ជនសកម្មប្រយុទ្ធច្រើនរយនាក់ របស់រដ្ឋអ៊ីស្លាម កំពុងប្រឈមនឹងជំងឺសើរស្បែក តែមានលក្ខណៈរាតត្បាត ដ៏​សាហាវ​មួយ។ នេះបើតាមប្រភពជាច្រើន ដែលត្រូវបានដកស្រង់ ដោយសារព័ត៌មាន 7sur7 នៃប្រទេសប៊ែលហ្សិក។ ជំងឺនេះ ហៅ​​តាមភាសាបច្ចេកទេសបារាំងថា Leishmaniose ដែលបង្កឡើងដោយមេរោគមួយ ហៅថា Leishmania infantum។

ការចម្លងជំងឺដ៏រង្គាល ត្រូវបានគេដឹងថា បណ្ដាលមកពីសត្វមូស នៃសមុទ្រខ្សាច់ ដែលមានរូបរាងតូចមួយ។ រោគសញ្ញា​ដំបូង បានធ្វើឲ្យនៅលើសាច់ មានស្នាមកន្ទួល និងរមាស់ ប៉ុន្តែវាអាចនឹងក្លាយជាដំបៅរលាក បង្កជាខ្ទុះស៊ីចូល​ទៅក្នុង​សាច់។ ជនរងគ្រោះមួយចំនួន ដែលមានជំងឺនេះ បានស្លាប់បាត់បង់ជីវិត។

ស្ថានភាពអនាម័យ ដ៏គួរឲ្យបារម្ភ នៅក្នុងភាគខាងកើត នៃប្រទេស៊ីរី  បន្ទាប់ពីសង្គ្រាមរាំងជល រាប់សិបឆ្នាំ ទំនងជា​បាន​ជួយឲ្យជំងឺនេះ ពង្រីកឥទ្ធិពលរបស់វាឡើង។ ទីក្រុង រ៉ាកា (Raqqa) ដែលជាបន្ទាយកងទ័ព របស់ក្រុមស្ម័គ្រប្រយុទ្ធ​ឥស្លាម ត្រូវបានគេរាយការណ៍មកថា បានរងការប៉ះពាល់ខ្លាំងជាងគេ។

ជំងឺកំពុងដើររាតត្បាតខ្លាំងឡើង...ក្រុមគ្រូពេទ្យគ្មានព្រំដែន បានព្យាយាមប្រកាសអាសន្ន និងចង់ចូលទៅជួយ​យក​អាសារ តែត្រូវបានក្រុមស្ម័គ្រប្រយុទ្ធ ឥស្លាមនិយមជ្រុលទាំងនោះ បដិសេធ។ គិលានុបដ្ឋានក្នុងតំបន់ មួយចំនួនធំ ត្រូវ​បានបិទ ហើយក៏កម្រមានគ្រូពេទ្យណា ដែលមានលទ្ធភាពព្យាបាល ជំងឺនេះបាននោះដែរ។

នៅក្រុងរ៉ាកា ក្រុមកងទ័ពស្ម័គ្រប្រយុទ្ធ របស់ព្រះអាឡាហ៍ មានចំនួនប្រមាណ ពី៣០០០ ទៅ៥០០០នាក់ ដែលស្ថិត​ក្រោម​បញ្ជាការរបស់ រដ្ឋអ៊ីស្លាម។ កាលពីពេលកន្លងទៅនេះ អង្គការសុខភាពពិភពលោក (OMS) ក៏បានព្រមានដែរ ពី​ការ​ធ្លាក់ចុះទាំងស្រុង នៃស្ថានភាពពិនិត្យព្យាបាលរោគ នៅក្នុងតំបន់មួយចំនួន នៃរដ្ឋអ៊ីស្លាម។ ករណីទាំងអស់នេះ បាន​ធ្វើឲ្យ ការរាតត្បាតរោគដ៏សាហាវមួយនេះ អាចពង្រីកខ្លួន បានកាន់តែខ្លាំង ហើយក៏ជាអ្វី ដែលកំពុងកើតឡើង ក្នុងពេល​បច្ចុប្បន្នដែរ៕