ជាក្ដីសុបិន្ដ ដែលមានគ្រោះថ្នាក់ដល់ជីវិត។ យុវជន Romario Dos Santos Alvers ជាតិប្រេស៊ីល អាយុ២៥ឆ្នាំ ដែលចូល​ចិត្ត​សាច់ដុំធំៗនោះ បានបង្កឲ្យមានហនិភ័យ មិនអាចនឹកស្មាន ទៅដល់ជីវិតរបស់ខ្លួន៖ នោះគឺធ្វើខ្លួន ឲ្យក្លាយជាមនុស្សយក្ស​សម្បុរបៃតង ឬ Hulk ដែលជាកំពូលតួអង្គ នៅក្នុងភាពយន្ដហូលីវូដ។

ហើយដើម្បីសម្រេច នូវបំណងខុសគេនេះ យុវជនអ្នកលេងសាច់ដុំ បានប្រើប្រាស់ នូវវិធីសាស្ត្រមួយ ប្រកបដោយ​ប្រសិទ្ធិ​ភាព រាប់ចាប់តាំងពីឆ្នាំ២០១២កន្លងមក។ សារព័ត៌មាន «Daily Mail» របស់អង់គ្លេស បានរាយការណ៍ថា យុវជនបាន​ចាក់​ថ្នាំ លាយបញ្ចូលគ្នា នូវសារជាតិបំបោងសាច់ រួមមានជាតិប្រេងនិងអាល់កុល ចូលទៅក្នុងសាច់ដុំរបស់ខ្លួន ដើម្បីឲ្យសាច់ដុំ​ប៉ោងឡើង។ ផ្នែកខ្លះនៃសាច់ដុំរបស់យុវជន បានរីកធំឡើង រហូតមានអង្កត់ផ្ចិតដល់ទៅ ២៣សង់ទីម៉ែត្រ។

ឆ្លើយតបនឹងសារព័ត៌មានអង់គ្លេស យុវជន បានរៀបរាប់ថា ខ្លួនបានចាប់ផ្ដើម អនុវត្តការពង្រីកមាឌ របស់ខ្លួននេះ បន្ទាប់ពី​ខ្លួន​បានស្គាល់រាប់អាន ជាមួយមនុស្សជាច្រើន ដែលចូលចិត្តលេងសាច់ដុំ។ យុវជនបាននិយាយថា៖ «ក្រោយពីដឹង​ពី​វិធីសាស្ត្រ ក្នុងការចាក់ថ្នាំ ពង្រីកសាច់ដុំនេះ ខ្ញុំលែងគ្រប់គ្រងខ្លួនឯង បានតទៅទៀត ដោយឃើញលទ្ធផលចេញមក គួរឲ្យ​ចាប់អារម្មណ៍ណាស់»។

ពេលខ្លះ យុវជនចាំបាច់ត្រូវប្រើម្ជុល ដែលគេយកមកចាក់ គោឡើងក ដោយសារតែសាច់ដុំរបស់យុវជន បានឡើងរឹង ដូច​ថ្ម។ យុវជនបានពន្យល់ទៀតថា៖ «សាច់ដុំខ្ញុំ បានឡើងរឹងខ្លាំង វាមានសភាពដូចដុំថ្មអញ្ចឹង»។

ការប្រព្រឹត្តិរឿងនេះ បានឈានឡើងដល់កំពូល និងបានធ្វើឲ្យយុវជន ត្រូវចូលទៅក្នុងមន្ទីរពេទ្យ ហើយបង្កឲ្យមាន​ការ​ភិត​ភ័យ យ៉ាងខ្លាំងមួយ។ ដើម្បីកាត់បន្ថយការឈឺចាប់ ដែលមានជាប្រចាំ និងធ្វើឲ្យយុវជន ទ្រាំមិនបាននោះ ក្រុមគ្រូពេទ្យ​បាន​គ្រោងថា នឹងកាត់អវៈយវៈរបស់យុវជនចោល។ ប៉ុន្តែជាសំណាងល្អ ដែលក្រុមគ្រូពេទ្យបានបញ្ជៀសជំហាន ដែលឈាន​ទៅកាត់ដៃជើង របស់យុវជននេះ ដោយគ្រាន់តែដក សារជាតិបំប៉ោងសាច់ដុំទាំងអស់ ចេញពីខ្លួនយុវជនប៉ុណ្ណោះ។

តាំងពីពេលនោះមក មានរយៈពេល២ឆ្នាំហើយ យុវជនបានធូរស្រាលជាងមុនច្រើន ហើយបានត្រឡប់មកអនុវត្ត កីឡា​តម្លើង​សាច់ដុំនេះ តាមក្បួនខ្នាតឡើងវិញ៕