សម្ភាស សុខ ទូច ៖ សកម្មភាព អេឡិច ជា​រឿង​«នយោបាយ»

ព្រៃអារ៉ែង ជាជោគជ័យមួយ របស់ អេឡិច ក្នុងកិច្ចការពារពីការបំផ្លាញ មកទទួលបានការចាប់អារម្មណ៍ និងអភិរក្សទុក។ តែបញ្ហាច្បាប់ កម្ពុជា អេឡិចត្រូវតែគោរព បើមិនអញ្ចឹងទេ សកម្មភាពរបស់លោក អេឡិច ជារឿង«នយោបាយ»។ នេះបើតាមលោក សុខ ទូច អ្នកវិភាគដ៏ល្បីឈ្មោះម្នាក់ទៀត។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី២៤ កុម្ភៈ ២០១៥
  • កែប្រែចុងក្រោយ: February 25, 2015
  • ប្រធានបទ: ច្បាប់
  • អត្ថបទ: មានបញ្ហា?
  • មតិ-យោបល់

តាមទិដ្ឋភាពជាក់ស្តែង នៃការបណ្តេញលោក អេឡិច អនុប្រធានអង្គការមាតាធម្មជាតិ ចេញពីកម្ពុជា ត្រូវបានលោក សុខ ទូច អ្នកវិភាគ ឯករាជ្យ ក្នុងកិច្ចសម្ភាសជាមួយទស្សនាវដ្តីមនោររម្យ.អាំងហ្វូ បានធ្វើការបែងចែកជាបីទិដ្ឋភាព។

- ទិដ្ឋភាពទីមួយចំបង គឺ ទិដ្ឋភាពខាងផ្លូវច្បាប់។ ក្នុងទិដ្ឋភាពនេះ លោកបានលើកឡើងថា លោក អេឡិចជាអ្នកខុស ទៅ​នឹងច្បាប់ប្រទេសមួយ ដែលលោកបានមកស្នាក់នៅ។ លោកបានធ្វើការពន្យល់ថា យ៉ាងណាក៏ដោយ ប្រទេសធំ ឬតូច ត្រូវ​មានអធិបតេយ្យរបស់ខ្លួន មានច្បាប់គ្រប់គ្រងប្រទេសរបស់គេ ជាពិសេស អាឡិច ត្រូវតេគោរពតាមច្បាប់​អន្តោ​ប្រវេសន៍។ លោក សុខ ទូច បានបញ្ជាក់ថា៖ «ជាទូទៅ អេឡិច អាចចេញទៅច្រកណា ក៏បានដែរ។ តែចេញហើយ អាច​ចូល​មកវិញ ដោយមានការចុះទិដ្ឋកាចេញ និងចូល។ ក្រោយ១៥ថ្ងៃ លោកអេឡិចក៏អាច ស្នើសុំរស់នៅក្នុងកម្ពុជា រយៈពេល​មួយឆ្នាំបានហើយ។»

លោកបន្តថា ក្នុងទិដ្ឋភាពច្បាប់នេះ លោក អេឡិច ត្រូវតែចេញ។ តែអ្វីដែលអេឡិចបានធ្វើ គឺខុសទៅនឹងច្បាប់​អន្តោ​ប្រវេសន៍​ហើយ។ ដូចនេះរដ្ឋាភិបាលកម្ពុជា ដើម្បីឈរលើគោលការណ៍បី អធិបតេយ្យ និងបូរណភាពទឹកដី ការអនុវត្ត​ច្បាប់​នៃប្រទេស និងភាពម៉ឺងម៉ាត់របស់រដ្ឋាភិបាល។ ដូច្នេះរដ្ឋាភិបាល ត្រូវតែបង្ខំឲ្យលោកអេឡិច ចេញពីកម្ពុជា​ជាដាច់​ខាត។

- ទិដ្ឋភាពទីពីរ គឺប្រជាប្រិយភាព។ ត្រង់ចំណុចនេះ លោកចង់សំដៅដល់ ប្រជាប្រិយភាពរបស់លោក អេឡិច ដែលមាន​ការគាំទ្រច្រើន ពីប្រជាពលរដ្ឋកម្ពុជានោះ។ ចំណោទរបស់ប្រជាពលរដ្ឋ នៅត្រង់ថា ហេតុអ្វីលោក អឡិច ខិតខំធ្វើការ​សម្រាប់ ការការពារបរិដ្ឋាននៅកម្ពុជា តែបែរជាមិនបានទទួលការគាំទ្រ ពីរដ្ឋាភិបាលកម្ពុជាទៅវិញ។ ចំណុចនេះ លោក​បានធ្វើការពន្យល់ថា ព្រោះពលរដ្ឋទាំងនោះ នៅមិនទាន់យល់អំពីច្បាប់។ ការការពារព្រៃអារ៉ែង របស់លោក អេឡិច នោះជាជោគជ័យមួយហើយ តែយ៉ាងណាក៏ត្រូវតែគោរពច្បាប់ ជាជំហានទីមួយ បើមិនដូច្នេះទេ សកម្មភាពរបស់​លោក​អេឡិច ជារឿងនយោបាយ។ លោក សុខ ទូច បានថ្លែងឲ្យដឹងទៀតថា៖ «នេះជារឿងនយោបាយ ដែលធ្វើឲ្យរដ្ឋាភិបាល​បង្ហាញថា លោក អេឡិច កំពុងធ្វើការខុសទៅនឹងអ្វី ដែលខ្លួនបានស្នើសុំបើក (អង្គការមាតាធម្មជាតិ) នៅកម្ពុជា។»

