ជុន ចាន់បុត្រ៖ ចង់​បាន​ព័ត៌មាន អ្នក​សារព័ត៌មាន​ត្រូវ​ធ្វើ​មុខ​ក្រាស

តើធ្វើដូចម្ដេច ដើម្បីឲ្យអ្នកសារព័ត៌មានអាជីព មួយចំនួន អាចទទួលបានព័ត៌មាន«ពិត» យកមកផ្សាយ ខណៈ​មន្ត្រី​សារធារណៈ​ជា​ច្រើន នៅកម្ពុជា តែងរឹតត្បិតព័ត៌មាន មិនចង់និយាយ ជាមួយអ្នកសារព័ត៌មាននោះ? លោក ជុន ចាន់បុត្រ បានបង្ហើប​ពី​ករណី​ពីរ​យ៉ាង ដែល​អ្នក​សារព័ត៌មាន របស់ស្ថាប័នវិទ្យុអាស៊ីសេរី តែងបានធ្វើ។
ជុន ចាន់បុត្រ៖ ចង់​បាន​ព័ត៌មាន អ្នក​សារព័ត៌មាន​ត្រូវ​ធ្វើ​មុខ​ក្រាស
អ្នកនៅកណ្ដាល៖ លោក ជុន ចាន់បុត្រ អនុប្រធាន ផ្នែកការផ្សាយជាភាសាខ្មែរ របស់វិទ្យុអាស៊ីសេរី។ (រូបថត monoROOM.info/ S. Tith)
Loading...
  • ដោយ: អ៊ុម វ៉ារី ([email protected]) - យកការណ៍៖ស្រ៊ុន ទិត្យ -ភ្នំពេញថ្ងៃទី២៥ ឧសភា ២០១៥
  • កែប្រែចុងក្រោយ: May 27, 2015
  • ប្រធានបទ: សារព័ត៌មាន
  • អត្ថបទ: មានបញ្ហា?
  • មតិ-យោបល់

នៅចំពោះភាពលំបាក របស់អ្នកសារព័ត៌មាន ខណៈមន្រ្តីសាធារណៈជាច្រើន ក្នុងប្រទេសកម្ពុជា បានរំលោភ «សិទ្ធិ​(អ្នក​សារព័ត៌មាន)» តាមការមិនផ្តល់ព័ត៌មាននោះ លោក ជុន ចាន់បុត្រ អនុប្រធានផ្នែកការផ្សាយ ជាភាសាខ្មែរ របស់វិទ្យុអាស៊ី​សេរី បានថ្លែងបង្ហើបថា មានករណីពីរយ៉ាង ដែលអ្នកសារព័ត៌មានត្រូវធ្វើ។ នោះ គឺទីមួយ អ្នកសារព័ត៌មានត្រូវចុះ​យក​ព័ត៌មាន ជា«ក្រុម» និងទីពីរ អ្នកសារព័ត៌មានត្រូវធ្វើខ្លួន ជាមនុស្ស«មុខក្រាស់»។

ថ្លែងក្នុងវេទិកាយុវជន ស្តីពី «ការយល់ដឹងពីសកលលោក និងការអភិវឌ្ឍខ្លួនឯង ជាពលរដ្ឋសកម្ម» នៅមហោស្រប​ចេនឡា រាជធានីភ្នំពេញ ដោយមានយុវជនចូលរួម ប្រមាណ៧០០នាក់ អ្នកសារព័ត៌មាន ដែលសំបូរវោហារសាស្រ្ត និង​ពូកែ​សួរ​ដេញដោល តាមទាន់ជាន់កែង លោក ជុន ចាន់បុត្រ បានសង្កត់ធ្ងន់ថា ករណីទាំងពីខាងលើនេះ ចាំបាច់ត្រូវតែ​ធ្វើ​ហើយធ្វើទៀត ពិសេសត្រូវធ្វើមុខឲ្យក្រាស់បន្តិច។

