បើប្រៀបធៀប ទៅនឹងប្អូនស្រីបង្កើត អាយុប្រាំឆ្នាំ ដែលមានទម្ងន់ ជាង១០គីឡូក្រាម ទៅហើយនោះ កុមារា យឿន សំណាង ជាកូនច្បងអាយុ១០ ពីគ្រួសារដែលមានបងប្អូន២នាក់ មានទំងន់តែ ២គីឡូក្រាមប៉ុណ្ណោះ។ កុមារា ដែល​មាន​កាយសម្បទារមិនប្រក្រតីនេះ រស់នៅក្នុងភូមិព្រៃមាន់ ឃុំឬស្សីស្រុក ស្រុកពាមជរ ខេត្តព្រៃវែង។ ហើយ​រហូតមកដល់​ពេលនេះ កុមារាដ៏កំសត់ មិនទាន់អាចដើរបាន ឬមានសកម្មភាពអ្វី ដោយខ្លួនឯង បាននៅឡើយ ដោយអ្វីៗគ្រប់យ៉ាង ត្រូវបានអ្នកម្តាយ និងប្អូនស្រី ជាអ្នកមើលថែ និងធ្វើជំនួសទាំងអស់។

អ្នកស្រី កេង ចាន់គា ជាម្តាយក្នុងវ័យ៤៧ឆ្នាំ បានប្រាប់ឲ្យទស្សនាវដ្តីមនោរម្យ.អាំងហ្វូដឹងថា ក្នុងជីវិតអាពាហ៍​ពិពាហ៍​គាត់ មានកូនពីរនាក់ កូនប្រុសច្បងឈ្មោះ យឿន សំណាង ខាងលើ ជាក្មេងចម្លែក មានរូបរាងតូចខុសធម្មតា ឯកូន​ទីពីរ​ជាកូនស្រីឈ្មោះ យឿន ចាន់គីម អាយុ៥ឆ្នាំ មានកាយសម្បទា ដូចក្មេងស្រីទូទៅធម្មតា។ អ្នកស្រីបញ្ជាក់ថា សព្វថ្ងែអ្នក​ស្រីនៅតែបន្តមើលថែ សំណាង ទោះជាមានជីវភាពខ្វះខាតក៏ដោយ។ រហូតមកដល់ពេលនេះ អ្នកស្រីប្រាប់ថា កុមារា​ខាង​លើ គ្រាន់តែអាចនិយាយបានប៉ុណ្ណោះ តែមិនអាចធ្វើចលនាបាន ដូចក្មេងទូទៅទេ ទោះជាមានជើងដៃគ្រប់គ្រាន់​ក៏​ដោយ។

ប្រពន្ធកសិករខាងលើ បានឲ្យទស្សនាវដ្តី ដឹងទៀតថា កូនប្រុសរបស់គាត់ មានសភាពបែបនេះ តាំងពីកំណើតមកម្លេះ ហើយគ្រូពេទ្យមិនបានបញ្ជាក់ថាកូន អ្នកស្រីមានជំងឺអ្វីនោះទេ។ អ្នកស្រីបន្តថា មានការហត់នឿយខ្លាំង នៅពេលមើល​ថែ​កូនម្នាក់នេះ ពេលខ្លះ មិនទាំងមានទ្រព្យធន់អ្វី នៅក្នុងគ្រួសារផង ព្រោះបានចំណាយ ដើម្បីព្យាបាលកូន។ អ្នកស្រី​បានរៀបរាប់ថា គ្រួសារអ្នកស្រីខ្វះខាត ព្រោះជាកសិករ ឆ្នាំណាធ្វើស្រែបានមិនអីទេ តែឆ្នាំខ្លះគ្មានអ្នកស្រី និងកូនតូច ហាក់​គ្មាន​អ្វី​ទីពឹង៕