សមាជិក នៃគណកម្មការនាយក នៃគណបក្សសង្គ្រោះជាតិ មួយរូប បានអះអាងប្រាប់ ទស្សានាវដ្ដីមនោរម្យ.អាំងហ្វូថា គណបក្សសង្គ្រោះជាតិ ដែលជាគណបក្សសម្លេងភាគតិច ក្នុងរដ្ឋសភា នៅតែរក្សា និងគាំទ្រ នូវវប្បធម៌សន្ទនា រវាង​គណបក្ស​នយោបាយទាំងពីរ។ ថ្លែងក្នុងល័ក្ខខ័ណ្ឌមិនបញ្ចេញឈ្មោះ មន្រ្តីរូបនេះបានបន្តថា ថ្នាក់ដឹកនាំ​នៃគណបក្សទាំង​ពីរ បាន​សម្រេច និងរក្សានូវគោលជំហរ របស់ខ្លួនជានិច្ច ក្នុងការរក្សានូវតម្លៃ នៃវប្បធម៌សន្ទនា ដែលបានកើតចេញ ពីកិច្ច​ព្រម​ព្រៀង ថ្ងៃទី២២ ខែកក្កដា ឆ្នាំ២០១៤។

មិនអាចភ្ជាប់ទំនាក់ទំនង ជាមួយអ្នកនាំពាក្យ របស់គណបក្សសង្គ្រោះជាតិ បានទេ ដោយពុំមាន អ្នកទទួលទូរស័ព្ទ។ ដូច​គ្នានេះដែរ តាមការអះអាង របស់លោក លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិ ជាមួយវិទ្យុ​ក្នុង​ស្រុក​មួយ បានលើកឡើងយ៉ាងខ្លីថា គណបក្សសង្គ្រោះជាតិ កំពុងជំរុញ និងរក្សានូវវប្បធម៌សន្ទនា នៃគណបក្សទាំងពីរ ដោយ​មិនងាករេ។ លោកថា៖ «គោលជំហរ របស់គណបក្សសង្គ្រោះជាតិ ជំរុញលើកកម្ពស់ វប្បធម៌សន្ទនា។ (…) យើងបាននឹង​កំពុង​ធ្វើ​កិច្ចការ​ទាំងអស់ហ្នឹង។»

កាលពីថ្ងៃទី២៩ ខែមេសា ម្សិលម៉ិញនេះ ក្នុងខេត្តព្រះសីហនុ ក្នុងពិធីសម្ពោធ ដាក់ឲ្យប្រើប្រាស់រោងចក្រ ចម្រាញ់ដូង​ប្រេង​ទី២ របស់ក្រុមហ៊ុន ម៉ុង ឫទ្ធី គ្រុប លោកនាយករដ្ឋមន្រ្តី ហ៊ុន សែន បានគម្រាម និងព្រមានថា នឹង​«បញ្ចប់វប្បធម៌សន្ទនា» បើថ្នាក់ដឹកនាំ គណបក្សសង្គ្រោះជាតិ លោក កឹម សុខា នៅតែបន្តនយោបាយរបស់ខ្លួន រិះគន់ និងវាយប្រហារ មកលើ​គណបក្ស​ប្រជាជនកម្ពុជា ដោយគ្មានសំចៃមាត់ តាមទីសាធារណៈ។

ការប្រតិកម្ម របស់លោកនាយករដ្ឋមន្រ្តី ហ៊ុន សែន បានធ្វើឡើង បន្ទាប់ពីលោក កឹម សុខា អនុប្រធានទីមួយនៃរដ្ឋសភា និង​ជាអនុប្រធានគណបក្សសង្គ្រោះជាតិ បានថ្លែងនៅឯខេត្តកំពង់ឆ្នាំង កាលពីថ្ងៃទី២០ ខែមេសាកន្លងទៅថា ទោះជា​យ៉ាង​ណាក៏ដោយ បើគណបក្សសង្គ្រោះជាតិ «ឈ្នះឆ្នោត» គណបក្សមួយនេះ នឹងមិនសងសឹក ជាមួយគណបក្ស​ប្រជាជន​កម្ពុជាទេ។

ការថ្លែងរបស់លោក កឹម សុខា ខាងលើនេះ ហាក់បីដូចជាដុំភ្លើងមួយដ៏ក្តៅ បានធ្លាក់ទៅប៉ះសាច់ លោកនាយក​រដ្ឋមន្រ្តី​យ៉ាង​ដូច្នោះ ដែលនាំឲ្យលោកបង្ហាញ នូវប្រតិកម្មថា លោកនឹងមិនអាចទទួលយកបានទេ ចំពោះសារនយោបាយនោះ។ លោក ហ៊ុន សែន បានសួរថា តើលោក កឹម សុខា បានអះអាងថាខ្លួន«ឈ្នះ» ហើយមិនសងសឹកនោះ ដោយសំអាងលើ​ហេតុផល និងមូលដ្ឋានអ្វី?

លោកនាយករដ្ឋមន្រ្តី បានធ្វើបណ្តាំ ផ្ញើរទៅកាន់ថ្នាក់ដឹកនាំ គណបក្សសង្គ្រោះជាតិយ៉ាងដូច្នេះថា៖ «សូមឯកឧត្តម សម រង្ស៊ី អប់រំផ្ទៃក្នុងបក្សឲ្យបាន។ បើឯកឧត្តមធ្វើមិនបានទេ ខ្ញុំក៏! អាវប្បធម៌សន្ទនាហ្នឹង គឺលុបចោល ក៏ត្រូវលុបចោល ក៏លុប​ទៅ។ កើតហើយ បើវាងាប់ទៅវិញ ឲ្យវាងាប់ទៅ ព្រោះកើតហើយ វាត្រូវរបួសនៅកំពង់ឆ្នាំង។ មិនអ៊ីចឹង? កើតជាមួយគ្នា នៅសៀមរាប ដល់មកងាប់ ត្រូវរបួស ៗនៅកំពង់ឆ្នាំង ហើយប្រើពាក្យសម្ដីបែបហ្នឹង តើឲ្យគេ (ត្រូវ) តបត (ឬ) ទេ?»

សាររបស់លោក ហ៊ុន សែន បានបន្តជំរុញ ឲ្យលោក សម រង្ស៊ី ធ្វើការជ្រើសរើស រវាងវប្បធម៌សន្ទនា ឬរវាងរូបលោក និង​លោក កឹមសុខា ទៀតថា៖ «ខ្ញុំចង់ផ្ញើសារ ទៅឯកឧត្តម សម រង្ស៊ី ថា ខ្ញុំចង់និយាយថា កុំទុក កឹម សុខា ទាត់ជើងខ្ញុំ។ (…) ដូច្នេះឥឡូវនេះ លោក សម រង្ស៊ី ត្រូវជ្រើសរើស តើបន្តវប្បធម៌សន្ទនា ឬយើងត្រូវប្រឈមមុខដាក់គ្នា អរិយភាពដាក់គ្នា។ (...) អ្វីដែលខ្ញុំចង់កត់សម្គាល់ គឺសូមឱ្យបញ្ចប់ទៅ នូវនយោបាយ “ទឹកឡើងត្រីស៊ីស្រមោច ទឹកហោច ស្រមោចស៊ីត្រី” ។ ព្រោះរឿងនេះ វាបានកើតឡើងច្រំដែល នៅក្នុងប្រវត្តិសាស្ត្រកម្ពុជា។»៕