ភ្នំពេញ៖ សេចក្តីប្រកាសទីក្រុងភ្នំពេញ ស្តីពីសិទ្ធិមនុស្ស របស់អាស៊ាន ត្រូវបានចុះហត្ថលេខាអនុម័ត្រ។ នេះជាការថ្លែង​អោយដឹង របស់លោក កៅ គឹមហួន រដ្ឋលេខធិការក្រសួងការបរទេស និងសហប្រតិបត្តិការកម្ពុជា ស្តីពីលទ្ធិផល នៃកិច្ច​ប្រជុំពេញអង្គ របស់ប្រមុខរដ្ឋ ប្រមុខរដ្ឋាភិបានអាស៊ាន ពេញមួយថ្ងៃទី១៨ ខែវិច្ឆិកាកន្លងទៅនេះ។ នៅក្នុងសន្និសិទ្ធកាសែត ដែលបានរៀបចំធ្វើ នៅមេឌៀសិនធ័រ វេលាម៉ោងប្រាំមួយល្ងាច ថ្ងៃដដែល លោករដ្ឋលេខាធិការបានបញ្ជាក់ផងដែរ ពីការ​អនុម័ត្រនូវសេចក្ដីសម្រេចជាច្រើនទៀត។

លោក កៅ គឹមហួន ក្នុងសន្និសិទ្ធកាសែត នៅមេឌៀសិនធ័រ ថ្ងៃទី១៨វិច្ឆិកា ឆ្នាំ២០១២។
រូបថត MONOROOM.info/ Phnom Thom

ក្នុងចំណោមសេចក្ដីសម្រេច​ជាច្រើននោះ លោកកៅ គឹមហួន បានលើកជាអាថ៌ ការអនុម័ត្រទៅលើសេចក្តី​ថ្លែង​ការណ៍​រួម អំពីការបង្កើតមជ្ឈមណ្ឌលម៉ីនអាស៊ាន  និងទៅលើការតែងតាំង អគ្គលេខាធិការថ្មីរបស់អាស៊ាន សំរាប់អាណត្តិ២០១៣ ដល់២០១៧។ សូមបញ្ជាក់ថា លោក ស៊ូរិន ពិតស៊ូវណ្ណ នឹងបញ្ចប់អាណត្តិរបស់ខ្លួន នៅថ្ងៃទី៣១ ខែធ្នូ ឆ្នាំ២០១២ខាងមុខ។

ទាក់ទងការបង្កើតសហគមន៍អាស៊ាន  លោកកៅ គឹមហួន បញ្ជាក់ថា បណ្តាថ្នាក់ដឹកនាំអាស៊ាន ក៏បានអនុម័តយកថ្ងៃទី៣១ ខែធ្នូ ឆ្នាំ២០១៥ ជាថ្ងៃដែលសហគមន៍នេះ នឹងចាប់ផ្ដើមអនុវត្តន៍ជាផ្លូវការ។ សហគមន៍អាស៊ាន ដែលនឹងបង្កើតឡើង ជាមួយ​នឹងសសរស្តម្ភរបស់ខ្លួន គឺសហគមន៍សន្តិសុខ សហគមន៍នយោបាយ សហគមន៍សមារណកម្មសេដ្ឋកិច្ច និងសហគមន៍​សង្គមវប្បធម៌ ។

បញ្ហាសមុទ្រចិនខាងត្បូង មិនគួរយកមកធ្វើអន្តរជាតូបនីយកម្ម

លោក កៅ គឺមហួន បានប្រាប់ដល់អ្នកសារព័ត៌មានជាតិ និងអន្តរជាតិថា ដើម្បីបន្តអនុវត្តន៍សេចក្តីថ្លែងការណ៍ ទាក់​ទង​នឹង​សមុទ្រចិនខាងត្បូង (DOC) ឲ្យបានល្អនោះ ប្រមុខដឹកនាំអាស៊ានទាំងអស់  បានយល់ព្រម មិនធ្វើអន្តរជាតូបនីយកម្ម។ នេះជាគោលជំហរថ្មី ដើម្បីបន្តអនុវត្តឱ្យបានពេញលេញ និងមានប្រសិទ្ធភាព នៃសេចក្ដីថ្លែងការណ៍នេះ។ លោកបន្តថា «ប្រមុខដឹកនាំអាស៊ាន បានឯកភាពគ្នា ទៅលើខ្លឹមសារ សេចក្តីថ្លែងការណ៍រួម នៃកិច្ចប្រជុំកំពូលអាស៊ានចិន លើកទី១៥ អំពីខួបឆ្នាំទី១០នៃ DOC»។

ចំណែកឯជម្លោះសាសនា នៅរដ្ឋារ៉ាឃីន ក្នុងប្រទេសភូមាឬមីយ៉ាន់ម៉ា ប្រមុខរដ្ឋ និងប្រមុខរដ្ឋាភិបាលអាស៊ាន ក៏បានធ្វើការ​អំពាវនាវ ទៅកាន់បណ្តាភាគីជម្លោះ ពាក់ព័ន្ធទាំងឡាយ  សូមអោយបញ្ឈប់ សកម្មភាពហិង្សារបស់ខ្លួនជាបន្ទាន់ និងវិលមក​រកការចរចាដោយសន្តិវិធី ហើយបានគាំទ្រការដាក់ចេញ នូវវិធានការនានារបស់រដ្ឋាភិបាលមីយ៉ាន់ម៉ា ដើម្បីដោះស្រាយ​ជម្លោះនេះ។

អាស៊ានក៏បានសម្ដែងការព្រួយបារម្ភផងដែរ នឹងបញ្ហាជម្លោះប្រដាប់អាវុធ ដែលកំពុងកើតមាននៅមជ្ឈិមបូព៌ា កាហ្សាស្រ្ទីព ដោយបានស្នើសុំ ឲ្យមកដោះស្រាយដោយសន្តិវិធី។ រីឯភាពតានតឹងនៅឧបទ្វីបកូរ៉េ កិច្ចប្រជុំបានអំពាវនាវ សូមឲ្យលើក​ករណីនេះ មកពិភាក្សាជាលក្ខណៈ៦ភាគីឡើងវិញ និងទាមទារអោយអនុវត្ត សេចក្តីថ្លែងការណ៍ របស់ក្រុមប្រឹក្សាសន្តិសុខ របស់អង្គការសហប្រជាជាតិ៕

--------------------------------------------------------
ដោយៈ ភ្នំធំ - ភ្នំពេញថ្ងៃទី ១៨ វិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