ផ្លយ ម៉ាយវេដ័រ ជាប់ឈ្មោះជាអ្នកប្រដាល់ មិនដែលចាញ់ របស់អាមេរិក នៅក្នុងការប្រកួត ទាំង៤៧ដង ឈ្នះទាំង៤៧ដង និងបានវាយបំបាក់ ផ្ដួលឲ្យសន្លប់ ទៅលើគូប្រកួតបាន ២៦ដង។ ប្រសិនជាអ្នកប្រដាល់ស្បែកខ្មៅរូបនេះ ពិតជាមាន​ប្រៀប​ជាង ម៉ានី ផាកហ្គីអៅ អ្នកប្រដាល់ជាតិហ្វីលីពីន នោះមែនក៏ដោយ តែគេមិនត្រូវមើលរំលង ចំណុចពិសេសទាំង៥ របស់ ផាកហ្គីអៅ ដូចខាងក្រោមនេះឡើយ៖

១) វាយលុករហ័ស

រឿងសំខាន់ទីមួយ ដែលគេត្រូវប្រយ័ត្ន នៅពេលឡើងវ៉ៃ ជាមួយ ផាកហ្គីអៅ គឺក្បាច់វាយលុករហ័ស ហើយករណីនេះ ផ្លយ ម៉ាយវេដ័រ បានដឹងជាមុន និងមិនអាចមើលងាយ ផាកហ្គីអៅ បានឡើយ។ ម៉ាយវេដ័រ មានអាយុ៣៨ឆ្នាំ រីឯ ផាកហ្គីអៅ ដែល​មាន​រហស្សនាម «Pacman» មានអាយុ៣៦ឆ្នាំ ប៉ុន្តែបទពិសោធន៍ នៃការវាយលុករហ័ស របស់ ផាកហ្គីអៅ មាន​គ្រោះថ្នាក់​ជាង ម៉ាយវេដ័រ។

២) ដៃឆ្វេង

មិនមែនអ្នកប្រដាល់ណា ក៏សុទ្ធតែមានដៃឆ្វេង ខ្លាំងទាំងអស់នោះឡើយ។ ប៉ុន្តែ ផាកហ្គីអៅ មានចំណុចខ្លាំងមួយនេះ ដែល​អាចធ្វើការវាយលុយ លើគូប្រកួត បានគ្រប់ឱកាស។ បើតាមអ្នករៀបចំការប្រដាល់ដ៏ល្បី លោក បុប អារាម (Bob Arum) បានឲ្យដឹងថា ម៉ាយវេដ័រ បានរារែកមិនចង់ជួបជាមួយ ផាកហ្គីអៅ រហូតមកដល់ពេលនេះ ដោយសារតែ អ្នក​ប្រដាល់​ជាតិស្បែកខ្មៅ បារម្ភពីដៃឆ្វេង របស់អ្នកប្រដាល់ហ្វីលីពីន។

៣) ល្បឿន

នៅគ្រប់ការប្រកួតទាំងអស់ ម៉ានី ផាកហ្គីអៅ តែងបានបញ្ចេញ នូវចំណុចដ៏ពិេសសនេះ ដើម្បីបង្កើនទំងន់ ទៅលើគូ​ប្រកួត។ ជាការពិត នៅអាយុ៣៦ឆ្នាំ ល្បឿននៃចង្វាក់វ៉ៃ ហាក់ដូចជាបាត់បង់ពី ម៉ានី ខ្លះហើយ តែក៏នៅតែមានសភាព គ្រោះ​ថ្នាក់​ខ្លាំង​នៅឡើយដែរ។ ផាកហ្គីអៅ អាចវាយចេញ ក្នុងរយៈពេលតែមួយ ៥ទៅ៦ដៃ ដោយគ្មានបញ្ហា។

៤) វាយទៅលើដងខ្លួន

កម្រឃើញ អ្នកប្រដាល់ណា ដែលធ្វើរឿងនេះ បានប្រសើរជាង ផាកហ្គីអៅ ណាស់។ ជាពិសេសទៅទៀត រងការ​វាយ​ទៅ​លើដងខ្លួន ជាចំណុចមួយ ក្នុងចំណោមចំណុចខ្សោយជាច្រើន របស់ ម៉ាយវេដ័រ។ កន្លងមក អ្នកប្រដាល់អាមេរិករូបនេះ តែង​ដង្ហក់​ខ្លាំង នៅពេលដែលគូ​ប្រកួត បានវាយទៅលើពោះ និងទ្រូងរបស់ខ្លួន។

៥) គ្មានសម្ពាធ

ផ្លយ ម៉ាយវេឌ័រ វ៉ៃនៅក្នុងទឹកដីអាមេរិកខ្លួនឯង និងទទួលបាននូវប្រៀប ខ្លាំងជាង ម៉ានី ផាកហ្គីដ័រ។ ដោយសារតែបែបនេះ ទើបមនុស្សជាច្រើនលើសលប់ បានចាក់ខាង ម៉ាយវេដ័រ ហើយមិនបានខ្វល់ប៉ុន្មានពី ផាកហ្គីអៅ ឡើយ។ ដូច្នេះ សម្រាប់ «Pacman» កីឡាករហ្វីលីពីន វាពិតជាមិនមានសម្ពាធអ្វីខ្លាំង ដូចគូប្រកួតរបស់ខ្លួនឡើយ៕

» វីដេអូខាងក្រោមនេះ ជារូបភាពចុងក្រោយបង្អស់ របស់កីឡាករទាំងពីរ មុនឡើងសៃវៀន ក្នុងយប់ថ្ងៃសៅរ៍នេះ៖