ឈុតឆាកនេះ តែងកើតឡើងជាធម្មតា សម្រាប់បុរសទូទៅ ដែលមានបុគ្គលលក្ខណៈ ជា«សុភាពបុរស»... គ្រាន់តែលើក​នេះ បុរសម្នាក់នោះ គឺលោក បារ៉ាក់ អូបាម៉ា ប្រធានាធិបតីនៃសហរដ្ឋអាមេរិក។ បុរសដែលមានអំណាចជាងគេ នៅក្នុង​ពិភពលោក ត្រូវបានថតជាប់ដោយ ម៉ាស៊ីនថតរ​បស់ស្ថានីយ ទូរទស្សន៍ ABC News នៅពេលដែលលោកបានចុះចេញ ពីឧទ្ធម្ភាគចក្រ ចុះចតនៅលើទីលានមួយ ក្បែរសេតវិមាន បង្ហាញពីសកម្មភាព របស់លោកបានយកឆ័ត្រ ទៅបាំងអម​ការពារ​ទឹកភ្លៀង ឲ្យស្ត្រីពីរនាក់ ។

នាំនួនល្អង រត់កាត់ភ្លៀង?

វីដេអូនេះ ដែលត្រូវបាន យកទៅដាក់ផ្សាយ នៅលើបណ្ដាញសង្គម ត្រូវបានអ្នកប្រើប្រាស់បណ្ដាញសង្គម ចែករំលែក​បន្ត​គ្នារហូតដល់ជិត២០០ ០០០ដង និងមានមនុស្សចុច ចូលមើល ជាង១៤លាននាក់ គ្រាន់តែក្នុងរយៈពេល២ថ្ងៃប៉ុណ្ណោះ។

ត្រឡប់ពីដំណើរទស្សនកិច្ច នៅក្នុងរដ្ឋ ញ៉ូ ចេស៊ី (New Jersey) វិញ លោកប្រធានាធិបតី បានវិលមកសេតវិមានវិញ ខណៈ​ស្ថានភាពឧត្តុនិយម មានភាពអាក្រក់ហួសហេតុ។ ដោយសារតែនៅក្នុងឧទ្ធម្ភាគចក្រ មានឆ័ត្រតែមួយ លោក អូបាម៉ា បាន​យកឆ័ត្រនេះ មកបាំងឲ្យខ្លួនចុះចេញ តាមជណ្ដើរ ហើយបានមកឈប់រង់ចាំ ស្ត្រីពីរនាក់គឺអ្នកស្រី Valerie Jarrett និង​ Anita Breckenridge ដែលជាទីប្រឹក្សា និងជារដ្ឋមន្ត្រីរបស់លោក ដើម្បីដើរចេញពីទីនោះ ជាមួយគ្នា។

កាយវិការ ដែលគេនឹកស្មានមិនដល់៖ រដ្ឋបុរស របស់សហរដ្ឋអមេរិករូបនេះ បានយកដៃម្ខាង ដាក់ចូលក្នុងហោប៉ៅខោ យ៉ាង​​សង្ហា និងប្រើដៃម្ខាងទៀត កាន់ឆ័ត្របាំងឲ្យស្ត្រីទាំងពីរ   ដោយមិនភ្លេច អោនបន្ទាបខ្លួនចុះផងទេ ដើម្បីឲ្យឆ័ត្រ​អាច​ទម្លាក់​កំពស់ មកតម្រូវស្ត្រីទាំងពីរ។

រូបភាពនេះ  ត្រូវបានចែករំលែក និងបង្កភាពល្បីល្បាញ ពាសពេញ​ពិភពលោក។ ប្រតិកម្មសរសើរ ពីសំណាក់អ្នកទស្សនា មានច្រើនរាប់មិនអស់។ អ្នកខ្លះបានសម្ដែងសមានចិត្ត ឈឺឆ្អាលជំនួសលោក អូបាម៉ា ថា៖ «តើបុគ្គលិក ដែលនៅជាប់​ប្រធានាធិបតី ទៅណាអស់ហើយ? ហេតុអ្វី ក៏ប្រធានាធិបតីអាមេរិកមួយទាំងមូល មានឆ័ត្រតែមួយ ខណៈស្ថានភាព​ឧត្តុនិយម ត្រូវបានដឹងថា មិនស្រួលតាំងពីមុននោះ?»៕