កាលពីព្រឹក ថ្ងៃទី២៧ ខែមេសានេះ មានភ្លៀងធ្លាក់មួយមេយ៉ាងធំ បណ្តាលឲ្យមនុស្សម្នា ធ្វើដំណើរនៅតាមដងផ្លូវ ព្រោង​ព្រាតពិបាក ដោយសារកន្លែងខ្លះលិចទឹក និងកន្លែងខ្លះទៀតស្ទះផ្លូវ បញ្ហាទាំងនេះ ស្ទើតែជារឿងធម្មតាទៅហើយ រាល់​ពេល​មានភ្លៀងធ្លាក់ម្តង។ តែអ្វីដែលមិនធម្មតានោះ គឺភ្លៀងមួយមេនេះ បានធ្វើឲ្យគ្រួសារពីរមានជម្លោះជាមួយគ្នា ដោយ​ពាក្យ​សម្តីធ្ងន់ៗ បម្រុងនឹងបង្កររបួសស្នាម ថែមទៀត។

ហេតុការណ៍ដែលបណ្តាល ឲ្យគ្រួសារទាំងពីរ ជាអ្នកជិតខាងជាមួយគ្នា រស់នៅភូមិពោធ៍មង្គល ឃុំព្រែកតាទែន ស្រុក​ពញ្ញាឮ ខេត្តកណ្តាល ឈ្លោះគ្នា រហូតចង់ប្រើប្រាស់ អំពើហិង្សាដាក់គ្នានេះ ដោយសារនៅពេលមានភ្លៀងធ្លាក់ រហូត​ដល់​លិចផ្ទះភាគីម្ខាង ម្ចាស់ផ្ទះភាគីនោះ បានទៅកាយឲ្យទឹក ចេញពីផ្ទះទៅចូលលូ តែគ្រួសារម្ខាងទៀត បាន​ហាម​ប្រាម​ថា មិនឲ្យកាយអ្វីទាំងអស់ ព្រោះលូនោះ នៅជាប់ផ្ទះរបស់ខ្លួន (Sic)។

មេគ្រួសារដែលលិចទឹក អ្នកស្រី លឹម សុខិម បានប្រាប់ទស្សនាវដ្តីមនោរម្យ.អាំងហ្វូនៅព្រឹកថ្ងៃទី២៧ ខែមេសា ឆ្នាំ​២០១៥​ថា គាត់គ្រាន់តែចង់រំដោះទឹកភ្លៀងចេញ មិនឲ្យលិចចូលផ្ទះប៉ុណ្ណោះ តែអ្នកម្ចាស់ផ្ទះនៅជាប់លូ មិនឲ្យអ្នកស្រីធ្វើ ហើយថែមទាំងបានជេរប្រមាថ មើលងាយអ្នកស្រី ដោយពាក្យសម្តីផ្សេងៗមិនសមរម្យ ហើយបានបម្រុងប្រើចប ដែល​នៅ​កាន់នឹងដៃគាត់ មកវាយអ្នកស្រីទៀតផង។ លុះត្រាតែមានអ្នកជិតខាងមកជួយ ទើបគាត់ព្រមផ្អាកសកម្មភាព។ អ្នកស្រី​ថា ក្នុងបញ្ហានេះ គ្មានអ្នកណាម្នាក់រងរបួសទេ តែបានឈរឈ្លោះគ្នា ពីចំងាយរៀងខ្លួន។

ចំណែកឯក្រុមគ្រួសារ ភាគីម្ខាងទៀតមានគ្នាពីរនាក់ ស្វាមីឈ្មោះ នៅ ណាង អាយុ៥៦ ឆ្នាំ និងប្រពន្ធឈ្មោះ ខុម អាយុ ៥០ឆ្នាំ មានទីលំនៅក្នុងភូមិកើហេតុខាងលើ បាននិយាយខ្លាំងៗ នៅពេលមេឃកំពុងភ្លៀងថា គ្មានអ្នកណាម្នាក់ អាច​កាយ​លូនេះបានទេ ទោះចង់ទឹកភ្លៀងលិចផ្ទះអ្នកណា ក៏ដោយ។ ភាគីដែលមានផ្ទះជាប់លូខាងលើ បានបន្ថែមទៀតថា គាត់មិនឲ្យភាគីអ្នកស្រី លឹម សុខិម កាយលូទេ ហើយបើនៅតែបន្តធ្វើ គាត់នឹងទៅប្តឹងមេភូមិ ថាបំពារបំពាន​មក​លើ​ផ្ទះ​គាត់។

បើតាមព្រឹទ្ធាចារ្យម្នាក់ នៅក្នុងភូមិនេះ លោកយាយ អ៊ឺន យួន វ័យ៧០ឆ្នាំ ឲ្យដឹងថា គាត់មិនមែនកាន់ជើង លំអៀង​ទៅ​ខាង​ណានោះទេ។ តាមធម្មតា លូត្រូវបានគេធ្វើឡើង សម្រាប់បង្ហូរទឹក។ តែការហាមឃាត់ របស់គ្រួសារលោក នៅ ណាង ជាទង្វើមួយខុស ព្រោះមិនព្រម ឲ្យគេបង្ហូរទឹកចូលទៅក្នុងលូ នៅពេលមានអាសន្ន។ លោកយាយថា ប្រហែល​ជា​គ្រួសារ​នេះ មាន​​គោល​​បំណង ឲ្យអ្នកជិតខាងរបស់ខ្លួន ទទួលរងការខូចខាតមើលទៅ។

នៅក្នុងពេលភ្លាមៗ ទស្សនាវដ្តីមិនអាចជួប ជាមួយលោក យឹម ចេត មេឃុំព្រែកតាទែនបានទេ ដោយលោកមិនទាន់​មកធ្វើការ។ តាមអ្នកភូមិទាំងអស់ ដែលនៅក្នុងហេតុការណ៍ ប្រមាណជា១ម៉ោងជាងនេះ បានឲ្យដឹងថា វាជារឿង​មួយ​មិនត្រឹមត្រូចទេ ព្រោះគ្មានអ្នកណាម្នាក់ មានសិទ្ធកាន់កាប់ លើទ្រព្យសម្បត្តិ៍សាធារណៈដូច្នេះឡើយ។ តែពលរដ្ឋ​អាច​មាន​សិទ្ធិប្រើប្រាស់ និងចូលរួមថែរក្សាការពារ ទ្រព្យសម្បត្តិ៍សាធារណៈបាន។ ម្យ៉ាងទៀត គ្រួសារអ្នកស្រី លឹម សុខិម គួរតែជូនដំណឹងទៅអាជ្ញាធរ (មេភូមិ ឬមេឃុំ ឬតំណាងអាជ្ញាធរណាម្នាក់ទៀត) មុននឹងធ្វើការកាយលូនេះ ដើម្បី​បញ្ជៀស​នូវហេតុការណ៍ ប្រឈមមុខដូចខាងលើ៕