និយាយបែបកំប្លែងបន្តិច លោក ជុនចាន់បុត្រ បានស្រង់សំដី របស់សកលវិទ្យាធិការរងខេមរៈម្នាក់ ដែលលោកមិនបាន​បញ្ជាក់ឈ្មោះ មកបញ្ជាក់ថា៖ «អ្នកយកសារព័ត៌មាន របស់វិទ្យុអាស៊ីសេរីម្នាក់ គេដេញហើយមកវិញ គេដេញទៅហើយ​មក​វិញ។ “មុខក្រាស់” ទាល់តែបានព័ត៌មាន។»

ប៉ុន្តែអ្នកសារព័ត៌មាន«អាជីព» ត្រូវមានគោលការណ៍ របស់ខ្លួន ដែលត្រូវយកអនុវត្ត ជាពិសេសត្រូវបង្ហញថា ព័ត៌មានដែល​ខ្លួន​ផ្សាយ ចេញទៅនោះ ជា«ព័ត៌មានពិត»។ លោក ចាន់បុត្រ បានថ្លែងថា ដើម្បីអាចចាត់ទុកជាព័ត៌មាន«ពិត» ត្រូវឈរលើ​គោលការណ៍ជាក់លាក់មួយ គឺ«ប្រភព»នៃព័ត៌មាននោះ ត្រូវតែមាន«បី»ភាគីយ៉ាងតិច ក្នុងការធ្វើអំណះអំណាង។

«លោក ហ៊ុន សែន នាយករដ្ឋមន្រ្តីកម្ពុជា បានដាច់សសៃឈាមខួក្បាល» ពិត ឬមិនពិត?

លោក ជុន ចាន់បុត្រ បានលើកឧទាហរណ៍មួយ មកបញ្ជាក់ថា កាលពីពេលកន្លងទៅនេះ មានព័ត៌មានមួយ ត្រូវបានគេ​ផ្សព្វ​ផ្សាយ និងចែក​រំលែក ស្ទើរពេញបណ្ដាញសង្គមថា លោក ហ៊ុន សែន នាយករដ្ឋមន្រ្តីកម្ពុជា បានដាច់សសៃឈាមខួក្បាល ហើយត្រូវបាន​គេបញ្ជូន ទៅកាន់មន្ទីរពេទ្យ នៃប្រទេសសឹង្ហបូរី។ តើធ្វើយ៉ាងណា ដើម្បីដឹងថា ព័ត៌មាននេះ ពិត ឬមិនពិត?

អនុប្រធានការ​ផ្សាយ​ជាភាសាខ្មែរ នៃវិទ្យុអាស៊ីសេរី បានបញ្ជាក់ថា៖ «ត្រូវមានអ្នកបញ្ជាក់។ អ្នកបញ្ជាក់នោះ ត្រូវតែជា​អ្នក​ជំនាញ។ ត្រូវរក​ការបញ្ជាក់ ពីពេទ្យនោះថា តើគាត់ (នាយករដ្ឋមន្រ្តីកម្ពុជា) ពិតជាទៅព្យាបាល នៅពេទ្យនឹងមែនទេ? គាត់​មានជំងឺ បែប​ណ្នឹង​មែនដែរទេ?។ (…) យើងត្រូវបញ្ជូនបុគ្គលិករបស់យើង ទៅកាន់ (មន្ទីពេទ្យ) នៅស៊ីងហ្គាពួចឹងទៅ។ (…) តើអ្នក​នាំ​ពាក្យ​របស់រដ្ឋាភិបាល ឬអ្នកនាំពាក្យ របស់គណបក្សណាមួយ អាចបញ្ជាក់ពីរឿងហ្នឹងបានទេ? តើមាន​សាក្សី​ណា​មួយ ឃើញ​ផ្ទាល់​ភ្នែក​ឬទេ? តើអ្នកដែលនិយាយទាំងនោះ មានសមត្ថកិច្ចឬទេ?»

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...