សមត្ថភាពពិតប្រាកដ របស់កីឡាការិនី ស៊ន សៀវម៉ី និងអ្នកគ្រូ នាង ផល្លា បានធ្វើឱ្យអន្តរជាតិ ដែលពីមុនធ្លាប់គិត ថា​ប្រទេសកម្ពុជា ជាប្រទេសទន់ខ្សោយ មានការភ្ញាក់ផ្អើល។ ភ្ញាក់ផ្អើល ដោយសារតែអ្នកទាំងពីរ បានធ្វើ​ឱ្យ​ពិភពលោក​ដឹងថា កម្ពុជា មានសម្បូរទៅដោយ អ្នកមានទេពកោសល្យ មិនខ្វះឡើយ។

ព្រឹត្តិការណ៍កីឡាថ្នាក់អាស៊ី ដ៏ភ្ញាក់ផ្អើល ដែលកម្ពុជាបានខកខាន មិនទទួលបានមេដាយមាស អស់រយៈពេល ជាង​៤០ឆ្នាំ មកហើយនោះ តែកាលពីខែតុលា ឆ្នាំ២០១៤ កន្លងមក នៅក្នុងការជួបប្រកួត កីឡាអាស៊ីលើកទី១៧ ដែល​រៀប​ចំ​ឡើង នៅប្រទេស កូរ៉េខាងត្បូង កញ្ញា ស៊ន សៀវម៉ី បានធ្វើឱ្យកម្ពុជា ងើបមុខឡើងវិញ ដោយដណ្ដើមបាន មេដាយ​មាស ខាងវិញ្ញាសារ តៃខ្វាន់ដូ ពីក្នុងចំណោមប្រទេសចំនួន៤៥។

ជ័យជម្នះ របស់ ស៊ន សៀវម៉ី បាននាំឱ្យកម្ពុជា ទទួលឡើង មកកាន់ចំណាត់ថ្នាក់ ទី២៧ ពីក្នុងចំណោម ៤៥ ប្រទេស​ផ្សេង​ទៀត សម្រាប់ព្រឹត្តិការណ៍កីឡាអន្តរជាតិនេះ។ កញ្ញា ស៊ន សៀវម៉ី ត្រូវបានប្រជាពលរដ្ឋខ្មែរ ប្រសិទ្ធនាម​ឈ្មោះ​ឱ្យថា ជាវីរៈនារី ដែលធ្វើឱ្យកម្ពុជា ល្បីលើឆាកអន្តរជាតិ និងជាវិរនារីខ្មែរដែលអាចធ្វើឱ្យ ទង់ជាតិរបស់កម្ពុជា ត្រូវបង្ហូត​ឡើងយ៉ាងឱឡារិក។

ចំណែកឯអ្នកគ្រូ នាង ផល្លា វិញ ក៏ធ្វើកេរ្តិ៍ឈ្មោះកម្ពុជា ល្បាញល្បី មិនចាញ់កីឡាការិនី ស៊ន សៀវម៉ី ខាងលើនេះដែរ។ អ្នកគ្រូបានធ្វើឱ្យទង់ជាតិ របស់ប្រទេសកម្ពុជា ឈរបង្អួតរាងយ៉ាងសង្ហា នៅវេទិកាដ៏ប្រណីត នាទីក្រុងឌូប៉ៃ ដែល​បាន​បង្ហាញដល់ពិភពលោក ប្រព័ន្ធអប់រំនៅកម្ពុជា មិនអន់ជាប្រទេសដ៏ទៃនោះទេ។ ក្នុងចំណោមគ្រូឆ្នើម ជាង៥០០០នាក់ មកពី ១២៧ប្រទេស លើពិភពលោក ដែលបានប្រកួតប្រជែង យកតំណែងគ្រូបង្រៀនឆ្នើម អ្នកគ្រូ នាង ផល្លា គឺជា​បេក្ខជន​មួយ ក្នុងចំណោមបេក្ខជន ១០ រូបចុងក្រោយ ដើម្បីទទួលយករង្វាន់ធំ មានតម្លៃស្មើនឹង ១លានដុល្លារ។

