ទូរទស្សន៍ជាតិបារាំង TV5 Monde ដែលផ្សព្វផ្សាយជាភាសាបារាំង មានលក្ខណៈអន្តរជាតិ (ផ្សាយចេញ ទៅច្រើន​ជាង​២០០ប្រទេស ក្នុងពិភពលោក) និងមានទីស្នាក់ការ នៅរដ្ឋធានីប៉ារីស អាចត្រឡប់ មកធ្វើការផ្សាយ កម្មវិធីរបស់ខ្លួនឯង​វិញបានហើយ នៅព្រឹកថ្ងៃព្រហស្បត្តិ៍នេះ។ ប៉ុន្តែនៅមានកម្មវិធីមួយចំនួនទៀត នៅរងភាពរអាក់រអួលនៅឡើយ។ នេះ​បើ​តាម​​ការ​ប្រកាស របស់នាយកគ្រប់គ្រងកម្មវិធី របស់ស្ថានីយ៍ទូរទស្សន៍ លោក អង់ដ្រេ ក្រេតឺណង់ (André Crettenand)។

ស្ថានីយទូរទស្សន៍ ដែលផ្សាយចេញ មាន១១ប៉ុស្ដ៍ បានត្រឡប់មកផ្សាយ កម្មវិធីរបស់ខ្លួនឡើងវិញ នៅវេលាម៉ោង​១០​ព្រឹក ថ្ងៃព្រហស្បត្តិ៍ទី០៩ ខែមេសានេះ បន្ទាប់បានស្ថិតក្នុង«អេក្រង់ពណ៌ខ្មៅ» អស់រយៈពេលជាច្រើនម៉ោង រាប់ចាប់តាំង​ពី​ការ​វាយ​ប្រហារ តាមប្រព័ន្ធព័ត៌មានវិទ្យា ពីសំណាក់ក្រុមមួយ ដែលប្រកាសខ្លួនថា ជាសមាជិករដ្ឋអ៊ីស្លាម។ លោក អង់ដ្រេ ក្រេតឺណង់ បានថ្លែងឲ្យដឹងទៀតថា កម្មវិធីជាច្រើន ដែលគ្រប់គ្រង ដោយប្រព័ន្ធព័ត៌មានវិទ្យា ត្រូវបានរងគ្រោះ នឹង​ការ​វាយ​ប្រហារ។

នាយកស្ថានីយ៍ទូរទស្សន៍ លោក អ៊ីវ ប៊ីស៊ូត៍ (Yves Bigot) បានថ្លែងពន្យល់ថា នៅមុនអាធ្រាតថ្ងៃពុធ ចូលមកថ្ងៃ​ព្រហស្បត្តិ៍ ទូរទស្សន៍ជាតិបារាំង TV5 Monde ត្រូវបានរំខាន លែងអាចធ្វើការផ្សព្វផ្សាយកម្មវិធីរបស់ខ្លួន ដូចធម្មតា។ គេហទំព័រ និងទំព័រផ្លូវការ នៅបណ្ដាញសង្គម បានរងនូវការវាយលុក ដោយយុទ្ធនាការដ៏ធំមួយ។ លោក អ៊ីវ បាន​និយាយ​ថា៖ «យើងលែងអាចគ្រប់គ្រង គេហទំព័រ និងទំព័រនានា នៅលើបណ្ដាញសង្គមបានទៀត ហើយ​នៅគ្រប់​អន្តរ​បណ្ដាញ​របស់យើង បានចេញផ្សាយតែ សាររបស់ក្រុមសមាជិករដ្ឋអ៊ីស្លាម»។

លោក អ៊ីវ បានអះអាងថា ស្ថានីយ៍អាចនឹងធ្វើការផ្សាយកម្មវិធីរបស់ខ្លួនឡើងវិញបន្តិចម្ដងៗ នៅក្នុងតំបន់មួយចំនួន ប៉ុន្តែ​បណ្ដាញផ្សព្វផ្សាយរបស់ទូរទស្សន៍ អាចនឹងជួបបញ្ហាជាបន្ត ដោយការវាយប្រហារមួយ ដែលមាន«កម្លាំង​ខ្លាំង​ក្លា»​នេះ។ លោកបានបន្តថា ការវិលត្រឡប់មករកភាពធម្មតាវិញ អាចមានរយៈពេលច្រើនម៉ោង ឬអាចឈានទៅ​ដល់​ច្រើន​ថ្ងៃ។

នាយកគ្រប់គ្រងកម្មវិធី លោក អង់ដ្រេ បានថ្លែងឲ្យដឹងបន្ថែមថា ស្ថានីយទូរទស្សន៍ មិនដឹងនឹកស្មានថា អាចនឹងរង​គ្រោះដោយការវាយប្រហារ តាមប្រព័ន្ធព័ត៌មានវិទ្យា ដល់កម្រិតនេះឡើយ។ លោកបានពន្យល់ថា៖ «យើងមាន​ប្រព័ន្ធ​ការពារសុវត្ថិភាព ដែលមានលក្ខណៈរឹងមាំជាទីបំផុត។ ដូច្នេះវាច្បាស់ណាសហើយថា ក្រុមដែលធ្វើការវាយប្រហារនេះ មានជំនាញខាងបច្ចេកវិទ្យាខ្ពស់ខ្ពស់ណាស់។»៕