ឯកអគ្គរាជទូតខ្មែរ ប្រចាំប្រទេសអង់គ្លេស លោក ហោ ណាំបូរ៉ា បានសរសេរ បង្ហាញការសោកស្តាយ ចំពោះ​មនុស្ស«មួយ​ក្រុម» ដែលបានប្រើប្រាស់ បណ្ដាញសង្គម ដើម្បីផ្សាយនូវព័ត៌មានមិនពិត បំភ្លៃព័ត៌មានស ទៅជាខ្មៅ និងដើម្បីតែ​ចំណេញ​នយោបាយខ្លួន តែបោកប្រាស់ប្រជាពលរដ្ឋ។ លោកបានសរសេរ នៅលើជញ្ជាំងគណនីហ្វេសប៊ុកថា ក្រុមលោក សម្រេច​ចិត្ត​ប្តឹង ចំពោះការបរិហារកេរ្ត៍ និងការប្រមាថ ដែលមិនអាចអត់ឱនឲ្យបាន។

លោក ហោ ណាំបូរ៉ា បានសរសេរថា៖ «លោកអ្នកសម្តែង ហាក់ដូចជាស្គាល់យើងខ្ញុំណាស់ តែធាតុពិត មិនដឹងអ្វីទាំងអស់ ហើយសុទ្ធតែ មិនមែនជាការពិត ឬដឹងហើយ លឺហើយ តែធ្វើបំពាន»។ (សូមអាន ប្រតិកម្មរបស់លោក ហោ ណាំបូរ៉ា នៅ​ក្នុង​រូបផ្តិតចេញពីអេក្រង់ហ្វេសប៊ុក នៅខាងក្រោម)។

ប្រតិកម្មរបស់លោក ណាំបូរ៉ា បានកើតឡើង បន្ទាប់ពីរលកចលនាជាតិនិយម ទាក់ទងនឹងព្រំដែនកម្ពុជា-វៀតណាម បាន​ផ្ទុះឡើងយ៉ាងខ្លាំងក្លា នៅក្រោយពេលដែលឪពុករបស់លោក គឺលោក ហោ ណាំហុង បានចេញលិខិតផ្លូវការមួយ កាលពី​ពេលថ្មីៗនេះ បំភ្លឺទៅរដ្ឋសភាអះអាង ពីការរំលោភបំពានទឹកដីរៀតណាម ចំនួនជាង១៦ហិចតា ពីសំណាក់​ប្រជា​ពលរដ្ឋ​កម្ពុជា នៅជាប់តំបន់ព្រំដែន។

កាលពីពាក់កណ្ដាលខែមេសា ពលរដ្ឋវៀតណាម ក្រោមការជួយការពារជ្រោមជ្រែង ពីអាជ្ញាធរវៀតណាម បានចូលមក​កាន់ទីនោះ ហើយបានបាញ់ថ្នាំបំពុល ធ្វើឲ្យដំណាំកសិផលរបស់ពលរដ្ឋខ្មែរ រលួយងាប់អស់។ ហេតុការណ៍ដ៏ក្រៀមក្រំ របស់ពលរដ្ឋខ្មែរ បានជំរុញឲ្យតំណាងរាស្ត្រគណបក្សប្រឆាំង ចុះទៅដល់កន្លែង ហើយបានធ្វើលិខិតសុំឲ្យបំភ្លឺមួយ ពី​សំណាក់​លោក ហោ ណាំហុង រដ្ឋមន្ត្រីការបរទេសកម្ពុជា។

មិនត្រឹមតែប៉ុណ្ណឹង នៅថ្ងៃទី១៩ ខែឧសភានេះ ក្រុមយុវជនមួយក្រុម ដែលជាអ្នកតាមដានបញ្ហាព្រំដែន យ៉ាងជិតស្និតនោះ បានចុះទៅដល់តំបន់នោះ ដោយផ្ទាល់ ហើយពួកគេរបានរកឃើញ និងទទួលបានការអះអាង ពីពលរដ្ឋកម្ពុជា​រស់នៅទី​នោះ ថាទឹកដីទំហំជាង១៦ហិចតា ជារបស់កម្ពុជាតាំងពីដូនតាមក។ សូមទស្សនាវីដេអូ បញ្ជាក់ពីការអះអាង របស់​ពលរដ្ឋ​ទាំង​នោះ ដូចតទៅ៖

ប៉ុន្តែ នៅមានវីដេអូមួយទៀត ដែលត្រូវបានលោក ហោ ណាំបូរ៉ា បុត្រាលោក ហោ ណាំហុង បានប្រតិកម្មខ្លាំងៗ ដោយ​ហៅ​ការលើកឡើង នៅក្នងវីដេអូនេះ ថាបាន«បំភ្លៃការពិតទាំងស្រុង ដើម្បីផលប្រយោជន៍នយោបាយ»។ លោក ណាំបូរ៉ា បានសរសេរពន្យល់តបវិញថា៖ «ហើយបើគ្រួសាររបស់ ហោ ណាំហុង ក្បត់ជាតិមែន តើយើងតស៊ូ សង្រ្គាមស្លាបប៉ាការ ស្លាប់រស់ និងការតស៊ូមតិ ចរចារជាមួយថៃ ដើម្បីអធិបតេយ្យភាពកម្ពុជាធ្វើអី? តើយើងចចារជាមួយវៀតណាម យ៉ាង​ស្វិត​ស្វាញ លើបញ្ហាព្រំដែនធ្វើអី?»

» សូមទស្សនាវីដេអូ មួយនេះដូចខាងក្រោម៖

» នេះជាសំណេរទាំងស្រុង របស់លោក ហោ ណាំបូរ៉ា (សូមចុចពីលើ ដើម្បីពង្រីកអាន)៖