ច​សហការ ជា​មួយ​អង្គភាពប្រឆាំងអំពើពុករលួយ ក្នុងការអប់រំ និងផ្សព្វផ្សាយលើប្រធានបទ នៃអំពើពុករលួយនេះ ជាបន្តបន្ទាប់។

លោក ព្រាប កុល បានដាក់ក្តីសង្ឃឹម ទៅថ្ងៃខាងមុខថា បណ្តាទូរទស្សន៍ទាំងអស់ ពិសេសទូរទស្សន៍ធំៗ ពួកគាត់នឹង​បន្ថែម​នូវកម្មវិធីនេះ។ ហើយក្រុមការងារលោក នឹងលើកទឹកចិត្ត ឲ្យពួកគាត់ចូលរួម នូវរាល់កម្មវិធីណាសំខាន់ៗ ការ​ផ្សព្វ​ផ្សាយ​របាយការណ៍ ឬកម្មវិធីដែលនិយាយពីប្រធានបទ នៃបញ្ហាអំពើពុករលួយនេះ ឲ្យបានច្រើនថែមទៀត។

» សូមទស្សនាកិច្ចសម្ភាសជាមួយលោក ព្រាប កុល ដូចខាងក្រោម៖