គណបក្សហ្វុនស៊ីនប៉ិចថ្មី ដែលទើបនឹងធ្វើសមាជវិសមញ្ញរបស់ខ្លួន កាលពីមួយខែមុន ដើម្បីប្រគល់តំណែង ជា​ប្រធាន​គណបក្សឡើងវិញ ថ្វាយទៅសម្ដេចក្រុមព្រះ នរោត្ដម រណឫទ្ធិ នោះ ទើបនឹងឆ្លងកាត់«ព្យុះ»មួយ ដែល​កើត​​ឡើងពីការមិនត្រូវគ្នា រវាងអគ្គលេខាគណបក្សចាស់ លោក ញ៉ឹក ប៊ុនឆៃ និងអគ្គលេខាគណបក្សថ្មី ក្រោម​ឈ្មោះ​«អគ្គលេខាប្រតិបត្តិ» លោក ហាយ សាក់។ ការមិនត្រូវគ្នានេះ បានឈានទៅដល់ ការចេញ​លិខិតឆ្លើយ​ឆ្លង​ដាក់គ្នា រវាងក្រុមមនុស្សទាំងសងខាង ដែលធ្វើឲ្យគេយល់ថា គោលការណ៍បង្រួបបង្រួម នៃអ្នករាជានិយម របស់​សម្ដេចក្រុមព្រះ មានសភាពដូចទឹក ទើរលើស្លឹកឈូក យ៉ាងដូច្នេះ។

ពាក់ព័ន្ធនឹងហេតុការណ៍ដ៏ស្រួចស្រាវ ដែលអាចធ្វើឲ្យប្រេះឆាជាថ្មីនោះ ព្រះប្រធានជាថ្មីនៃគណបក្ស សម្ដេច​ក្រុម​ព្រះ នរោត្ដម រណឫទ្ធិ បានចេញមកបកស្រាយថា មិនមានការបែកបាក់ផ្ទៃក្នុងនោះទេ។ នៅចំពោះសមាជិក​ប្រមាណ​ជាង ៣០០០នាក់ នៅពហុកីឡាដ្ឋានក្រុងតាខ្មៅ ខេត្តកណ្តាល នៅរសៀលថ្ងៃអាទិត្យទី២២ ខែកុម្ភៈ ឆ្នាំ​២០១៥​ នេះ ព្រះអង្គម្ចាស់អង្គនេះ បានមានបន្ទូលអំពាវនាវ ឲ្យសម្តេចម្ចាស់ក្សត្រី នរោត្តម អរុណរស្មី និងលោក ញ៉ឹក ប៊ុនឆៃ ដែលជាអនុប្រធានគណបក្សទាំងពីរ ឲ្យជួយកិច្ចការផ្នែកសង្គមកិច្ច និងធារាសាស្រ្ត និងធ្វើ​យ៉ាង​ណា​ឲ្យមានភាពឯកភាពគ្នា ក្នុងការកែសម្រួលសមាសភាព ថ្នាក់ដឹកនាំគណបក្ស ដើម្បីជាប្រយោជន៍របស់គណបក្ស។

ព្រះអង្គម្ចាស់ នរោត្ដម រណឫទ្ធិ ត្រូវបានប្រភពមួយ ដែលស្និតនឹងរចនាសម្ព័ន្ធចាស់គណបក្ស និងស្និតនឹងលោក ញ៉ឹក ប៊ុនឆៃ ថ្លែងអះអាងថា ព្រះអង្គបានតែងតាំង អគ្គលេខាប្រតិបត្តិ លោក ហាយ សាក់ និងបាន​រំលាយ​គណៈ​កម្មាធិការនាយក និងអចិន្ត្រៃយ៍ ដែលមានស្រាប់របស់គណបក្ស ដោយអត្តនោម័តអង្គឯង និងមិនបានឆ្លង​យោបល់ ជាមួយ​សមាជិក​គណៈកម្មការនាយក និងអចិន្ត្រៃយ៍ទេ។

ទាក់ទងនឹងបញ្ហានេះ ព្រះអង្គម្ចាស់រណឫទ្ធិ បានមានបន្ទូលប្រាប់សារព័ត៌មានក្នុងស្រុកមួយថា នោះមិនមែន​ជា​ការ​រំលាយទេ តែជាការកែសម្រួល ល័ក្ខន្តិកៈ រចនាសម័្ពន្ធ និងសមាសភាព គណៈកម្មាធិការនាយកប៉ុណ្ណោះ។ ការ​កែ​សម្រួល​នេះ ជាតួនាទីរបស់គណៈកម្មការចំពោះកិច្ច ដែលព្រះអង្គបានបង្កើតឡើង ក្នុងនោះមានលោក យូរ ហុកគ្រី និងលោក អ៊ឹង ទាសៀម ជាអ្នកដឹកនាំ និងមានតំណាងរបស់ព្រះអង្គ និងអនុប្រធានទាំងពីរ​ចូលរួមជា​សមាជិក។

ចំពោះការកែសម្រួលនោះ ត្រូវបានសម្ដេចក្រុមព្រះ នរោត្ដម រណឫទ្ធិ អះអាងទៀតថា នឹងស្នើសុំឲ្យកែ​សម្រួល​គណៈកម្មាធិការនាយក ដែលបច្ចុប្បន្ននៅសល់ ២៥៣នាក់ មកត្រឹមតែ ២៧នាក់ប៉ុណ្ណោះ ដើម្បីមាន​ប្រសិទ្ធិភាព​ក្នុងការងារ។ ព្រះអង្គមានបន្ទូលថា កាលមុន គណៈកម្មាធិការនាយក របស់គណបក្សហ្វ៊ុនស៊ិនប៉ិច មានសមាជិក​រហូតដល់ ជាង៤០០នាក់ បន្ទាប់មក បានកែសម្រួលមកនៅត្រឹម២៥៣នាក់ តែព្រះអង្គនឹងស្នើឲ្យបង្រួម មកនៅ​ត្រឹមតែ ២៧នាក់ បានហើយ។

សូមបញ្ជាក់ដែរថា ក្រសួងមហាផ្ទៃនៃប្រទេសកម្ពុជា បានប្រកាស​ទទួលស្គាល់ជាផ្លូវការ ​សម្ដេចក្រុមព្រះ ជា​ប្រធាន​គណបក្ស​ហ្វ៊ុនស៊ិនប៉ិចជាថ្មី ​នៅក្នុងលិខិត​របស់​ក្រសួង​មួយច្បាប់ ចេញផ្សាយ​ថ្ងៃ​ទី​១៩ ខែ​កុម្ភៈ ឆ្នាំ​២០១៥ ហើយដែល​ទើបនឹង​ចេញ​ផ្សាយជាសាធារណៈ ក្នុងចុងសប្ដាហ៍កន្លងមកនេះ។ លិខិតជូនដំណឹងរបស់ក្រសួងនេះ ដូចជាបានមក​បិទបញ្ចាប់ នូវ​ការលើកឡើង នៅក្នុងលិខិតមួយ របស់លេខាធិការដ្ឋានគណបក្សហ្វុនស៊ីនប៉ិចខ្លួនឯង ដែលថា ក្រសួង​មហាផ្ទៃ​នៅ​មិនទាន់ទទួលស្គាល់ សេចក្ដីសម្រេចរបស់អង្គសមាជវិសមញ្ញ ថ្ងៃទី១៩ ខែមករា ឆ្នាំ២០១៥ របស់​គណបក្ស​នេះ នៅ​ឡើយ៕