មិនថាក្នុងរូបភាពបែបណា ឬបុគ្គលណានោះទេ តែវាមិនមែនជារឿងមួយ ដែលត្រឹមត្រូវឡើយ គឺដោយសាររូបភាព​ទាំង​នោះ បាន​លាបពណ៍បិទបាំង នូវការពិតមួយចំនួន។ ហើយបើកូនខ្មែគ្រប់រូប នៅតែបន្តប្រព្រឹត្តនៅរឿងដែល ជាទង្វើរមិន​ល្អ​ទាំងនេះទៀត មិនប្រាកដថាមានប្រយោជន៍នោះទេ នាពេលអនាគត។ នេះជាការលើកឡើង របស់លោក ព្រាប កុល នាយកប្រតិបត្តិ អង្គការតម្លាភាពកម្ពុជា នៅលើទំព័រហ្វេសប៊ុកផ្លូវការ របស់លោក នៅថ្ងៃទី២៦ ខែកុម្ភៈ ឆ្នាំ២០១៥។

លោក ព្រាប កុល បានសរសេរថា ក្នុងនាមលោកជាមនុស្សម្នាក់ ដែលស្រឡាញ់ភាពយុត្តិធម៌ លោកមិនចង់ឃើញ នូវការ​វាយប្រហារបែបនេះទេ ព្រោះវាមានអត្ថន័យ បង្ខូចកេរ្តិ៍ឈ្មោះអ្នកដ៏ទៃ។ ម្យ៉ាងវិញទៀត អាចបំផ្លាញនៅវប្បធម៍ខ្មែរផងដែរ ព្រោះកូនខ្មែរជំនាន់ក្រោយ បានឃើញ វាអាចយកតម្រាប់តាម ដោយមិនដឹងពីប្រភពច្បាស់លាស់។ ពេលនោះ ជាពេល​ដែលការលាបពណ៍របស់សង្គមមួយនេះ ទទួលបានលទ្ធផលដោយមិនដឹងខ្លួន។ មិនតែប៉ុណ្ណោះ នៅក្នុងកំឡុងពេលនេះ អាចជាពេល ដែលអ្នកនៅប្រទេសជិតខាង ឆ្លៀតឱកាស មើលងាយសង្គមខ្មែរផង ក៏មិនដឹង។

នាយកប្រតិបត្តិ អង្គការតម្លាភាពកម្ពុជា បានសរសេរអះអាងថា៖ «ថោកទាបមែន...! មិនថាអ្នកកាត់តរូប ជាក្រុមឬបក្ស​ណា​ទេ ហើយមិនចំពោះតែរូបភាពនេះទេ គឺខ្ញុំសុំដៅទៅលើ ការកាត់តរូបភាពផ្សេងៗទៀត ក្នុងចេតនាដូចគ្នានេះ ខ្ញុំយល់​ថា ទង្វើ​បែបហ្នឹងគឺថោកទាបណាស់...ល្មមឈប់ទៅ...។អាវប្បធម៌លាបពណ៌គ្នាហ្នឹង។ ទោះជានៅក្រុមបក្សអ៊ូតាំង បក្ស​ឃុនលុន ឬបក្សង៉ម៉ី ក៏ដោយខ្ញុំសូមឲ្យឈប់ ធ្វើសកម្មភាពបែបហ្នឹងទៅ...តើបានទេ?»។

ប្រតិកម្មរបស់លោក បានកើតឡើង បន្ទាប់ពីលោកបានទទួល នូវរូបភាពច្រើនសន្លឹក ទាក់ទងនឹងស្ថាបនិកអង្គការ«មាតា​ធម្មជាតិ» លោក អាឡិចហ្សង់ដ្រូ ហ្គន់សាឡេស ដេវិតសិន (Alejandro Gonzalez Davidson) ជាតិអេស្បាញម្នាក់ ដែល​ទើបនឹងត្រូវបានបណ្តេញចេញ ពីកម្ពុជា ដោយអាជ្ញាធរខ្មែរ កាលពីពេលថ្មី។ រូបទាំងនោះ មានលក្ខណៈចោទ​ប្រកាន់​លោក អាឡិច ថាជាអ្នកបំផ្លាញសត្វព្រៃ ជាមួយនឹងអ្នកប្រមាញ់ផ្សេងទៀត ហើយសរសេរបញ្ជាក់ថា លោក អាឡិច មិន​មែនជាអ្នកអភិរក្សសត្វព្រៃ ឬព្រៃឈើ នៅស្ទឹងអារ៉ែងនោះទេ។ លោក ព្រាប កុល ចង់ឲ្យពលរដ្ឋខ្មែរគ្រប់រូបដឹង ពីការពិត ដែលចេញពីរូបភាពនេះ ក្នុងនាមជាពលរដ្ឋដែលស្រឡាញតម្លាភាព និងភាពត្រឹមត្រូវនៅក្នុងសង្គម។

នៅក្នុងប្រតិកម្ម ដែលលោកបានសរសេរខាងលើ មានមតិមួយចំនួនបានលើកឡើង ចំពោះការកាត់រូបភាពនោះថា៖ «សុទ្ធ​តែជាពពួកមនុស្សថោកទាបបាតសង្គម ខ្ញុំអាណិតឪពុកម្តាយ របស់ពពួកគេណាស់ ដែលមានកូន ជាអ្នក​បំផ្លាញ​សង្គមបែបនេះ»។ មិនតែប៉ុណ្ណោះ នៅមានអ្នកផ្សេងទៀត បានសរសេរពីមតិផ្ទាល់ខ្លូនដែរថា៖ «ខ្ញុំក៏មិនជឿថា Alex ធ្វើ​នូវ​ទង្វើថោកទាប ដូចក្នុងរូប ទី១ដែរ។ សូមអ្នកធ្វើផលិតរូបកាត់តនោះ បញ្ឈប់ទៅ!»

ទស្សានាវដ្ដីមនោរម្យ.អាំងហ្វូ បានយករូបទាំងនេះ ទៅសុំយោបល់ពីអ្នកច្បាប់ម្នាក់ ដើម្បីបញ្ជាក់ថា តើរូបរបៀបនេះ មាន​លក្ខណៈជាការបញ្ចេញមតិ ឬមានបំណងទុច្ចរិត។ មន្ត្រីរូបនោះ បាននិយាយថា វាបានចាកឆ្ងាយ ពីសិទ្ធិនៃការ​បញ្ចេញ​មតិ តែជាការបោកបន្លំបំភ័ន្ត ដែលត្រូវចាត់ទុក ទៅក្នុងបទល្មើសព្រហ្មទណ្ឌបាន។ លោកបានបន្ថែម ដោយមិនបញ្ចេញ​ឈ្មោះថា អាជ្ញាធរត្រូវចាត់វិធានការ ប្រឆាំងនឹងជន ដែលស្ថិតនៅក្រោយរូបកែបន្លំ ទាំងនេះ តែត្រូវប្រយ័ត្នករណីមួយ៖ មិនត្រូវយករឿងដូចនេះ មកធ្វើជាលេស ដើម្បីបង្ក្រាបទៅលើសិទ្ធិបញ្ចេញមតិ តាមរយៈរូបកំប្លុកកំប្លែងផ្សេងៗនោះឡើយ ព្រោះវាមានលក្ខណៈខុសគ្នា៕