ហ៊ីឡារី គ្លីនតុន ប្រកាស​ឡើង​សៃវៀន ដណ្ដើម​តំណែង​«ប្រធានាធិបតី»

អ្នកស្រី ហីឡារី គ្លីនតុន (Hillary Clinton) បានប្រកាស កាលពីល្ងាចថ្ងៃអាទិត្យនេះ ថាអ្នកស្រីបានសម្រេចចិត្តឈរឈ្មោះ ជាបេក្ខនារីប្រធានាធិបតី នៃសហរដ្ឋអាមេរិក ដែលនឹងធ្វើការបោះឆ្នោត ជាសកល នៅឆ្នាំ២០១៦ខាងមុខ។ ជាមួយនឹងការប្រកាសនេះ យុទ្ធនាការឃោសនា រកសម្លេងគាំទ្រ ក៏បានចាប់ផ្ដើមហើយដែរ។
Loading...
  • ដោយ: សេក មនោរកុមារ អត្ថបទ ៖ សេក មនោរកុមារ ([email protected]) - ភ្នំពេញ ថ្ងៃទី ១២ មេសា ២០១៥
  • កែប្រែចុងក្រោយ: April 13, 2015
  • ប្រធានបទ: សេតវិមាន
  • អត្ថបទ: មានបញ្ហា?
  • មតិ-យោបល់

សមាជិកគណបក្សប្រជាធិបតេយ្យ អ្នកស្រី ហ៊ីឡារី គ្លីនតុន បានប្រកាសជាផ្លូវការហើយ នៅក្នុងវីដេអូមួយផ្សាយ នៅលើ គេហទំព័រផ្ទាល់ខ្លួនរបស់អ្នកស្រី ស្ដីពីបេក្ខនារីរបស់អ្នកស្រី ដើម្បីឈានទៅដណ្ដើមដំណែង ជាប្រធានាធិបតីសហរដ្ឋ​អាមេរិក ក្នុងឆ្នាំ២០១៦ខាងមុខនេះ បន្តពីលោក បារ៉ាក់ អូបាម៉ា ប្រធានាធិបតីចប់អាណត្តិ ដែលចេញពីគណបក្សតែមួយ​ដែរ​នោះ។

សេចក្ដីប្រកាសរបស់អ្នកស្រី ជាការប៉ុនប៉ង ឈានដណ្ដើមតំណែងនេះ ជាលើកទីពីរ បន្ទាប់ពីអ្នកស្រីបានទទួលសម្លេង​គាំទ្រ ចាញ់​លោក បារ៉ាក់ អូបាម៉ា កាលពីពេលបោះឆ្នោតជំហានដំបូង នៅក្នុងការជ្រើសរើសបេក្ខភាព ពីគណបក្ស​ប្រជា​ធិបតេយ្យ​នោះ។ ប្រសិនជាអ្នកស្រី មានវាសនាជាប់ទទួលបានតំណែងនេះមែននោះ អ្នកស្រីនឹងក្លាយ ជា​ប្រធានាធិបតី​អាមេរិក​ដំបូងគេ នៅក្នុងប្រវត្តិសាស្ត្រ នៃប្រទេសមហាអំណាចមួយនេះ ដែលមានភេទជាស្រី។

នៅក្នុងវីដេអូ ដែលបានបោះជំហាន ក្នុងការធ្វើយុទ្ធនាការ រកសម្លេងគាំទ្រ (ជំហានទីមួយ រកសម្លេងគាំទ្រ ពីក្នុង​គណបក្ស​សិន) នេះ គេឃើញមានការបង្ហាញ ជាដំបូង ពីពលរដ្ឋអាមេរិកធម្មតា និងស្ថិតក្នុងជីវភាពប្រចាំថ្ងៃ មុន​នឹង​អ្នកស្រី បាន​ចេញ​មកនិយាយ នៅចុងបញ្ចប់នៃវីដេអូ បញ្ជាក់ថា៖ «ខ្ញុំជាបេក្ខនារី សម្រាប់តំណែងប្រធានាធិបតី»។ អ្នកស្រី បាន​និយាយ​ទៀត​ថា៖ «ពលរដ្ឋអាមេរិកាំង ក្នុងពេលបច្ចុប្បន្ននេះ ត្រូវការស្ត្រីជើងឯកម្នាក់។ ខ្ញុំចង់ក្លាយ​ជាស្ត្រី​ជើង​ឯក​នេះ។ ខ្ញុំនឹងចុះទៅផ្ទាល់ (នៅជាមួយពលរដ្ឋ) ដើម្បីស្វែងរកការជឿទុកចិត្ត។»

អ្នកស្រី ជាបេក្ខនារីតែម្នាក់គត់ ដែលបានប្រកាសពីបេក្ខភាពរបស់ខ្លួន ជាផ្លូវការ នៃរបោះឆ្នោតជំហានដំបូង នៅក្នុង​គណបក្ស។ អ្នកស្រីធ្លាប់ជាអតីតស្ត្រីទីមួយ (ភរិយាអតីតប្រធានាធិបតី លោក ប៊ីល គ្លីនតុន) ធ្លាប់ជាសមាជិកព្រឹទ្ធសភា និងបានកាន់តំណែងជារដ្ឋមន្ត្រីការបរទេស នៅក្នុងរដ្ឋការរបស់លោក បារ៉ាក់ អូបាម៉ា ពេញមួយអាណត្តិមុន។ នៅក្នុង​ការស្ទង់មតិ ដែលបានធ្វើក្នុងពេលកន្លងមកនេះ បានបង្ហាញថា អ្នកស្រីទទួលបានសម្លេងគាំទ្រ យ៉ាងលើសលប់ ពីអ្នក​ស្មោះស្ម័គ្រ នឹងគណបក្សប្រជាធិបតេយ្យ។ មានសម្លេងគាំទ្រលើសគេ លើសទាំងលោក ចូ ប៊ីដេន (Joe Biden) ដែល​ជា​អនុប្រធានាធិបតី សព្វថ្ងៃនេះផង៕

» នេះជាវីដេអូដំបូង នៃការប្រកាសបេក្ខភាពជាផ្លូវការ របស់អ្នកស្រី ហ៊ីឡារី គ្លីនតុន៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...