ជនរងគ្រោះស្លាប់ នៅក្នុងអណ្ដាតភ្លើង យ៉ាងអាណោចអាធម រីឯជនរងគ្រោះខ្លះទៀតបានស្លាប់ នៅពេលពួកគាត់ទាំងនោះ លោត​គេចចេញពីអគ្គិភ័យ ទៅក្នុងលំហរ ...

អ្នកលត់អគ្គិភ័យ កំពុងធ្វើការគ្រប់គ្រង ទល់នឹងគ្រោះថ្នាក់នេះ។ រូបថត KEYSTONE។

អាជ្ញាធរក្នុងស្រុក បានរាយការណ៍ថា អគ្គិភ័យបានលេបត្របាក់ រោងចក្រកាត់ដេរមួយស្ថិតនៅជាយទីក្រុងដាការ ( Dacca) របស់ ប្រទេសបង់ក្លាដេស ហើយបានសម្លាប់យ៉ាងហោចណាស់ ១០៤នាក់ ដែលក្នុងនោះមានមនុស្សជាច្រើនបានលោតគេចចេញពីភ្លើង ទៅក្នុងលំហរទទេ។ តុល្យភាពចុងក្រោយនៃអ្នកស្លាប់ មានចំនួនតិចជាង ចំនួនដែលរាប់ភ្លាមៗ ដោយអ្នកសង្គ្រោះអគ្គិភ័យ ដែល ថាមានចំនួនដល់ទៅ១២១នាក់។

អ្នកចាត់ចែង គ្រប់គ្រងការលត់អគ្គិភ័យ លោក ម៉ាប៊ប់ (Mahbub) បានពន្យល់ប្រាប់ទីភ្នាក់ងារសារពត៌មានបារាំង អាអេហ្វប៉េថា «មានការភ័នច្រឡំ ក្នុងការរាប់ដល់ទៅពីរដង នូវចំនួនអ្នកស្លាប់ ដោយសារអ្នកធ្វើការងារក្នុងរោងចក្រជាច្រើនផ្នែក នៅតាមជាន់​នីមួយៗនៃអាគារ»។

កម្មករជាង១​០០០នាក់ បានជាប់នៅក្នុងរោងចក្រ

ភ្លើងបានឆាបឆេះឡើង ក្នុងថ្ងៃសៅរ៍ពេលយប់ជ្រៅ នៅផ្នែកជាន់ផ្ទាល់ដី របស់រោងចក្រតាស្រ៉េន ហ្វាសិន (Tazreen Fashion) មាន​ចម្ងាយ៣០គម ផ្នែកខាងជើងនៃទីក្រុងដាកា។ អ្នករួចរស់មានជីវិតបានរៀបរាប់ នៅថ្ងៃអាទិត្យស្អែកព្រឹកឡើង ថាពួកគេបានរត់គេច​ចេញ​ពីអណ្ដាតភ្លើងយ៉ាងដូចម្ដេច។

ស្រ្តីម្នាក់ឈ្មោះរ៉ូមេស្សា អាយុ៤២ឆ្នាំ កំពុងព្យាបាលនៅក្នុងមន្ទីពេទ្យ បានរំលឹកឡើងវិញពីហេតុការណ៍ដ៏គួរអោយតក់ស្លុត ហើយ​បាននិយាយថា «មានមនុស្សប្រមាណជា ១០០០នាក់ ជាប់នៅក្នុងរោងចក្រ។ (...) ខ្ញុំបានលោតពីជាន់ទីបួនមក ហើយបានមកទើរ​នៅលើដំបូលផ្ទះអាគារមួយទៀត ដែលមានកំពស់បីជាន់។ មនុស្សច្រើនណាស់ដែលធ្លាក់មក ហើយបានស្លាប់។»

មូលហេតុនៅមិនទាន់ស្គាល់ច្បាស់លាស់នៅឡើយ

រោងចក្រនេះផលិតសម្លៀកបំពាក់ ដើម្បីនាំចេញមកលក់ នៅប្រទេសលោកខាងលិច និងផលិតសម្លៀកបំពាក់អោយ ផ្លាកយីហោ​អន្តរជាតិធំៗ ដូចយ៉ាង C&A - Li & Fung ...។ លោកដែលវ៉ា​ អូសាន់ (Delwar Hossain) ជាម្ចាស់រោងចក្រ បាននិយាយប្រាប់​អ្នកកាសែតថា «ជាការបាត់បង់ដ៏ធំ សម្រាប់បុគ្គលិកកម្មករ និងរោងចក្ររបស់ខ្ញុំ។ ជាលើកទីមួយ ដែលខ្ញុំជួបគ្រោះអគ្គិភ័យ ពីក្នុង​ចំណោមរោងចក្រទាំង៧របស់ខ្ញុំ។»

មូលហេតុដែលឈានទៅដល់ការឆាបឆេះ នៅមិនទាន់ដឹងថាយ៉ាងដូចម្ដេចនៅឡើយ។ តែរោងចក្រជាច្រើន នៅប្រទេស​បង់ក្លាដេស បានផ្ទុកទុកនូវគំនរជាច្រើន​ នូវសម្លៀកបំពាក់ដែលត្រៀមទុកបំរុង សម្រាប់ការនាំចេញ តែមិនមានការរៀបចំអោយល្អ ខាងផ្នែក​ត​បណ្ដាញអគ្គិសនី និងផ្នែកសន្តិសុខបុគ្គលិកនោះទេ។

សូមរំលឹកឡើងវិញថា កាលពីពាក់កណ្ដាលខែកញ្ញា រោងចក្រមួយទៀតនៅការ៉ាឈី (Karachi) ទីក្រុងសេដ្ឋកិច្ចរបស់ប្រទេស ប៉ាគីស្តង់ ក៏បានរងឆេះដោយអគ្គិភ័យដែរ ហើយបានសម្លាប់កម្មករប្រមាណជា ៣០០នាក់៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី២៣ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