អ្នក​កាសែត​ប្រភេទ​ណា ដែល​ជំរិត​ទារ​លុយ​ពី​សមត្ថកិច្ច?

មន្ត្រីសមត្ថកិច្ចជាន់ខ្ពស់មួយរូប ពីខេត្តបន្ទាយមានជ័យ បានឲ្យដឹងថា មានអ្នកកាសែត នៅបណ្ដាញផ្សព្វផ្សាយមួយចំនួន បាន​នាំ​គ្នា​គម្រាម​ទារ​លុយ​កាក់ ពេលមានពិធីធំៗម្តងៗ ពីសមត្ថកិច្ចនៅក្នុងខេត្ត ដើម្បីផ្សព្វផ្សាយព័ត៌មានមួយចំនួន។ ហេតុផលទាំង​នេះ​ហើយ ដែល​ធ្វើ​ឲ្យ​សមត្ថកិច្ច​មួយ​ចំនួន មិនសូវមានទំនុកចិត្ត និងផ្តល់ការជឿជាក់ខ្លាំង ទៅលើអ្នកកាសែត។
Loading...
  • ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញថ្ងៃទី២១ មេសា ២០១៥
  • កែប្រែចុងក្រោយ: April 23, 2015
  • ប្រធានបទ: សារព័ត៌មាន
  • អត្ថបទ: មានបញ្ហា?
  • មតិ-យោបល់

មូលហេតុ ដែលមិនសូវមានមនន្រ្តី សមត្ថកិច្ចណាមួយ ហ៊ាននិយាយជាមួយ អ្នកកាសែតនោះ ព្រោះខ្លាចគេសរសេរ​មិន​ល្អពីខ្លួន។ ម្យ៉ាងវិញទៀត អ្នកទាំងនោះ ថែមទាំងបានធ្វើ នូវរឿងមិនពិតមួយចំនួន ដើម្បីឲ្យមានការចាប់អារម្មណ៍ ពី​សំណាក់​មិត្តអ្នកអាន។ ទាំងនេះ ជាការអះអាងបញ្ជាក់ឡើង របស់មេបញ្ជាការម្នាក់ លោក ហាំ វណ្ណៈ ដែលឈរជើង នៅ​ទល់ដែនប៉ោយប៉ែត ខេត្តបន្ទាយមានជ័យនេះ។ លោក បាននិយាយថា ដោយហេតុបែបនេះហើយ ទើបមន្ត្រី​សមត្ថកិច្ច​មួយ​ចំនួន មិនសូវមានទំនុកចិត្ត ទៅលើអ្នកកាសែត និងបារម្ភពីភាពលើសលួស និងខ្វះខាតទាំងនេះ។

ទំនងជាចង់ជម្រះបញ្ជី ជាមួយអ្នកសារព័ត៌មានខ្លះ ដែលនិយាយមិនពិត ឬពន្លើស ហើយបន្ទោសបង្អាប់ ពីសកម្មភាព​របស់​នគរបាលខ្មែរ នៅតាមព្រំដែននោះ លោក ហាំ វណ្ណេៈ បានថ្លែងឲ្យដឹងទៀតថា៖ «ទូរទស្សន៍មួយចំនួន ក៍ណាស់ដែរ វាយប្រហារថា នគរបាលព្រំដែនឃុបឃិត ជាមួយសមត្ថកិច្ចថៃ។ ខ្ញុំបានពិភាក្សាគ្នា បម្រុងធ្វើសុំនុំរឿងទៅតុលាការ ព្រោះ​តែការចោទប្រកាន់ មិនដឹងរឿងទាំងនេះ។ ជាក់ស្តែងខ្ញុំ និងនគរបាលផ្សេងទៀត មិនបានឈប់សំរាក ទៅជួប​កូន​ប្រពន្ធទេ ពេលចូលឆ្នាំ នៅការពារសុវត្តិភាព បងប្អូនពេញមួយចូលឆ្នាំខែ្មរ ខ្លាចមានបញ្ហានៅទល់ដែន។ រឿងអីត្រូវមក​មួល​បង្កាច់ ទាំងស្រស់ៗបែបនេះ?»

ប៉ុន្តែការអះអាង របស់មេបញ្ជាការខាងលើ ត្រូវបានបដិសេធ ដោយអ្នកកាសែតអាជីពមួយរូប ដែលមានវត្តមានជាប្រចាំ នៅក្នុងតំបន់នោះ។ ក្នុងល័ក្ខខ័ណ្ឌ សុំមិនបញ្ចេញឈ្មោះ អ្នកសារព័ត៌មានរូបនោះ បានឲ្យទស្សនាវដ្តីមនោរម្យ.អាំងហ្វូ​ដឹងថា បើជាអ្នកកាសែតអាជីព មិនអាចធ្វើ ដូចដែលបានលើកឡើងខាងលើបានទេ ព្រោះវាខុសវិជ្ជាជីវៈជាអ្នកកាសែត ជាពិសេសនាំឲ្យអាប់ឱន ដល់អ្នកដ៏ទៃផង។

អ្នកកាសែតរូបនេះ បានទទួលស្គាល់ថា ពិតជាមានបុគ្គលមួយចំនួន ដែល​បានធ្វើរឿងនេះ និងមិនតែប៉ុណ្ណោះ បានបង្វិល នូវការពិតមួយចំនួនទៀតផង។ ប៉ុន្តែអ្នកកាសែត ដែល«ថ្លើមធំ»​ហ៊ាន គម្រាមមន្រ្តីនគរបាលនោះ មិនមានច្រើនប៉ុន្មានទេ គឺមានតែបុគ្គលតិចតួចប៉ុណ្ណោះ។

ដោយឡែក អ្នកសារព័ត៌មាននៅរាធានីភ្នំពេញមួយរូបទៀត បានទទួលស្គាល់ដូចគ្នាថា នៅភ្នំពេញ ក៏មានករណី«គោះ»​សមត្ថកិច្ច យកលុយខ្លះៗដែរ តែមិនដល់ថ្នាក់ល្បីល្បាញ ដូចនៅតាមខេត្តនោះទេ ព្រោះថា នៅក្នុងរាជធានីភ្នំពេញ មាន​មនុស្សច្រើន ហើយអ្នកជួយអន្តរាគមន៍ក៏ច្រើន ដែលធ្វើឲ្យ ករណីដូចខាងលើ មិនមានសកម្មភាពខ្លាំងនោះទេ។ ម្យ៉ាង​ទៀត ដោយសារអ្នកសារព័ត៌មាន នៅក្នុងរាជធានី មានការទទួលខុសត្រូវខ្ពស់ នៅក្នុងស្ថាប័នរបស់ពួគេ ដូច្នេះមិនអាច​ធ្វើ​​ដូច​ជា​ការលើកឡើង របស់មេបញ្ជាការខាងលើទេ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...