មនុស្សពីរនាក់ បានស្លាប់ នៅថ្ងៃសុក្រ ទី០១ ខែមេសានេះ បន្ទាប់ពីបានឡើងជិះ ទោងបង្វិលខ្លួន ដែលជាម៉ាស៊ីនកំសាន្ដ ធ្វើឲ្យអារម្មណ៍រំភើប ក្នុងទីក្រុង វេនហ្សូ នៅឆ្នេរភាគខាងកើត នៃប្រទេសចិន។ សាក្សីនៅផ្ទាល់កន្លែង បានថ្លែងបញ្ជាក់ថា ជនរងគ្រោះទាំងនេះ បានធ្លាក់ពីកំពស់ទោង ប្រមាណជា២០ម៉ែត្រ នៅពេលដែលម៉ាស៊ីន «Crazy Scream» សម្រាប់​ជិះ​កំសាន្ដ​នេះ បានផ្ដើមដំណើរការដំបូង។

សាក្សីត្រូវបានស្រង់សម្ដី ដោយសារព័ត៌មាន «shanghaiist» មកបញ្ជាក់ទៀតថា មានមនុស្សជាច្រើននាក់ បានស្រែកទៅ​អ្នកកាន់ម៉ាស៊ីន កុំទាន់ឲ្យដំណើរការទោងបង្វិលនោះ ដោយហេតុថា គេគួរទុកពេល ឲ្យអ្នកជិះបានពាក់ខ្សែរក្រវ៉ាត់ ឬរបាំង​ការពារសិន។ ហេតុការណ៍នេះ ក៏បានធ្វើឲ្យមនុស្ស៣នាក់ផ្សេងទៀត រងរបួសដែរ។ សាក្សីបានបញ្ជាក់បន្ថែមថា មនុស្ស​បី​នាក់ បានធ្លាក់ពីកន្លែងអង្គុយរបស់ពួកគេ នៅពេលម៉ាស៊ីន បានបញ្ជូនពួកគេទៅដល់លើ ខណៈពីរនាក់ទៀត ត្រូវបានដែក​ធ្ងន់ៗ​ជាច្រើន ដាច់ធ្លាក់មកត្រូវ។

អ្នកទៅកំសាន្ដក្នុងសួននោះ បានឆ្លៀតឱកាស ថតវីដេអូពីហេតុការណ៍នេះ ខណៈក្រុមបុគ្គលិកបាន​បណ្ដេញពួកគេ​ចេញ​ឲ្យឆ្ងាយ ដើម្បីអាចឲ្យគេ ធ្វើការពិនិត្យជនរងគ្រោះ។ បើតាមសេចក្ដីប្រកាសព័ត៌មាន របស់អាជ្ញាធរតំបន់ បានឲ្យដឹងថា បញ្ហាមួយចំនួន នៃទោងបង្វិលខ្លួននេះ ត្រូវបានព្រមាន ឲ្យដឹងជាមុនហើយ តែម្ចាស់គ្រប់គ្រងម៉ាស៊ីន មិនបានយកចិត្ត​ទុក​ដាក់ទេ។

រហូតមកដល់ពេលនេះ សួនកំសាន្ដត្រូវបានបិទ ហើយម្ចាស់គ្រប់គ្រង ត្រូវបានអាជ្ញាធរឃាត់ខ្លួន៕

បន្ទាប់ពីហេតុការណ៍នេះ ជាវីដេអូ៖