ដំណឹងដ៏គួរឲ្យភ្ញាក់ផ្អើលមួយ ទាក់ទងនឹងកីឡាករ ដេវីដ ល្វីស អាយុ២៨ឆ្នាំ ដែលទាត់នៅខ្សែរការពារ ឲ្យក្រុមបាល់ទាត់​ប៉ារីស បានធ្វើឲ្យអ្នកផងយល់ថា កីឡាករអាយុ២៨ឆ្នាំរូបនេះ នៅព្រហ្មចារីយ៍នៅឡើយ។ នេះបើតាមការផ្សាយ ឲ្យដឹង របស់​សារព័ត៌មាន El Mundo Deportivo របស់ប្រទេសអេស្ប៉ាញ។

សារព័ត៌មានបានសរសេរឲ្យដឹងថា កីឡាករ ដេវីដ ល្វីស ដែលមានសញ្ជាតិប្រេស៊ីល គឺជាអ្នកមានជំនឿយ៉ាងស៊ប់ ទៅ​លើ​សាសនាគ្រីស្ដ៍ និងថែមជាសមាជិកម្នាក់ នៅក្នុងចលនាមួយ ដែលមានឈ្មោះថា «ខ្ញុំសម្រេចចិត្តរង់ចាំ (Yo elegi esperar)»។ ចលនានោះ មានគោលការណ៍ ចង់រក្សាទុកនូវសមាជិករបស់ខ្លួន ឲ្យជៀសចេញឲ្យឆ្ងាយ ពីការរួមភេទ នៅ​មុន​អាពាហ៍ពិពាហ៍។

ដូច្នេះ ក្នុងនាមជាសមាជិកមួយរូប របស់ចលនានេះ កីឡាករដ៏ល្បី ដេវីដ ល្វីស ទំនងជាបានសម្រេចចិត្ត នៅរង់ចាំថ្ងៃ​ដែល​កីឡាករ ត្រូវចូលរោងការ ជាមួយសង្សាចាស់វស្សារបស់ខ្លួន នាង សារ៉ា ម៉ាឌើរ៉ា (Sara Madeira) ជាមុនសិន ដើម្បី​រួមរ័ក្ស​ភិសម័យ។ តែបញ្ហាមួយ... នៅត្រង់ថា តើកីឡាករអាចអត់ទ្រាំ ដល់អង្កាល បើនាង សារ៉ា អាយុ២៤ឆ្នាំ មានរូបរាង​ស៊ិចស៊ី​យ៉ាង​ណ្នឹងនោះ?

លោក នែលសុន ជូនីញរ (Nelson Junior) ស្ថាបនិករបស់ចលនា «ខ្ញុំសម្រេចចិត្តរង់ចាំ» បានថ្លែងប្រាប់សារព័ត៌មានថា៖ «ដេវីដ ល្វីស តែងតែបានគាំទ្រយើងជានិច្ច ជាពិសេសនៅតាមបណ្ដាញសង្គម។ យុវជនម្នាក់នេះ ជាគំរូសម្រាប់កុមារ និង​យុវជនផ្សេងទៀត។»

ដូច កាកា

ករណីរបស់ ដេវីដ ល្វីស មិនមែនមានតែមួយទេ។ ព្រោះកីឡាករ កាកា ជាតិប្រេស៊ីលដូចគ្នា ក៏ធ្លាប់ថែរក្សា ព្រហ្មចារីយ៍​របស់ខ្លួន រហូតដល់ថ្ងៃរៀបការដែរ។ អតីតម្ចាស់បាល់មាស កីឡាករ កាកា បានរៀបការនៅឆ្នាំ២០០៥ ប៉ុន្តែមិនដែលមាន ទំនាក់ទំនងផ្លូវភេទ សូម្បីតែម្ដងឡើយ នៅមុនពេលកីឡាកររៀបការ។ កាលពីពេលនោះ កីឡាករ កាកា បានថ្លែង​អះអាង​ថា៖ «ខ្ញុំជាមនុស្សប្រុសធម្មតាម្នាក់។ ជាមួយនឹង ការ៉ូលីន (ភរិយារបស់ កាកា) យើងបានអោបគ្នា ហើយយើងតែង​មាន​ចំណង់ រវាងគ្នាទៅវិញទៅមក។ ប៉ុន្តែយើងមានអារម្មណ៍ថា គួរឲ្យអស្ចារ្យណាស់។ ខ្ញុំគិតថា ប្រសិនបើកជីវិតយើង រីករាយ​ថ្លៃថ្លា មក​ទល់​នឹង​ថ្ងៃនេះ នោះដោយសារតែយើងចេះ "រង់ចាំ"។»៕