ហ៊ុន សែន ថា មីឆែល អូប៉ាម៉ា មក​«បំផើម»​កូន​ខ្មែរ​នៅ​កម្ពុជា

នាយករដ្ឋមន្រ្តីកម្ពុជា បានផ្ញើរសារទៅកាន់អ្នកស្រី មីស្សែល អូប៉ាម៉ា បន្ទាប់ពីលោកស្រី បានមកធ្វើទស្សនកិច្ចវប្បធម៌ នៅកម្ពុជា ចំនួនបីថ្ងៃ កាលពីថ្មី២នេះថា បើបំណាច់នឹងដាក់ចិត្តជួយកូនខ្មែរ ក្នុងខេត្តសៀមរាប ទាំង១០នាក់នោះ ត្រូវជួយឲ្យចប់ យ៉ាងហោចណាស់១០ឆ្នាំ បន្ទាប់ពីចូលវិទ្យាល័យ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញថ្ងៃទី២៥ មីនា ២០១៥
  • កែប្រែចុងក្រោយ: March 25, 2015
  • ប្រធានបទ: នយោបាយ
  • អត្ថបទ: មានបញ្ហា?
  • មតិ-យោបល់

បើទោះជា បានលើកសសើរ បេសកកម្ម របស់ស្ត្រីទីមួយអាមេរិកនេះ ថាបានល្អយ៉ាងណាក៏ដោយ តែលោក ហ៊ុន សែន មិនបានទុកឱកាសនេះ ឲ្យកន្លងផុត ក្នុងការសម្ដែងការហួសចិត្ត ចំពោះដំណើរទស្សនកិច្ចរបស់អ្នកកស្រី មីឆែល អូបាម៉ា ដែលបានជ្រើសរើសសិស្ស ក្នុងខេត្តសៀមរាបចំនួន១០នាក់ តែបែរជាបានដាក់បន្ទុកនេះ មកលើលោក​ជា​អ្នក​ឧបត្ថម្ភ​ទៅវិញ។

ថ្លែងក្នុងពិធីចែកសញ្ញាបត្រដល់ និស្សិត គរុកោសល្យ បរិញ្ញាបត្របូក១ បរិញ្ញាបត្របូក២ នៅវិទ្យាស្ថាន ជាតិអប់រំ នា​ព្រឹក​ថ្ងៃទី២៥ ខែមីនា ឆ្នាំ២០១៥នេះ លោក ហ៊ុន សែន នាយករដ្ឋមន្រ្តីកម្ពុជា បានថ្លែងចំអកដាក់អ្នកស្រី មីឆែល អូបាម៉ា ថា៖ «ខ្ញុំស្មានតែអាមេរិក គាត់ឲ្យអាហារូបករណ៍ក្មេងៗ រៀនដល់មហាវិទ្យាល័យ... អត់។ ខ្ញុំខំប្រឹង សង្ឃឹមមាំណាស់។ (…) ខ្ញុំនឹកស្មានថា សហរដ្ឋអាមេរិកហ្នឹង ជួយក្មួយៗ រៀនដល់ចប់មហាវិទ្យាល័យ។ »

ការបញ្ជាក់របស់លោកនាយករដ្ឋមន្រ្តី យ៉ាងដូច្នេះ បន្ទាប់ពីលោកទទួលបានលិខិតមួយច្បាប់ ពីរដ្ឋមន្រ្តីក្រសួងអប់រំ លោក ហង់ ជួនណារ៉ុន ដោយស្នើសុំអាហារូបករណ៍ នៅសាលារដ្ឋ ស្នើសុំកន្លែងស្នាក់នៅរបស់សិស្ស (អន្តោវាសិក​ដ្ឋាន) និងស្នើសុំអាហារូបករណ៍ពី លោក (ហ៊ុន សែន) ឲ្យជួយចិញ្ចើមជាដើម។

ជាមួយនឹងរបាយការណ៍ខាងលើនេះ លោកនាយករដ្ឋមន្រ្តីកម្ពុជា ក៏នសុំបញ្ជាក់ត្រឡប់ ទៅកាន់អ្នកស្រី មីឆែល អូបាម៉ា វិញថា កុំឲ្យមានការព្រួយបារម្ភ ពីករណីនេះឲ្យសោះ ព្រោះលោក និងភរិយា បានដោះស្រាយរួចរាល់ហើយ។ លោក​លើក​ឡើង ដោយហួសចិត្តថា៖ «ចឹងគាត់មក បានត្រឹមតែរើសមនុស្ស ហើយបោះមកឲ្យក្រសួងអប់រំ (ជាអ្នកទទួល) ដដែល។ យុទ្ធនាការគាត់ល្អ តែខ្ញុំសុំផ្តល់មតិ សុំឲ្យអាមេរិកជួយចប់ចុងចប់ដើម។ កុំលេងធុននេះ ដើរបំផើមចោល។ (…) នេះរើស១០នាក់ ចុះបើគាត់រើស៥០០នាក់ វាមិនងាប់ ខ្ញុំមានលុយណាឲ្យ។ (…) នេះខ្ញុំនៅជានាយករដ្ឋមន្រ្តី ចុះ​បើ​ខ្ញុំ​ឈប់ធ្វើ តើក្មេងទាំងនោះ នឹងទៅជាយ៉ាងណា?»

