ភ័យ​នឹង​ផាវ​ផ្ទុះ ខ្លា​មួយ​ក្បាល​ស្ទុះ​ហក់​ពី​អាគារ ធ្លាក់​ស្លាប់

នគរបាលចិន កំពុងធ្វើការស៊ើបអង្កេត ពីករណីបង្ខាំងសត្វខ្លាមួយក្បាល នៅក្នុងផ្ទះ។ ករណីបង្ខាំងនេះ បានបែកធ្លាយ បន្ទាប់​ពី​សត្វ​កំណាច បានហក់ចេញតាមបង្អួច ព្រោះភ័យនឹងសម្លេងផាវផ្ទុះ។ ប៉ុន្តែវាសនារបស់សត្វ បានបញ្ចប់ទៅ យ៉ាង​អាណោច​អធម នៅ​ពេល​ដែល​វា​ធ្លាក់មកដល់ដី។
Loading...
  • ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី២៦ កុម្ភៈ ២០១៤
  • កែប្រែចុងក្រោយ: February 27, 2015
  • ប្រធានបទ: ពីនេះពីនោះ
  • អត្ថបទ: មានបញ្ហា?
  • មតិ-យោបល់

ខ្លាឈ្មោលមួយក្បាល ដែលមានអាយុប្រមាណជា ៧ខែ បានស្លាប់ នៅខាងក្រោមអាគារស្នាក់នៅមួយ ក្នុងខេត្ត សានដុង (Shandong) ភាគខាងកើត នៃប្រទេសចិន បន្ទាប់ពីវាបានលោតចេញពីបន្ទប់ កន្លែងដែលវាបានរស់នៅមុននេះ។ ខ្លាវ័យ​ជំទង់មួយក្បាលនេះ ទំនងជាបានភ័យនឹងសម្លេងដុតផាវ នាឱកាសចូលឆ្នាំចិន កន្លងមកនេះ។

អ្នកដែលឃើញ ហេតុការណ៍នេះមុនគេ គឺប្ដីប្រពន្ធពីរនាក់ ដែលបានវិលត្រឡប់ ពីអាហារពេលល្ងាច នាពេលចូលឆ្នាំថ្មី ថ្ងៃទី១៨ ខែកុម្ភៈ ហើយបានវិលត្រឡប់មកផ្ទះវិញ។ នៅក្នុងចំណតរថយន្ដ ខាងក្រោមអាគារ ពួកគេបានប្រទះឃើញ សាក​សពសត្វមួយក្បាល ដែលអ្នកទាំងពីរគិតដំបូងឡើងថា ជាសាកសព្វ របស់សត្វឆ្កែដ៏ធំមួយ។ នេះបើតាម​សារព័ត៌មាន ចេញផ្សាយប្រចាំថ្ងៃ នៅក្នុងតំបន់ឈ្មោះ Bandao Dushi Bao។ ប៉ុន្តែ នៅពេលដើរទៅជិត ទើបអ្នកទាំងពីរ​យល់​ថា ជា​សត្វ​ខ្លាជំទង់មួយក្បាល ដូចរូបថតជាច្រើន ត្រូវបានគេយកមកបង្ហោះ ពេញបណ្ដាញសង្គម។

សារព័ត៌មានចិនថ្មី បានរាយការណ៍ថា សត្វខ្លាបានរើខ្លួន រួចពីចំណងច្រវាក់ និងទ្រុងរបស់វា ហើយបានលោត​ចេញពី​បន្ទប់ ដែលមានកំពស់ដ៏ខ្ពស់។ សត្វខ្លា ទំនងជាភ័យខ្លាច នឹងសម្លេងដុតផាវ ដែលមានលក្ខណៈជាប្រពៃណី របស់ជន​ជាតិ​ចិន ក្នុងពេលចូលឆ្នាំថ្មីម្ដងៗ។ សារព័ត៌មាន បានរាយការណ៍ទៀតថា នៅពេលនេះ នគរបាលចិនកំពុង​ធ្វើការស៊ើប​អង្កេត ទៅលើករណីបង្ខាំងខ្លានេះ នៅក្នុងអាគារស្នាក់នៅបែបនេះ។

នៅក្នុងប្រទេសចិន ចំនួនសត្វខ្លាដែលត្រូវ​បានចាប់​មកចិញ្ចឹម មានចំនួនកើនឡើងយ៉ាងខ្លាំង នៅក្នុងរយៈពេលចុង​ក្រោយ​នេះ។ របាយការណ៍មួយបានឲ្យដឹងថា ចំនួនសត្វខ្លា ដែលត្រូវបានយកមកចិញ្ចឹមនោះ មានចំនួនដល់ទៅ ៦០០០ក្បាល នៅក្នុងកសិដ្ឋានចំនួនជាង២០០។

ប៉ុន្តែផ្ទុយមកវិញ សត្វកំណាចនេះ​បែរជាមានចំនួនកាន់តែតិចទៅៗ នៅក្នុងធម្មជាតិ​ទៅ​វិញ។ កាលពីមួយសតវត្សមុន សត្វខ្លានៅក្នុងប្រទេសចិន ត្រូវបានគេប៉ាន់ប្រមាណថា មានចំនួនជាង១សែនក្បាល ខណៈក្នុងពេលបច្ចុប្បន្ន មានចំនួន​ត្រឹមតែ៣ពាន់ក្បាលប៉ុណ្ណោះ។ ការបាត់បង់នេះ ដោយសារមកពី មូលហេតុ​ច្រើន​យ៉ាង៖ ការបំផ្លាញព្រៃដែលជាជរកសត្វ ការពង្រីកដីដើម្បីសង់ផ្ទះ និងការប្រមាញ់ខុសច្បាប់៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...