ដង្កូវដែលមានប្រវែង ១សង់ទីម៉ែត្រ មួយក្បាល ត្រូវបានគ្រូពេទ្យវះយកចេញ ពីខួរក្បាលរបស់បុរស ជនជាតិអង់គ្លេស វ័យ៥០ឆ្នាំម្នាក់ បន្ទាប់ពីបុរសនេះ បានទៅពិគ្រោះជាមួយគ្រូពេទ្យរបស់ខ្លួន ពីអាការៈចុកចាប់ក្នុងក្បាលជាខ្លាំង។ គ្រូ​ពេទ្យ​បានរកឃើញថា ដង្គូវប្រភេទ Spirometra erinaceieuropei បានចូលទៅរស់នៅ ធ្វើរូងនៅ៥សង់ទីម៉ែត្រ និងធ្វើ​ការ​ផ្លាស់ទី ពីឆ្វេងមកស្ដាំ និងពីស្ដាំមកឆ្វេង ក្នុងខួរក្បាលរបស់បុរសអ្នកជំងឺ តាំងពីជាង៤ឆ្នាំមកហើយ។

ករណីដ៏ចម្លែកនេះ ទើបតែមានកើតជាលើកទីមួយ នៅក្នុងចក្រភពអង់គ្លេស។ ប៉ុន្តែបើគេរាប់ ចាប់តាំងពីឆ្នាំ១៩៥៣មក ករណីរបៀបនេះ បានកើតឡើងចំនួន៣០០ដងហើយ នៅក្នុងពិភពេលោកទាំងមូល។ ដង្កូវនេះ នឹងធ្វើឲ្យរលាក​ប្រព័ន្ធ​ប្រសាទ ហើយប្រសិនជាវាចូលទៅដល់ខួរក្បាល វានឹងបង្កឲ្យមនុស្សនោះ បាត់ការចងចាំ និងមានការចុកចាប់​យ៉ាង​ខ្លាំង នៅក្នុងក្បាល។ ដោយសារអការៈរបស់សត្វចង្រៃនេះ មិនសូវសម្បូរកើតនោះ ភាពអាថ៌កំបាំងរបស់វា ក៏មិនទាន់​ត្រូវបានអ្នកវិទ្យាសាស្ត្ររកឃើញនៅឡើយ ជាពិសេសគេមិនអាចដឹងថា តើវាមានជីវិត រស់និងស្លាប់របៀបម៉េច។

ប៉ុន្តែគេអាចដឹងបានថា វាអាចនឹងចូលមកក្នុងខ្លួនមនុស្សបាន នៅបន្ទាប់ពីមនុស្សទទួលទាន សាច់ ឬគ្រឿងក្លែមឆៅ ដែលទុកចោលរហូតមានមេរោគ មកតោង ឬតំណក់ថ្នាំបូរាណម្យ៉ាងរបស់ចិន ដាក់បន្ដក់ចូលភ្នែក ដើម្បីជួយ​ព្យាបាល​ជំងឺភ្នែកជាដើម។

សម្រាប់ប្រទេសអង់គ្លេស ជាករណីដែលគ្មាននរណាស្មានដល់។ លោកវេជ្ជបណ្ឌិត Effrossyni Gkrania-Klotsas មក​ពីមន្ទីរពេទ្យAddenbrooke ក្នុងក្រុង Cambridge ដែលបានយកដង្កូវនោះពីក្បាលបុរស បាននិយាយថា៖ «យើងមិន​បាន​​នឹកគិតថា នឹងអាចរកបាន នូវប្រភេទជម្ងឺរបៀបនេះ នៅចក្រភពអង់គ្លេសទេ ប៉ុន្តែការវិវត្តន៍នៃដំណើរកំសាន្ត មេរោគ​ដែលគេមិនស្គាល់របៀបនេះ អាចនឹងពន្លេចខ្លួនឲ្យឃើញម្ដងម្កាល»។

សត្វល្អិតដ៏ចម្លែកនេះ ត្រូវបានមន្ទីរពេទ្យប្រគល់ទៅឲ្យ វិទ្យាស្ថាន Wellcome Trust Sanger Institute ដើម្បីស្រាវជ្រាវ​រកពីដំណើរជីវិតរបស់វា និងឈានទៅរកការព្យាបាល សម្រាប់អ្នកជម្ងឺក្រោយៗទៀត៕