មិនត្រឹមតែអ្នកស្រី មីឆែល អូបាម៉ា ប៉ុណ្ណោះទេ តែលោក ហ៊ុន សែន បានផ្ញើសារ ទៅកាន់ស្ថានទូតអាមេរិក​ប្រចាំនៅ​កម្ពុជា និងអង្គការយូអេសអេអាយឌី (USAID) ដោយសុំកុំឲ្យ«លេងធុនបែបនេះ» កុំចេញតែដើររើស ហើយមិនអាច​រុញ​ឡើងបាន បែរជាមកបន្ទោសរដ្ឋាភិបាល ថា«មិនកើត»។

លោក ហ៊ុន សែន បានថ្លែងទៀតថា៖ «បើចង់ជួយ ជួយម៉ាចប់ កុំលេងដើរបំផើមចោល ពាក់កណ្តាល។ យ៉ាងហោច​ណាស់ បើរើស១០នាក់ តាំងពីរវិទ្យាល័យ រហូតដល់បញ្ចប់មហាវិទ្យាល័យ បណ្តោយទៅ។ សំណាងគាត់រើសបាន១០ ចុះបើគាត់រើស៥០០ ឲ្យយើង វាមិនស្លាប់។ បើចឹងគាត់បានត្រឹមតែមាននាទីដើររើស។ (…) បើថាធ្វើ ធ្វើឲ្យចប់ពី៦ឆ្នាំ កើន​ទៅ១០ឆ្នាំ បើមិនចឹងងាប់។ ខ្ញុំសម្រេចទទួលយកត្រឹមតែ១០នាក់ ដែល មីឆែល អូប៉ាម៉ា និងប្រពន្ធខ្ញុំ។ (…) ជួយអ្វី ជួយ​ឲ្យប្រាកដ។»

លោក ហ៊ុន សែន បានរំលឹក និងផ្ញើរសារ ទៅប្រធានាធិបតីអាមេរិកថា លោក បារ៉ាក់ អូបាម៉ា ប្រហែលជាមិនទាន់ដឹង​នៅឡើយ ពីការដើរ«បំផើមចោល»របស់ អង្គការរបស់អាមេរិក នៅកម្ពុជា។ លោកលើកឡើងថា កាលពី​ជំនាន់​ផ្អើល រឿងជំងឺផ្តាសសាយបក្សី ស្រាប់តែអង្គការសុខភាពពិភពលោក បានមកបបួលលោក ឲ្យសម្លាប់មាន់ទូទាំង​ប្រទេស ដោយ​​ជួយចេញ នូវចំណាយទាំងនោះ។ លោកបន្តថា អាចធ្វើបាន ទាល់តែអង្គការនេះ បានដាក់ថវិកាតម្កល់ នៅក្នុង​ធនាគារ​កម្ពុជា រាប់ពាន់លានដុល្លារ ទើបអាចទៅរួច។ លោកបន្ថែមរឿងមួយទៀត ដូចជាអង្គការស្បៀង អាហារ​ពិភពលោក មិន​បាន​ទិញ​អង្គរកម្ពុជាទេ តែមកខ្ចី រួចហើយក៏បានយកអង្ករនោះ មកជួយក្មេងកម្ពុជា ហើយប្រកាស យក​គុណ​សម្បត្តិ របស់​អង្គការ​ខ្លួនទៅវិញ។

លោក នាយករដ្ឋមន្រ្តី បានលើកនូវឧទាហរណ៍មួយទៀតថា ដែលទំនងជាចង់បង្អាប់ខ្លួនឯងផងដែរថា ធនាគារ​ពិភពលោក (WB) ផ្តល់កម្ចីឲ្យលោក នូវអាហារូបករណ៍សម្រាប់សិស្ស និសិ្សត តែលោកចង់បានជាសាលារៀន។ លោក​បញ្ជាក់ថា ករណីនេះ លោកមិនទទួលយកឡើយ។ លោកបានថ្លែងឲ្យធនាគារពិភពលោកថា៖ «ខ្ញុំចង់ខ្ចីលុយ​គាត់ធ្វើ​សាលា គាត់ថាអត់ទេ ឲ្យខ្ចីសម្រាប់ធ្វើ​អាហារ​រូបករណ៏។ (…) បើអត់សាលារៀន តើលោកឲ្យអាហារូបករណ៍ តើឲ្យកូន​សិស្ស ទៅរៀននៅឯណា?។ (…) បើខឹងមិន​ចាំ​បាច់ខ្ចីទេ បើអត់មានសាលា ឲ្យក្មេងរៀនផងយកមកធ្វើអី?»

សូមបញ្ជាក់ដែរថា អង្គការសុខភាពពិភពលោក និងអង្គការស្បៀងអាហារពិភពលោក មិនមែនជាស្ថាប័ន ស្ថិត​ក្រោយ​រដ្ឋបាលអាមេរិកទេ តែជាស្ថាប័នប្រតិបត្តិ តាមគោលការណ៍មនុស្សធម៌ របស់អង្គការសហប្រជាជាតិ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...