ទោះបីជាអ្នកគ្រូ មិនបានទទួលពានរង្វាន់ ជាគ្រូបង្រៀនឆ្នើម ពិភពលោក ប្រចាំឆ្នាំនេះក៏ដោយ ប៉ុន្តែកេរ្តិ៍ឈ្មោះ​របស់​អ្នកគ្រូ បានល្បីសុះសាយ ទាំងក្នុង និងក្រៅប្រទេស ហើយក៏ជាមោនភាពមួយ របស់កម្ពុជាដែរ។ អ្នកគ្រូ ផល្លា ខ្លួនឯង បានថ្លែងយ៉ាងមានមោទនភាពថា មិនត្រឹមតែពលរដ្ឋខ្មែរទេ ដែលបានស្គាល់ និងគាំទ្រអ្នកគ្រូនោះ តែអ្នកដែល​មាន​វត្តមាន នៅក្នុងវេទិកា ប្រកាសជ័យលាភី នៅក្រុងឌូបៃ ដែលមានជាង ៨ពាន់នាក់ បានស្គាល់ស្គាល់ភ្លាម ថាអ្នកគ្រូ ជា​ស្ត្រី​ដ៏អស្ចារ្យមួយរូប មកពីប្រទេសកម្ពុជា។

អ្នកគ្រូ នាង ផល្លា បានបូជាកម្លាំងកាយចិត្ត រយៈពេលប្រមាណជា ២០ឆ្នាំ មកហើយ ដើម្បីផ្តល់ចំណេះវិជ្ជា សម្រាប់​កុមារ​ពិការភ្នែក និង គ-ថ្លង់ ហើយបានប្រែក្លាយ ពីគ្រូបង្រៀនម្នាក់ ដែលមិនសូវមានអ្នកស្គាល់ ទៅជាគ្រូបង្រៀន មាន​ការ​គាំទ្រ ដ៏ច្រើនសន្ធឹកសន្ធាប់ បន្ទាប់ពីសកម្មភាព ប្រកបដោយការអត់ធ្មត់ និង ឆន្ទៈមុះមុត របស់អ្នកគ្រូ ត្រូវបាន​ផ្សព្វ​ផ្សាយ ទូទាំងពិភពលោក តាមរយៈកម្មវិធី គ្រូឆ្នើមពិភពលោក (Global Teacher Prize)។ អ្នកគ្រូ ផល្លា គឺជាគ្រូ​បង្រៀន​ដំបូង ក្នុងប្រវត្តិសាស្រ្តកម្ពុជា ដែលបានពាំនាំភាសា គ-ថ្លង់ មកស្រោចស្រង់ជនពិការកម្ពុជា។

ប្រាកដហើយថា ការនាំកេរ្ដិ៍ឈ្មោះ មកឲ្យមាតុភូមិកំណើតរបស់ខ្លួន មិនមែនមានតែវរៈនារីទាំងពីររូបនេះទេ បើទោះជា​យើងបានជ្រើសរើស យកមកនិយាយ តែក្នុងមួយរយៈពេល ចុងក្រោយនេះក៏ដោយ។ ប៉ុន្តែកុលបុត្រកុលធីតា​ខ្មែរ​គ្រប់​រូប នរណាៗក៏ទំនងជា មិនចង់ឲ្យខកខាន ក្នុងការនាំកិត្តិយស មកឲ្យប្រទេសជាតិ របស់ខ្លួនមួយនេះដែរ ដែលផ្ទុយ​គ្នា​ស្រឡះ ពីកេរ្ត៍ឈ្មោះដ៏អាសោធ ដែលក្រុមអ្នកដឹកនាំខ្មែរ បានបង្កើតឡើង តាមរយៈសង្គ្រាមរាំងជល់ ដ៏ល្ងង់ខ្លៅ បូករួម​ទាំង​របប​ប្រល័យពូជសាសន៍ សម្លាប់ជាតិឯងយ៉ាងរង្គាល ក្នុងពេលកន្លងមក។

យ៉ាងណា បើសិនជាកញ្ញា ស៊ន សៀវម៉ី និងអ្នកគ្រូ នាង ផល្លា បានសាងឈ្មោះឲ្យកម្ពុជា នៅលើវិស័យកីឡា និងការ​អប់រំនោះពិតមែនក៏ដោយ ក៏សម្រាប់វិស័យផ្សេងៗ ទាក់ទងនឹងការរំលោភសិទ្ធិមនុស្ស ការបំផ្លាញធនធានធម្មជាតិ ។ល។ សុទ្ធតែបានធ្វើឲ្យពិភពលោក ស្គាល់កម្ពុជា យ៉ាងច្បាស់ដូចគ្នាដែរ៕