នៅរសៀលថ្ងៃព្រហស្បត្តិ៍ ទី១៩ ខែមីនានេះ ក្រុមស្ម័គ្រប្រយុទ្ធ របស់អង្គការ រដ្ឋអ៊ីស្លាម (EI ឬ ISIS) បានប្រកាសទទួល​ស្គាល់ ភេវរកម្មបាញ់ប្រហារ នៅក្នុងសារមន្ទីរជាតិ បារដូ កណ្ដាលរដ្ឋធានី ទូនីស នៃប្រទេសទួនេស៊ី ដែលបានកើត​ឡើង កាលពីថ្ងៃទី១៨ ខែមីនា ម្សិលម៉ិញ ដែលធ្វើឲ្យមនុស្ស ២១នាក់ស្លាប់។ ការប្រកាសទទួលស្គាល់នេះ ត្រូវបាន​ធ្វើ​នៅ​ក្នុងសារមួយ ថ្លែងជាលក្ខណៈសម្លេង បង្ហោះនៅលើអ៊ិនធើណែត។ ក្រុមអ៊ីស្លាមនិយមជ្រុល ដែលមានទីតាំងនៅ​ក្នុង​ប្រទេ សទូនេស៊ី ស្រាប់ និងមានកងស្ម័គ្រប្រយុទ្ធរបស់ខ្លួន ច្រើនរយនាក់ បានព្រមានថា នឹងមានការវាយប្រហារ​ជា​ថ្មីទៀត ទៅលើប្រទេសទូនេស៊ី។

ក្រុមអ៊ីស្លាមនិយមជ្រុល បានប្រកាសឲ្យដឹងថា ការវាយប្រហារ កាលពីថ្ងៃពុធ បានដឹកនាំដោយ «វីរៈជនពីរនាក់ ដែល​មានឈ្មោះថា Abou Zakaria al-Tounsi និង Abou Anas al-Tounsi បំពាក់ទៅដោយអាវុធស្វ័យប្រវត្តិ និងគ្រាប់បែក» ហើយបាន«ចូលទៅដល់កណ្ដាល​ ចំណោមជនបរទេស មកពីប្រទេសនៃសញ្ញាឆ្កាង (ចង់និយាយពីសាសនាគ្រឹស្ទ៍) (...) និងបង្កឲ្យរញ្ជួយ ដល់បេះដូងនៃក្រុមក្បត់ នៅក្នុងប្រទេសទូនេស៊ី ដែលកាន់សាសនាអ៊ីស្លាម»។

បើតាមតុល្យភាពផ្លូវការចុងក្រោយ បានឲ្យដឹងថា ភេវរកម្មបាញ់ប្រហារ បានសម្លាប់មនុស្ស២១នាក់ ក្នុងនោះ ១៣នាក់​ជាទេសចរណ៍បរទេស។ អ្នកទេសចរណ៍មួយភាគធំ សុទ្ធសឹងតែជាទេសចរណ៍ តាមកាប៉ាល់ ហើយបានចុះចតនៅ​កំពង់ផែនៃរដ្ឋធានី ទូនីស ដើម្បីធ្វើដំណើរស្វែងយល់ និងកំសាន្ដនៅទីនោះ។ ប៉ុន្តែការវាយប្រហារបានកើតឡើងយ៉ាង​សន្ធាប់ សំដៅក្រុមអ្នកទេសចរណ៍ទាំងនោះ ខណៈពេលដែលពួកគេ បានឈានជើងចុះពីរថយន្ដក្រុង ហើយដើរ​ចូល​ទៅ​ក្នុង​សារមន្ទីរ។

ដោយឡែក ទេសចរណ៍អេស្ប៉ាញពីរនាក់ បានរួចរស់មានជីវិត បន្ទាប់ពីបានលាក់ខ្លួន អស់ពេញមួយយប់ម្សិលមិញ ក្រោមការជួយបំពួន ពីសំណាក់បុគ្គលិកមួយរូប របស់សារមន្ទីរ។

អាជ្ញាធរបានប្រកាស ពីការស្លាប់របស់ជនខ្មាន់កាំភ្លើង ទាំងពីរនាក់ ហើយបានចាប់ខ្លួនមនុស្សសង្ស័យ​៩នាក់​ផ្សេង​ទៀត​ ដែលក្នុងនោះ មាន៤នាក់ សុទ្ធតែមានទំនាក់ទំនងដោយផ្ទាល់ ជាមួយភេវរកម្ម។ ដោយសារស្ថានភាពនេះ កង​ទ័ព​ត្រូវបានដាក់ឲ្យចូលរួម ក្នុងការពង្រឹងសន្តិសុខ នៅតាមទីក្រុងធំៗ។ តាំងពីឆ្នាំ២០១១មក អាជ្ញាធរនៃប្រទេស​ទូនេស៊ី បានប្រយុទ្ធមិនឈប់ឈរ ប្រឆាំងនឹងក្រុមអ៊ីស្លាមស្ម័គ្រប្រយុទ្ធ ដែលគេស្គាល់ថា បានទាក់ទងយ៉ាងស្អិតរមួត នៅក្នុងបណ្ដាញភេវរនិយម អាល់កៃដា (Al-Qaïda) ប្រចាំនៅទ្វីបអាហ្វ្រិកខាងជើង។ នៅក្នុងការប្រយុទ្ធ តទល់គ្នា​ជា​ច្រើន ក្នុងពេលកន្លងមក ទាហាននិងកងកម្លាំងនគរបាល មិនតិចជាង៦០នាក់ទេ ដែលបានស្លាប់បាត់បង់ជីវិត៕