រូបថត នៃសំណល់បាក់បែក របស់រថយន្ដដ៏ទំនើប ធុន Lamborghini ពណ៌បៃតងស្លេក និងរថយន្ដទំនើប ធុន Ferrari ពណ៌ក្រហម រួមនឹងរូបថតគ្រោះថ្នាក់ ផ្សេងទៀត បង្ហាញពីរថយន្ដទំនើបដទៃ ជាច្រើននោះ បានទទួល នូវការ​ចាប់​អារម្មណ៍​យ៉ាងខ្លាំង នៅក្នុងរយៈពេលចុងក្រោយនេះ នៅប្រទេសចិន ជាពិសេស នៅពេលដែលរូបទាំងនេះ ត្រូវបាន​ចែក​ផ្សាយ នៅបន្ទាប់ពីគ្រោះថ្នាក់ចរាចរណ៍ ដ៏ធ្ងន់ធ្ងរ រវាងរថយន្ដទំនើបទាំងពីរ ក្នុងផ្លូវក្រោមដី កាលពីថ្ងៃសៅរ៍ សប្ដាហ៍មុន ដែល​ធ្វើ​ឲ្យ​មនុស្ស​ម្នាក់រងរបួស។

គ្រោះថ្នាក់ចរាចរណ៍ លើកមុន នៃរថយន្ដ Ferrari នៅក្នុងប្រទេសចិន បានកើតឡើង នៅខែមីនា ឆ្នាំ២០១២ ក្នុងរដ្ឋធានី​ប៉េកាំងដដែល បង្កឲ្យរង្គើដល់មជ្ឈដ្ឋាននយោបាយ របស់ចិន ក្នុងសម័យនោះ អស់មួយរយៈ។ ក្នុងគ្រោះថ្នាក់នៅ​ពេល​នោះ អ្នកកាន់ចង្កូត ដែលបានស្លាប់ភ្លាមៗ នៅនឹងកន្លែង ជាកូនប្រុសរបស់លោក លីង ជីហួ (Ling Jihua) ជំនិតដៃស្ដាំ​របស់​អតីតប្រធានាធិបតីចិន ហួ ជិងតាវ (Hu Jintao)។ នៅក្នុងរថយន្ដនោះដែរ មានស្ត្រីវ័យក្មេងពីរនាក់ បានរង​របួស​ធ្ងន់។ ស្ត្រីម្នាក់ ពីក្នុងចំណោមស្ត្រីទាំងពីរ គ្មានសម្លៀកបំពាក់នឹងខ្លួនទេ។

សង្គ្រាមពាក្យសំដី ដែលចេញពីគ្រោះថ្នាក់ចរាចរណ៍ នៅពេលនោះ បានចង្អុលដាក់មេដឹកនាំកុម្មុយនីសធំៗរបស់ចិន ពីការទាក់ទងនឹងអំពើពុករលួយ និងពីបុគ្គលិកលក្ខណៈ របស់ក្រុមកូនចៅ ដ៏អន្ទ្រើសៗ របស់គេ។ លោក លីង ជីហួ ត្រូវ​បានដកចេញ ពីតំណែង និងបន្ទាប់មក ត្រូវបានដាក់នៅក្រោម ការស៊ើបអង្កេតមួយ ពីបទពុករលួយ។

ជារៀងរាល់ពេល ដែលមានគ្រោះថ្នាក់ចរាចរណ៍ នៃរថយន្ដដ៏ទំនើបៗនោះ ជនជាតិចិន តែងសាកសួរចង់ដឹងថា តើឪម៉ែ​របស់យុវជន ដែលមានឡានបើកធំៗ សង្ហាទាំងនោះជានរណា។ ដូចអ្នកប្រើប្រាស់បណ្ដាញសង្គម វេបូ មួយរូប បានសួរ​ឡើងថា៖ «តើពួកវានេះ ឈ្មោះអី។ ឪម៉ែពួកវា ជានរណា?»។

ចំពោះគ្រោះថ្នាក់ចរាចរណ៍ កាលពីថ្ងៃសៅរ៍ សប្ដាហ៍មុន បានកើតឡើងនៅវេលាម៉ោង ១០យប់ នៅមុន២ម៉ោង នៃការ​ចាក់​បញ្ចាំង ជាផ្លូវការនូវភាពយន្ដអាមេរិក «Furious 7» ដែលទទួលបានការនិយមយ៉ាងខ្លាំង ពីបណ្ដាយុវជនចិន ជា​ពិសេស ទៅលើរថយន្ដដ៏ទំនើបៗ ដែលត្រូវបានយកថត នៅក្នុងភាពយន្ដ។ អ្នកប្រើប្រាស់បណ្ដាញសង្គមម្នាក់ទៀត បាន​សួរជាសំនួរទៀតថា៖ «តើពួកគេប្រញ៉ាប់ ទៅទស្សនា "Fast and Furious 7"ឬ?»

បើតាមគេហទំព័រព័ត៌មាន Sina របស់ចិន បានឲ្យដឹងថា អ្នកបើកបររថយន្ដទាំងពីរ ក្នុងនោះម្នាក់ជានិស្សិត បានផ្លែផ្កា​ដាក់​គ្នា មុននឹងឈានទៅបបួលគ្នា ប្រណាំងរថយន្ដទាំងពីរ ដែលមានលក្ខណៈយ៉ាងសាហាវ នៅតាមផ្លូវក្រោមដី ស្ថិតនៅ​មិន​ឆ្ងាយប៉ុន្មាន ពីពហុកីឡាដ្ឋានសម្បុកចាប របស់រដ្ឋធានីប៉េកាំង។ រីឯនគរបាលវិញ ដូចជាចង់បន្ធូរបន្ទុក មិនចង់​ឲ្យ​សង្គ្រាម​សម្ដីកើតមានខ្លាំង ដោយសាររថយន្ដទំនើបនោះ បានខំបិទបាំង ក្នុងជំហានដំបូង ដោយហៅរថយន្ដទាំងនោះ ថាគ្រាន់​ជារថយន្ដតូចធម្មតា សម្រាប់មនុស្សម្នារាល់គ្នាជិះប៉ុណ្ណោះ។

សូមបញ្ជាក់ដែរថា ក្នុងប្រទេសចិន រថយន្ដទំនើប ធុន Lamborghini មានតម្លៃប្រមាណជា ៧៥ម៉ឺនអ៊ឺរ៉ូ (ឬ៨០ម៉ឺនដុល្លារ) និងរថយន្ដទំនើប ធុន Ferrari មានតម្លៃប្រមាណជា ៤៧ម៉ឺនអ៊ឺរ៉ូ (ឬ៥០ម៉ឺនដុល្លា)៕