ឆ្លើយតប ទៅនឹងការចោទប្រកាន់ របស់លោក ហ៊ុន សែន និងមន្ត្រីរដ្ឋាភិបាលមួយចំនួននោះ អនុប្រធានទីមួយ នៃ​រដ្ឋសភា​អាណត្តិទីប្រាំ និងជាអនុប្រធាន គណបក្សសង្គ្រោះជាតិ លោក កឹម សុខា បានថ្លែងតបវិញថា លោកមិនដែល​មាន​ចេតនា ឬដូងចិត្តរបស់លោក មិនដែលគិត និងប្រើប្រាស់នូវពាក្យ «ផ្តួលរំលំរដ្ឋាភិបាល ឬគណបក្ស​កាន់​អំណាច»​នោះ​ទេ ម្យ៉ាងវាក៏ខុស ទៅនឹងគោលការណ៍ របស់គណបក្សដែរ។ លោកបន្តថា លោកបានត្រឹមប្រើប្រាស់ នូវពាក្យថា «ផ្លាស់​ប្តូរ»​ប៉ុណ្ណោះ។ នេះបើតាមកិច្ចសម្ភាសន៍ របស់លោក កឹម សុខា តាមវិទ្យុអាស៊ីសេរី កាលពីយប់ថ្ងៃទី១៨ ខែមីនា ម្សិល​ម៉ិញ​នេះ។

អនុប្រធានគណបក្សសង្គ្រោះជាតិ បានបន្ថែមថា ការប្រើប្រាស់ ពាក្យ«ផ្តួលរំលំរដ្ឋាភិបាល»នេះ ប្រហែលជាចេតនា ឬការ​ស្តាប់ភាសាច្រលំណាមួយ នៃអ្នកសារព័ត៌មាន ហើយយកទៅធ្វើការចុះផ្សាយ ដោយមិនត្រឹមត្រូវ ឬក៏អ្នកធ្វើ​របាយ​ការណ៍ ជូនលោកនាយករដ្ឋមន្រ្តី ហ៊ុន សែន ច្រលំ ដែលយកពាក្យពេចន៍របស់លោក ទៅបរិយាយខុសពីការ​ពិត​ប៉ុណ្ណោះ។ លោកបន្តថា កាលពីថ្ងៃទី១៥ ខែមីនា កន្លងមកនេះ លោកប្រើតែពាក្យ «ផ្លាស់ប្តូរ» ទេ មិនដូចសារព័ត៌មាន​ក្នុង​ស្រុក​មួយ​ចំនួន ដែលធ្វើការចុះផ្សាយថា លោកមានបំណង ចង់ដឹកនាំមហាជន ធ្វើបាតុកម្ម​ក្នុងចេតនាផ្តួលរំលំ​រដ្ឋាភិបាល​ឡើយ។

អនុប្រធានទីមួយ នៃរដ្ឋសភាអាណត្តិទីប្រាំរូបនេះ បានបញ្ជាក់ទៀតថា៖ «ខ្ញុំអត់មានប្រើពាក្យថា ផ្តួលរំលំរដ្ឋាភិបាល ឬគណបក្សកាន់អំណាចនោះទេ។ សូម្បីកុំថាឡើយ ពាក្យពេចន៍ នៅក្នុងបេះដូងខ្ញុំ នៅក្នុងគោលការណ៍របស់ខ្ញុំ ក្នុង​គំនិត​របស់ខ្ញុំ ខ្ញុំមិនដែលប្រើអំពើហិង្សា មិនដែលគិត ពីរឿងផ្តួលរំលំទេ។ អ្វីៗដែលខ្ញុំធ្វើ តែងតែអហិង្សា ហើយខ្ញុំតែងតែ​ប្រឆាំង នឹងអ្នកណាដែលប្រើអំពើហិង្សា។ (…) ខ្ញុំនិយាយនោះ គឺក្នុងន័យដើម្បីប្រាប់ទៅអ្នកគាំទ្រ ដែលគាត់មាន​ការ​អាក់​អន់ចិត្ត នឹងគណបក្សសង្គ្រោះជាតិថា មិនមានការផ្លាស់ប្តូរសមរម្យ តាមអ្វីដែលគាត់ចង់បាន។ ផ្លាស់ប្តូរនោះ ខ្ញុំ​បាន​បញ្ជាក់ថា យើងមិនអាចធ្វើ តាមរយៈបាតុកម្ម ហើយមានអំពើហិង្សាទេ ពីព្រោះគោលការណ៍ គណបក្សសង្គ្រោះជាតិ យើង គឺអហិង្សា។ (…) អីចឹងហើយ យើងត្រូវងាកមករកការចរចា។ ហើយការចរចានេះ វាមិនបាន១០០ ភាគរយ ដូច​ដែល​យើងចង់ដូរនោះទេ។ (…) ខ្ញុំសារភាព សារភាពត្រង់ចំណុចណ្នឹង គឺយើងមិនអាចដូរ។ ដូរនឹងមានន័យថា កែការ​បោះ​ឆ្នោតណ្នឹង ឲ្យបាន១០០ភាគរយ ដូចអ្វីដែលយើងចង់បាន ដើម្បីឲ្យមានការផ្លាស់ប្តូរនោះទេ។ គឺអត់មាន​និយាយ​ពាក្យ ដែលផ្តួលរំលំជាដាច់ខាត។»

