នៅចំពោះមុខ ភាពមិនទុកចិត្តរបស់ គូរជម្លោះរបស់លោកហ្រ្វង់ស៊័រ ហ្វីយ៉ុង គឺលោកហ្សង់ ហ្វ្រង់ស៊័រ កូប៉េនោះ អ្នកសម្រុះសម្រួល លោកអាឡាំង ហ្សីប៉េ បានដោះដៃលែងរវីរវល់នឹង បញ្ហានេះបន្តទៀត។ រីឯលោក ហ្រ្វង់ស៊័រ ហ្វីយ៉ុង បានប្ដឹងទៅតុលាការ។ ជាជម្លោះ​ដែលមានជម្រៅកាន់តែជ្រៅទៅ ហើយអាចនឹងឈានទៅ សម្លាប់គណបក្សស្ដាំនិយមមួយនេះរបស់បារាំងទៀតផង។

លោក ហ្សង់ ហ្វ្រង់ស៊័រ កូប៉េ និងលោក ហ្វ្រង់ស៊័រ ហ្វីយ៉ុង។ រូបថត របស់គណបក្ស UMP។

សូមអានអត្ថបទមុនរបស់ មនោរម្យព័ងអាំងហ្វូ ដែលបានបកស្រាយពីជម្លោះនេះ និងដើមហេតុទាំងឡាយរបស់វា។

ការសម្របសម្រួល បានទទួលបរាជ័យ

ជំនួបរវាងគូជម្លោះទាំងពីរ នៅក្រោមការសម្របសម្រួល របស់លោកអាឡាំង ហ្សីប៉េ (Alain Juppé) បានបញ្ចប់ទៅ ដោយប្រើ​រយះពេលតែ៤៥នាទីប៉ុណ្ណោះ។ ប៉ុន្តែនៅក្រោយបន្ទាប់ពីកិច្ចប្រជុំនោះ អាជ្ញាកណ្ដាល ដែលជាចៅហ្វាយក្រុងប៊កដូផងនោះ បាន​ដោះដៃ​លែងរវល់ នឹងជម្លោះក្នុងបក្សនយោបាលរបស់លោកតទៅទៀត។ លោកបាននិយាយាក្នុងសេចក្ដីប្រកាសថា «លក្ខខ័ណ្ឌ​ទាំងឡាយដែលបានដាក់ចុះមក ដើម្បីការសម្របសម្រួលនេះ មិនត្រូវបានគេទទួលយកទាំងអស់ទេ»។

រីឯលោក ហ្រ្វង់ស៊័រ ហ្វីយ៉ុង (François Fillon) នៅក្នុងអត្ថបទអន្តរាគមរបស់លោកភ្លាមៗនោះ បានលើកឡើងជាអាថ៌ពី «កង្វល់​នឹងរកច្រកចេញ នៃភាពទាល់ច្រកមួយ ជាអ្វីដែល ហ្សង់ ហ្វ្រង់ស៊័រ កូប៉េ កំពុងពន្លិចគណបក្សរបស់យើងនោះ ខ្ញុំនឹងប្ដឹងឡើង​ទៅ​តុលាការ»។ ចំណែកខាងអ្នកស្និតនឹង លោកហ្សង់ ហ្វ្រង់ស៊័រ កូប៉េ (Jean-François Copé) វិញ បាននិយាយពី «និតិវិធីស្វែងរក​យុត្តិធម៌នៅក្នុងបក្ស ដែល​នឹងមិនត្រូវបានគេបង្អាក់ដំណើររបស់វាទេ៖ គណកម្មាធិការឧទ្ទរណ៍នៅតែធ្វើការរបស់ខ្លួន ជាធម្មតា»។

មតិអ្នកស្និតនឹងលោកហ្វីយ៉ុង និងអ្នកដែលស្និតនឹងអតីតប្រធានាធិបតី នីកូឡា ស្សាកូហ្សី បានងាកមកសម្លឹងរកមើល លោកអតីត​ប្រធានាធិបតី ដើម្បីចូលមកអន្តរាគមន៍ក្នុងជម្លោះនេះ។ តែគំនិតនេះ ត្រូវបានច្រានចោល ដោយក្រុមអ្នកស្និតនឹងលោក កូប៉េ។

ហ្សង់ ហ្វ្រង់ស៊័រ កូប៉េ ប្រធានគណបក្សអោយខាងតែបាន

ដូចអ្វីដែលលោក កូប៉េ ធ្លាប់និយាយាទៅកាន់អ្នកកាសែតយ៉ាងដូច្នេះ «ត្រឹមត្រូវហើយដែលថា ខ្ញុំជាអ្នកឈ្នះក្នុងការបោះឆ្នោតនេះ» ហើយជ័យជំនះនេះ ត្រូវបានបញ្ជាក់ជាថ្មី ដោយគណកម្មាធិការឧទ្ទរណ៍របស់គណបក្សថែមទៀត នៅរសៀលថ្ងៃច័ន្ទទី២៦​វិច្ឆិកា​ កន្លងមកនេះ។ តែជាការសម្រេច របស់គណកម្មាធិកាឧទ្ទរណ៍មួយ ដែលក្រុមលោកហ្វីយ៉ុងបានច្រានចោល និងបានចោទថា ជាការ​សម្រេចចិត្ត«មិនស្របច្បាប់» របស់ក្រុមគណកម្មាធិការ ដែល«ស្និតនឹងលោក កូប៉េ»។

