បញ្ហាគ្រោះភ័យ នៅក្នុងអាកាស ចេះតែបន្តមាន មិនចេះអស់។ នៅថ្ងៃចន្ទ ទី៣០ ខែមីនានេះ ប្រព័ន្ធផ្សព្វផ្សាយ របស់​ប្រទេសទួរគីរ និងរបស់ប្រទេសអាមេរិក បានរាយការណ៍ថា យន្ដហោះប៊ូអីង (Boeing 777) មួយគ្រឿង ដែលហោះភ្ជាប់ ក្រុងអ៊ីស្តមប៊ួល (Istanbul ប្រទេសទួរគី) ឆ្ពោះទៅកាន់ក្រុង សាវប៉ាវឡូ (Sao Paulo ប្រទេសប្រេស៊ីល) បានបង្ខំចិត្ត ងាក​ចេញពីផ្លូវហោះហើរ របស់ខ្លួន ដើម្បីទៅចុះចតជាបន្ទាន់ នៅព្រលានយន្ដហោះ ក្រុងកាសាប្លងកា ក្នុងប្រទេសម៉ារ៉ុក បន្ទាប់​ពី​ទទួលដំណឹងថា មាន«គ្រាប់បែក»។

យន្ដហោះបានបញ្ជូនសញ្ញាអាសន្ន មុននឹងងាកខ្លួន ចេញពីផ្លូវហោះហើរ ឆ្ពោះទៅរកការចុះចត។ បើតាមគេហទំព័រ emergency.airlive.net បាននិយាយថា យន្ដហោះបានបន្ទាបខ្លួន ជាងកំពស់ធម្មតាដែលខ្លួនហោះ ប្រមាណជា ១០០០​ម៉ែត្រ តែក្នុងប៉ុន្មាននាទីប៉ុណ្ណោះ។ អ្នកសារព័ត៌មានរបស់ទីភ្នាក់ងារ រ៉យទ័រ (Reuters) ប្រចាំនៅក្រុង អ៊ីស្តមប៊ួល លោក ហំម៉ៃយ៉ា ផាមុខ (Humeyra Pamuk) បានថ្លែងឲ្យដឹងថា បុគ្គលិកបម្រើការលើយន្ដហោះ ទំនងជាបានរកឃើញ ការគម្រាមមួយ ទាក់ទងនឹង«គ្រាប់បែក»។ ក្រដាសមួយសន្លឹក ត្រូវបានរកឃើញ នៅក្នុងយន្ដហោះ ដោយមាន​សរសេរ​ពីលើថា «គ្រាប់បែក»។

មេបញ្ជាការបើកបរ យន្ដហោះ ដែលមានផ្ទុកមនុស្ស២៥០នាក់ បានព្យាយាមទាក់ទង មកអាជ្ញាធរនៃប្រទេសម៉ារ៉ុក ដើម្បី​ដឹងពីព័ត៌មាននេះ តែមិនមានចម្លើយ ឲ្យដឹងភ្លាមៗទេ។

យន្ដហោះ បានចុះចតនៅព្រលានយន្ដហោះ ក្រុងកាសាប្លងកា ដោយគ្មានហេតុភេទអ្វី ឲ្យកត់សម្គាល់ទេ។ អ្នកដំណើរ​ទាំងអស់ ត្រូវបានជម្លៀសចេញ ទៅរកទីកន្លែងសុវត្ថិភាព ដើម្បីទុកឲ្យមន្ត្រីត្រួតពិនិត្យយន្ដហោះ ធ្វើការឆែកឆេរ គ្រប់​កន្លែង​ទាំងអស់ ក្នុងយន្ដហោះ។

បន្ទាប់ពីមិនបានរកឃើញអ្វីចម្លែក នៅក្នុងយន្ដហោះនោះរួច អាជ្ញាធរម៉ារ៉ុក បានអនុញ្ញាតឲ្យយន្ដហោះ ប៊ូអ៊ីង ងើបហោះ​ជាថ្មី បន្តផ្លូវហោះហើររបស់ខ្លួន ឆ្ពោះទៅកាន់ប្រទេសប្រេស៊ីល។ គ្រាន់តែក្នុងរយៈពេល ពីរថ្ងៃជាប់គ្នា ក្រុមហ៊ុនអាកាស​ចរណ៍​​មួយនេះ ទទួលបានការគម្រាម ចំនួនពីរដង។ ការគម្រាមលើកមុន គឺនៅថ្ងៃអាទិត្យ ទី២៩ ខែមីនាម្សិលម៉ិញ ដោយ​បានទទួល ការ​គម្រាម​ប្រហាក់​ប្រហែលគ្នា ទៅលើជើងហោះហើរមួយ ដែលភ្ជាប់ក្រុង អ៊ីស្តមប៊ួល ទីកាន់រាជធានី តូក្យូ ប្រទេស​ជប៉ុន៕