សូមបញ្ជាក់ថា ការលើកឡើង របស់នាយករដ្ឋមន្រ្តីខាងលើនេះ ត្រូវបានធ្ចើឡើងមុនមួយថ្ងៃ ដែលរដ្ឋសភា ដែលមាន​តំណាងរាស្រ្ត១២៣រូប មកពីគណបក្សទាំងពីរ នឹងត្រូវធ្វើការអនុម័តច្បាប់ ទាក់ទងនឹងគ.ជ.ប និងច្បាប់បោះឆ្នោត ក្នុង​ថ្ងៃទី១៩ ខែមីនានេះ។ ការណ៍នេះ ត្រូវបានគេមើលឃើញថា ជាការគម្រាម ដើម្បីបង្ខំឲ្យតំណាងរាស្រ្ត មកពីបក្សប្រឆាំង មិនអាចជំទាល់ទល់ នឹងច្បាប់ដ៏ចម្រូងចម្រាសនេះបាន។ ការណ៍ដដែលៗនេះ ត្រូវបានសង្គមស៊ីវិលមួយចំនួន ហៅថា ជាការលាបពណ៌ តាមបែបបច្ចេកទេស។

ជាមួយនឹងការលាបពណ៌ឲ្យគ្នា ទៅវិញទៅមកខាងលើ អតីតមន្ត្រីសិទ្ធិមនុស្សដ៏ល្បី លោក ចាន់ សូវ៉េត កាលលោកនៅ​មានជីវិត ក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ លោកបានមើលឃើញថា នៅពេលមានដំណោះស្រាយ ក្នុងរឿងនយោបាយម្តងៗ ក៏តែងតែកើតមាន នូវរឿងហេតុថ្មីៗ ដែលទំនងជាចង់គម្រាម បង្ខំ ឬគៀងភាគីមួយទៀត ឲ្យ​ដើរ​តាម ឬចូលតាមផ្លូវ ឬគន្លងដែលខ្លួន បានត្រាយដោយឯកឯងនោះ។ លោក ចាន់ សូវ៉េត ធ្លាប់បានថ្លែងថា៖ «ស្រប​ពេលនឹងកិច្ចប្រជុំ ឬជំនួបស្វែង រកដំណោះស្រាយ រវាងគណបក្សទាំងពីរ គេឃើញមានការលាបពណ៌ ឲ្យគ្នាទៅវិញ​ទៅ​មក។ (…) គណបក្សសង្គ្រោះជាតិ រៀបចំកម្មវិធីនយោបាយអ្វីមួយ គណបក្សប្រជាជនទៅរំខាន។ ដល់ពេលគណបក្ស​ប្រជាជន រៀបចំកម្មវិធីអ្វីមួយ គណបក្សសង្គ្រោះជាតិ គ្មានលទ្ធភាពគៀងគរគ្នាទៅរំខានទេ។ ហាក់បីដូចជា​មិនសម​ស្រប (វា) ផ្អែក​ទៅ​លើ​ស្ថានភាព ការដឹកនាំគណបក្សហ្នឹង អ្នកដែលមានអំណាច និងអ្នកដែលគ្មានអំណាច។»

» សូមអានអត្ថបទ នៃកិច្ចសម្ភាស ជាមួយលោក ចាន់ សុវ៉េត៖ ឆន្ទៈពិតសម្រាប់ជាតិ មិនមែនលាបពណ៌​គ្នាទេ។

គេនៅចាំបានថា កាលពីថ្ងៃទីទី១៨ ខែកុម្ភៈ ឆ្នាំ២០១៤ កន្លងមកនេះ ក្នុងរបាយការណ៍បូកសរុបការងារប្រចាំឆ្នាំ របស់​ក្រសួងមហាផ្ទៃ ក៏បានផ្តើម ឲ្យមានការរិគន់យ៉ាងច្រើន ពីសំណាក់មហាជន ថាពោរពេញដោយ ការលាបពណ៌មក​លើ​ប្រជាពលរដ្ឋ ក្នុងនាមខ្លួន ជារដ្ឋាភិបាលរបស់ពលរដ្ឋនោះដែរ។ កាលនោះ លោក ខៀវ សុភ័គ អ្នកនាំពាក្យ និងជា​អគ្គលេខា​ធិការ​ក្រសួងមហាផ្ទៃ ដែលជាអ្នកធ្វើបទបង្ហាញ បានលើកឡើងដូច្នេះថា ចំនួនបាតុកម្ម-កូដកម្មកើតក្នុង ឆ្នាំ​២០១៣ មានចំនួន៨៤២លើក។ ដែលបាតុកម្ម-កូដកម្មនោះ «បង្ក»ឡើងដោយប្រជាពលរដ្ឋ៤២៤លើក និងកម្មករ​ចំនួន​៤១៨លើក។ លោកបានបន្តថា បាតុកម្ម-កូដកម្មទាំងនោះ មានការ«លូកដៃ»ពីអ្នក នយោបាយ សង្គមស៊ីវិល និង​សហជីព​មួយចំនួនដែរ។

» សូមអានអត្ថបទលំអិត៖ ភាសាក្នុងរបាយការណ៍ ក្រសួងមហាផ្ទៃ រងការរិះគន់ថា ជាការលាបពណ៌៕