បន្ទាប់ពីការសម្រេចរបស់ គណកម្មាធិការឧទ្ទរណ៍នេះ លោក កូប៉េ បានចេញសេចក្ដីប្រកាសមួយ កាលពីយប់ថ្ងៃច័ន្ទដដែល ដើម្បី «ការបង្រួបបង្រួម»គណបក្ស ហើយបានបញ្ជាក់ថា គណបក្សត្រូវការលោក ហ្វីយ៉ុង។ ជាការអំពាវនាវ ដែលធ្វើអោយគេស្រមៃថា លោកកូប៉េ កំពុងបើកដៃទៅរកគូជម្លោះ និងប្រហែលអាចហៅបាន នូវអ្នកដែលស្និតនឹងលោក ហ្វីយ៉ុង ម្នាក់ឬពីរនាក់ មកចូលរួមជា​មួយនឹងលោក។ តែអ្នកវិភាគបានពន្យល់ថា ទាំងនេះ​ គឺដើម្បីបញ្ចេញនូវរូបភាព នៃ«ការផ្សះផ្សារគណបក្ស» របស់លោកកូប៉េ។

ដំណោះស្រាយតាមតុលាការ

ជាដំណើររឿងមួយវែងឆ្ងាយ និងត្រូវប្រើរយះពេលយូរ។

ដូចទៅនឹងអ្វី ដែលលោកបាននិយាយទុកជាមុនមកហើយ លោកហ្វ្រង់ស៊័រ ហ្វីយ៉ុង បានដាក់ពាក្យបណ្ដឹងមួយទៅតុលាការ នៅ​ព្រឹក​ថ្ងៃច័ន្ទ ហើយក្រោយបន្ទាប់មក មានការស្នើសុំដោយតុលាការ អោយប្រមូលទុកឯកសារទាំងឡាយ ដែលទាក់ទងនឹងការបោះឆ្នោត កន្លងមកនេះ។ តែអ្វីៗមិនដូចជាព្រៀងទុកនោះទេ ព្រោះខាងគណបក្ស បានស្នើសុំអោយតុលាការពន្យាពេលនិតិវិធី នៃការប្រមូល​ឯកសារនេះ។

អ្នកវិភាគបាននិយាយថា ដំណោះស្រាយតាមផ្លូវតុលាការ នឹងគ្មានផលល្អ សម្រាប់ភាគីជម្លោះទាំងសងខាង និងសម្រាប់​គណបក្ស​នោះទេ  ព្រោះច្រើនណាស់ តុលាការបានត្រឹមបង្គាប់អោយ ធ្វើការបោះឆ្នោតឡើងវិញតែប៉ុណ្ណោះ។ ជាពិសេសទៅទៀត ក្នុងពេល​រងចាំការសម្រេចរបស់តុលាការនេះ លោកហ្វ្រង់ស៊័រ ហ្វីយ៉ុង ក៏គួរតែយល់ដែរថា លោកហ្សង់ ហ្វ្រង់ស៊័រ កូប៉េ​ នឹងនៅជាប្រធាន​គណបក្សដដែល។ ដូច្នេះដំណោះស្រាយតាមផ្លូវតុលាការ មិនមែនជាជម្រើសមួយ ដែលល្អជាងដំណោះស្រាយ តាមផ្លូវនយោបាយ នោះទេ។

ការបោះឆ្នោតឡើងវិញ ជាជម្រើសមួយ

សម្រាប់អ្នកស្និតនឹងលោកហ្វីយ៉ុង និងអ្នកនិយមកណ្ដាល ការបោះឆ្នោតឡើងវិញ ជាជម្រើសតែមួយ សម្រាប់បញ្ចប់ជម្លោះ។​ ​អតីត​ប្រធានាធិបតី លោកនីកូឡា ស្សាកូហ្សី ក៏លើកឡើងដែរ ថាការបោះឆ្នោតឡើងវិញ ជា«ជម្រើសដែលល្អជាងគេ»។ តែជាជម្រើស ដែលខាងលោកកូប៉េ វាយតម្លៃថា «គ្មានភាពទទួលខុសត្រូវ ខាតពេលវេលា និងខាតប្រាក់»​។

ភាពទ័លច្រក ដែលអាចនឹងបំបែកគណបក្ស សម្ព័ន្ធចលនាប្រជាជន (UMP) ជាពីរ។ នៅព្រឹកថ្ងៃអង្គារទី២៧វិច្ឆិកានេះ ក្រុមអ្នកស្និត​នឹងលោក ហ្វីយ៉ុង នឹងប្រជុំគ្នានៅសភាជាតិ ដើម្បីនឹងជជែកប្រមើលមើល ពីជម្រើសដែលពួកខ្លួន ត្រូវរើសយក។ ជម្រើសដែលអាច​ផ្ដល់ ផលអវិជ្ជមានដល់គណបក្ស៕