ក្រុមប៉ារីស (Paris Saint-Germain) ដែលគេបានចាត់ទុកថា ជាវីរបុរស បន្ទាប់បានឈ្នះក្រុមឆែលស៊ី (Chelsea) របស់​អង់គ្លេស បានឡើងមកប៉ះជាមួយនឹង ក្រុមអ្នកមានបុណ្យ បាសឺឡូន (Barcelone) នៅក្នុងវគ្គ១ភាគ៤ផ្ដាច់ព្រ័ត្រ នៃពាន​រង្វាន់ សម្ព័ន្ធជើងឯក អ៊ឺរ៉ុប កាលពីយប់ថ្ងៃទី១៥ ខែមេសា ម្សិលម៉ិញនេះ ប៉ុន្តែបានបាក់មុខយ៉ាងធ្ងន់ធ្ងរ ដោយត្រូវ​ក្រុម​បាសឺឡូន លត់ក្នុងពិន្ទុ ១-៣។

ពិន្ទុទាំងបីគ្រាប់៖ គ្រាប់ទីមួយ ត្រូវបាន ណីម៉ា (Neymar) តារាបាល់ទាត់ប្រេស៊ីល ទទួលបានបាល់ ពី លីយ៉ូនែល ម៉េស៊ី (Lionel Messi) ហើយបណ្ដើរទៅមុខប៉ុន្មានជំហាន ទើបទាត់បញ្ជូនចូលទី របស់ប៉ារីស រកគ្រាប់ទីមួយ នៅនាទីទី១៨ បានយ៉ាងងាយ។ ចំណែក​ឯ​គ្រាប់​ទី២ (នាទី៦៧) និងទី៣ (នាទី៧៩) សុទ្ធតែជាថ្វីជើង របស់កីឡាករ ល្វីស៍ ស្វារ៉េស (Luis Suarez) ដែលត្រូវបាន​ក្រុម​អ្នក​មាន​បុណ្យ ទិញពីក្រុម លីវៀភូល (Liverpool) របស់អង់គ្លេស កាល​ពីចុង​រដូវ​កាល​មុន។

ចំណែកមួយគ្រាប់ របស់ប៉ារីស ជាការទាត់បញ្ចូលទី ពីចំងាយរបស់កីឡាករ គ្រេហ្គ័រី វ៉ាន់ឌើវៀល (Gregory Van Der Wiel) នៅនាទី ៨២។ ប៉ុន្តែ បាល់នេះបានចូលទីបាសឺឡូន ព្រោះវាបានមកប៉ះជាមួយនឹងជើង របស់កីឡាករខ្សែរការពារ របស់​បាសឺឡូន​ខ្លួនឯង ដែលធ្វើឲ្យអ្នកចាំទី មិនបានត្រៀមចាប់បាល់នេះ។

យ៉ាងណាក៏ដោយ ក្រុម ប៉ារីស នៅមានសង្ឃឹម អាចឡើងទៅវគ្គ១ភាគ២ បាន ដោយត្រូវទៅជួប ជាមួយក្រុម បាសឺឡូន នៅក្នុងការប្រកួត «ត្រឡប់» នៅក្នុងផ្ទះរបស់បាសឺឡូន នាប្រទេសអេស្ប៉ាញ វិញនៅសប្ដាហ៍ក្រោយ។ តែក្ដីសង្ឃឹមនោះ មានសភាព​ស្ដួច​ស្ដើង​ណាស់ ដោយហេតុថា ក្រុមប៉ារីស ត្រូវយកពិន្ទុឈ្នះ ក្រុមបាសឺឡូន ក្នុងការប្រកួតលើកក្រោយនេះ ឲ្យ​បាន​យ៉ាង​ហោច ក៏ ៣-០ ដែរ។ ពិន្ទុនេះ មិនមែននរណា ក៏អាចធ្វើបាននោះទេ ជាពិសេសទល់នឹងក្រុមមួយ ដែល​លេង​បាន​ល្អ ដូច​ក្រុម​បាសឺឡូន៕