ជាការរកឃើញថ្មីថ្មោងមួយ នៅកណ្ដាលរដ្ឋធានីប៉ារីស ដ៏ល្បីល្បាញរបស់ប្រទេសបារាំង នៅក្នុងសម័យកាលបច្ចុប្បន្ន។ នៅពីក្រោមអាគារផ្សារទំនើបមួយ ស្ថិតក្នុងសង្កាត់លេខ២ ក្រុមអ្នកបូរាណវិទូបានរកឃើញ សាកសពជាគ្រោងឆ្អឹង ចំនួន​២០០​គ្រោងឆ្អឹង ដែលត្រូវបានបញ្ចុះ នៅក្នុងរណ្ដៅកប់សាកសពបូរាណ មានលក្ខណៈរួមមួយ នៅចុងសប្ដាហ៍​នេះ។ សំនួរ​កំពុងត្រូវ​បានចោទសួរឡើង ថាតើសាកសពទាំងនេះ បានស្លាប់ក្នុងមូលហេតុអ្វី? ដោយសារជម្ងឺប៉េស្ត៍ ឬ​ដោយ​សារ​គ្រោះ​ទុរភិក្ស ក្នុងសម័យកាលនោះ?

តាំងពីដើមខែមករា រហូតមកទល់នឹងខែមិនាឆ្នាំ២០១៥នេះ ក្រុមអ្នកស្រាវជ្រាវ មកពីវិទ្យាស្ថានជាតិ ខាងការ​ស្រាវ​ជ្រាវ​នៃបូរាណវិទ្យា បានដឹកនាំការកកាយផ្នូរបូរាណដ៏យូរលង់មួយ ដែលគេចាំបានថា ជាកន្លែងរបស់អតីតមន្ទីរពេទ្យ ទ្រីនីតេ (Trinité) បង្កើតឡើងនៅក្នុងសតវត្សទី១២ និងត្រូវបានវាយកម្ទេចចោល នៅចុងសតវត្សទី១៨។

លោក ប៉ាស្កាល់ រ៉យ (Pascal Roy) ប្រធានផ្សារទំនើប ម៉ូណូព្រី (MonoPirx) បានថ្លែងឲ្យដឹងថា៖ «ដោយសារ​យើង​ចង់​ធ្វើគម្រោង ជួសជុលកែលំអរផ្សារឡើងវិញ អញ្ចឹងហើយ​ ទើបយើងបានសម្រេចចិត្តយកចេញ នូវពំនូកដីដំបូកដ៏ធំមួយ ស្ថិតក្នុងជាន់ទី២ក្រោមដី។ អញ្ចឹងហើយ បានជាធ្វើឲ្យ កំណាយបូរាណវិទ្យាមួយនេះ បានកើតឡើង។»

ប្រធានផ្សារទំនើបបានបន្តទៀតថា៖ «យើងគិតថាប្រហែលជាមានគ្រោងឆ្អឺង តែប៉ុន្មានប៉ុណ្ណោះ ដោយសារនៅទីនេះ អាចជាអតីតផ្នូរបូរាណមួយ ប៉ុន្តែមិនបានគិតថា យើងមានរណ្ដៅកប់សាកសពរួម មានសាកសពដល់ទៅរាប់រយ​ដូច្នេះ​ទេ»។

នៅពេលមានការវាយកម្ទេចមន្ទីរពេទ្យ (ចុងសតវត្សទី១៨) គ្រោងឆ្អឹងដែលបានបញ្ចុះនៅទីនេះ ត្រូវបានគាស់ឡើង ហើយ​បញ្ជូនទៅថែរក្សាទុក នៅក្នុងសារមន្ទីផ្នូរបូរាណមួយទៀត ស្ថិតនៅកណ្ដាលរដ្ឋធានីប៉ារីស (នៅមានរហូត​ដល់​សព្វ​ថ្ងៃ) ដែរ។ បូរាណវិទូដែលដឹកនាំការធ្វើកំណាយ អ្នកស្រី អ៊ីសាប៊ែល អាបាឌី (Isabelle Abadie) បានថ្លែង​ពន្យល់​ថា៖ «ទំនង​ជាពេលនោះ ការគាស់គ្រោងឆ្អឹងឡើងមកនោះ មិនបានធ្វើឲ្យបានម៉ត់ចត់ត្រឹមត្រូវ ឲ្យបានគ្រប់រណ្ដៅ​កប់​សាកសពទាំងអស់»។

គួរកត់សម្គាល់ដែរថា នេះជាលើកទីមួយហើយ ដែលក្រុមអ្នកស្រាវជ្រាវបូរាណវិទ្យា បានរកឃើញផ្នូរបូរាណ របស់​មន្ទីរពេទ្យ នៅកណ្ដាលរដ្ឋធានីប៉ារីស ដូច្នេះ។ អ្នកស្រី អ៊ីសាប៊ែល បានរំលឹកឡើងវិញថា ក្រុមអ្នកស្រីធ្លាប់បានរកឃើញ ផ្នូរបូរាណ របស់មន្ទីរពេទ្យ នៅកណ្ដាលក្រុងផ្សេងទៀត ដូចជាម៉ាសីយ៍ (Marseille) ឬទ្រ័យ៍ (Troyes) ប៉ុន្តែមិនដែល​នៅ​កណ្ដាល​រដ្ឋធានី យ៉ាងអញ្ចឹងទេ។

មកដល់ពេលនេះ កំណាយបានធ្វើឡើង នៅលើផ្ទៃក្រឡាជាង ១០០ម៉ែត្រការ៉េ ហើយរណ្ដៅកប់សាកសពរួម ចំនួន៨ ត្រូវបានកាយរកឃើញ។ ពីក្នុងចំណោមនោះ រណ្ដៅចំនួន៧ មានសាកសពពី៥ទៅ២០នាក់ ដាក់ត្រួតគ្នា រវាងពី២​ទៅ​៥ជាន់។ រណ្ដៅទី៨ មានលក្ខណៈពិសេសជាងគេ ព្រោះមានសាកសពដល់ទៅ ១៥០នាក់ ដាក់តម្រៀបគ្នា​ជាច្រើន​ជាន់។ អ្នកស្រី អ៊ីសាប៊ែល បានថ្លែងថា៖ «នៅមានមួយជាន់ទៀត នៅខាងក្រោម...» ដោយអ្នកស្រីគិតជាមុនថា នឹង​មាន​រណ្ដៅ ឬអ្វីផ្សេង អាចនឹងត្រូវបានរកឃើញទៀត ក្នុងពេលខាងមុខ៕

អាគារផ្សារទំនើបមើលពីក្រៅ។