ស្នេហាពិត ចិត្តដិតជាប់លើស្រី ប៉ុន្តែលុយកាក់ ថានៈបុណ្យស័ក្ដិ ដ៏អាប្រិយ បានធ្វើឲ្យយុវជនម្នាក់ សម្រេចចិត្តគិតខ្លី ទៅ​ចង​ក​សម្លាប់ខ្លួន។ ប៉ុន្តែសង្ខានៅមិនទាន់អស់ យុវជនអភ័ព្វស្នេហ៍ ត្រូវបានជួយសង្គ្រោះទាន់ពេល។

យុវជនរងគ្រោះ ព្រោះស្នេហ៍មិនដូចបំណង រូបនេះឈ្មោះ សុខ សម្បត្តិ អាយុ៣០ឆ្នាំ សព្វថ្ងៃជាសន្តិសុខម្នាក់ នៅ​ក្រុមហ៊ុន​ឯកជន និងកំពុងរស់នៅផ្ទះលេខ៥០ ផ្លូវ២២០ សង្កាត់ផ្សារដើមគ ខណ្ឌទួលគោក រាជធានីភ្នំពេញ។ យុវជន សុខ សម្បត្តិ ត្រូវបានអ្នកជិតខាងឲ្យដឹងថា ជាអតីតកូនមេភូមិទី៩ នៅក្នុងសង្កាត់ខាងលើ តែបច្ចុប្បន្ន រស់តែជាមួយម្តាយ​ប៉ុណ្ណោះ ព្រោះ​លោកឪពុក បានលាចាកលោកហើយ។

ម្តាយជនរងគ្រោះ បានត្រឹមតែយុំខ្សឹបខ្សួល ប៉ុន្តែបានឆ្លៀត រៀបរាប់តិចៗ ប្រាប់ទស្សនាវដ្ដីមនោរម្យ.អាំងហ្វូថា៖ «ម៉ែគ្មាន​លុយទេកូន (...) ហេតុអ្វីក៍កូន ហ៊ានធ្វើដល់ថ្នាក់នេះ ម្តងជាពីរដង»។ អ្នកស្រីបានរំលឹក ពីហេតុការណ៍ឡើងវិញថា ពេល​កូនប្រុស ត្រឡប់ពីធ្វើការវិញ នៅម៉ោង៥ និង៤០នាទី ល្ងាចថ្ងៃទី០៧ ខែឧសភា ឆ្នាំ២០១៥ យុវជនបានចូលទៅក្នុងផ្ទះ នៅ​ជាន់​ទីបី ដូចសព្វដង។ តែលើកនេះ គាត់បានលឺសំឡេង ចេញពីបន្ទប់ចម្លែក ពេលចូលទៅ មើលឃើញកូនកំពុងចងក ក៏​បាន​ស្រែកឆោឡោ ឲ្យអ្នកជិតខាងមកជួយ។

យុវជន សុខ សម្បត្តិ មិនមានគ្រោះថ្នាក់ ដល់ជីវិតនោះទេ។ នេះ បើតាមការបញ្ជាក់ របស់អ្នកម្តាយដដែល ហើយត្រូវ​បាន​ជួយ​សង្គ្រោះ ទាន់ពេល និងត្រូវបានឡានពេទ្យ ដឹកយកទៅសង្គ្រោះព្យាបាល នៅមន្ទីពេទ្យ។

ម្នាក់ ក្នុងចំណោមអ្នកជិតខាងជាច្រើននាក់ ដែលបានចូលទៅជួយជនរងគ្រោះ ឲ្យរួចពីសេចក្តីស្លាប់ បានបង្ហើបថា កាល​ពីមុន យុវជន សម្បត្តិ ធ្លាប់បានប៉ុនប៉ង សម្លាប់ខ្លួនម្តងហើយ នៅលើស្ពានជ្រោយចង្វារ តែមិនបានសម្រេច លើកនេះ ជា​លើក​ទីពីរហើយ។ ស្រ្តីខាងលើ ដែលសុំមិនប្រាប់ឈ្មោះ បានឲ្យដឹងទៀតថា ទំនងបុរសខាងលើ មានព្រលឹងខ្មោចនាំ ព្រោះ​នៅ​ពេល​ចង់បានអ្វី ហើយមិនបាន គេឃើញគាត់ចូលចិត្ត ទៅកន្លែងស្ងាត់ៗតែម្នាក់ឯង ជាញឹកញាប់។

សតិមិននឹងនរ

ប៉ុន្តែសម្រាប់អ្នកនិពន្ធ ខាងវិបត្តិស្នេហ៍ របស់ទស្សនាវដ្ដីមនោរម្យ.អាំងហ្វូវិញ បានពន្យល់ថា យុវជន សម្បត្តិ អាចមានវិបត្តិ​ផ្លូវចិត្ត ឬសតិមិននឹងនរ តាំងពីច្រើនឆ្នាំមកហើយ ឬអាចនិយាយថា តាំងពីនៅតូច។ យុវជនគប្បីត្រូវទៅជួប​ជាមួយ​គ្រូពេទ្យ​ជំនាញ និងទទួលការព្យាបាល ដើម្បីរំងាប់អារម្មណ៍ ដែលមិននឹងនរនេះ។

ម្យ៉ាងទៀត គេគប្បីយល់ថា មនុស្សប្រុសដើមទ្រូងប្រាំហត្ថ បើចង់បានប្រពន្ធ មិនត្រូវរំពឹងទៅលើតែម្ដាយនោះទេ តែ​សមត្ថភាព​ទាំងនេះ ត្រូវកើតចេញ ពីបាតដៃទាំងគូ ទើបជារឿងគួរឲ្យមោទនៈ។ យុវជន សម្បត្តិ អាចជាមនុស្ស មាន​មនោសញ្ចេតនា យ៉ាងជ្រាលជ្រៅ។ ប៉ុន្តែបើមានភិរយា ហើយយុជនក្លាយជាមនុស្ស មិនចេះគ្រប់គ្រងខ្លួនឯង និងគ្រួសារ​នោះ តើ​ចង់​បាន​ភរិយាមកធ្វើអ្វី? ហើយតោងសួរថា តើស្ត្រីប៉ុន្មាននាក់ ដែលបានឲ្យតម្លៃ ទៅលើការគិតខ្លី របស់យុវជន?