- និងទិដ្ឋភាពទីបី ផលចំណេញ ក្នុងនោះក៏មានភាពវិជ្ជមាន និងអវិជ្ជមាន។ វិជ្ជមាន ចង់មិនចង់កម្ពុជា បានបង្ហាញ​ទៅ​ដល់​ឆាកអន្តរជាតិថា ខ្លួនជា«ប្រទេសមានច្បាប់ មានទម្លាប់»។ ឯភាពអវិជ្ជមាន រដ្ឋាភិបាល នឹងបាត់បង់ការគាំទ្រពី​ប្រជា​ពលរដ្ឋ ដែលមានការយល់ដឹង ពីច្បាប់អន្តោប្រវេសន៍ នៅមានកំរិតនៅឡើយ ពិសេសពីអ្នកដែលគាំទ្រ អាឡិច។ បញ្ហា​នេះ លោកលោក សុខ ទូច បានធ្វើការពន្យល់ថា អាចជាការកេងចំណេញ របស់គណបក្សនយោបាយ ដូចជាគណបក្ស​សង្គ្រោះជាតិជាដើម ដែលស្នើរដល់អង្គព្រះមហាក្សត្រ ដែលទ្រប់ពុំមានព្រះរាជសិទ្ធិ ក្នុងកិច្ចអន្តរាគមចូលរឿង អាឡិច ក្រៅពីច្បាប់អន្តោប្រវេសន៍នោះ។

អ្នកវិភាគរូបនេះ គាំទ្រឲ្យរដ្ឋាភិបាលពង្រឹង និងអនុវត្តច្បាប់អន្តោប្រវេសន៍ ឲ្យមានប្រសិទ្ធិភាព និងមិនរើសមុខ (ជាតិ​សាសន៍ នយោបាយ)។ តែបើរដ្ឋាភិបាលធ្វើរើសមុខ នោះជាបញ្ហារបស់រដ្ឋាភិបាល ដែលឈានទៅដល់ការធ្លាក់ចុះ នៃការ​គាំទ្ររបស់ខ្លួនពីប្រជាពលរដ្ឋ។ លោកបន្តថា ការធ្លាក់ចុះ នូវការគាំទ្រពីសំណាក់ប្រជាពលរដ្ឋ ទៅលើ​រដ្ឋាភិបាល​សព្វ​ថ្ងៃ​នេះ បណ្ដាលមកពីបញ្ហាបី ប្រព័ន្ធយុត្តិធម៌ អន្តោប្រវេសន៍ និងដីសម្បទាន។ លោកបានបន្តអះអាងទៀតថា៖ «រដ្ឋាភិបាល​ត្រូវតែធ្វើ តែក្នុងពេលតែមួយខ្ញុំជឿជាក់ថា រដ្ឋាភិបាលមិនអាចធ្វើបាននៅឡើយ។ តែបើលោក (រដ្ឋាភិបាល) មិនធ្វើទេ​នោះ នឹងបាត់បង់ការគាំទ្រ ក្នុងឆ្នាំ២០១៨ខាងមុខ។»

យ៉ាងណាលោក សុខ ទូច ក៏មិនបានបង្ហាញថា តើក្នុងមានហេតុផលអ្វី ដែលរដ្ឋាភិបាលកម្ពុជាធ្វើការជ្រើសរើស លោក អេឡិច ក្នុងការអនុវត្តច្បាប់អន្តោប្រវេសន៍ នាពេលនេះឡើយ។ លោកគ្រាន់តែនិយាយថា៖ «នេះអាចមានការជ្រៀតជ្រែក ចូលកិច្ចការផ្ទៃក្នុង របស់ប្រទេសមួយទៀត។ នេះ ខ្ញុំនិយាយពីអ្វី ដែលជាផ្លូវច្បាប់។ រឿងយុត្តិសាស្រ្តរបស់រដ្ឋាភិបាល ខ្ញុំ​មិន​ដឹងទេ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...