ទស្សនៈ​ពលរដ្ឋ​កម្ពុជា ជុំវិញ​ការ​មក​ដល់​នៃ​ប្រធានាធិបតី​អាមេរិក បារ៉ាក់ អូបាម៉ា

បញ្ហាជម្លោះដីធ្លី ប្រព័ន្ធតុលាការមិនឯករាជ្យ អំពើរំលោភសិទ្ធិមនុស្ស និងបញ្ហាមួយចំនួនផ្សេងៗទៀត សុទ្ធតែជារបៀបវារះ ដែលប្រជាជនកម្ពុជា​អ្នករងគ្រោះ នឹងដំណោះស្រាយក្នុងស្រុកមិនបានផលនោះ ចង់ឲ្យមេដឹកនាំប្រទេស​មហាអំណាចធំៗ​មួយចំនូន ជាពិសេស ប្រធានាធិបតីអាមេរិក លោកបារ៉ាក អូបាម៉ា(Barack Obama) យកមកពិភាក្សា ក្នុងកិច្ចប្រជុំកំពួល​អាស៊ានលើកទី២១ ដែលកម្ពុជាធ្វើជាម្ចាស់ផ្ទះ។ ទស្សនាវដ្តី មនោរម្យព័ងអាំងហ្វូ បានជួបសម្ហាសជាមួយប្រជាពលរដ្ឋ មួយ​ចំនួន ទាក់ទងទៅនឹងក្តីរំពឹងទុករបស់ពួកគាត់។
Loading...
  • ដោយ: សុខ ចាន់
  • កែប្រែចុងក្រោយ: November 16, 2012
  • ប្រធានបទ:
  • អត្ថបទ: មានបញ្ហា?
  • មតិ-យោបល់

បញ្ហាជម្លោះដីធ្លី ប្រព័ន្ធតុលាការមិនឯករាជ្យ អំពើរំលោភសិទ្ធិមនុស្ស និងបញ្ហាមួយចំនួនផ្សេងៗទៀត សុទ្ធតែជារបៀបវារះ ដែលប្រជាជនកម្ពុជា​អ្នករងគ្រោះ នឹងដំណោះស្រាយក្នុងស្រុកមិនបានផលនោះ ចង់ឲ្យមេដឹកនាំប្រទេស​មហាអំណាចធំៗ​មួយចំនូន ជាពិសេស ប្រធានាធិបតីអាមេរិក លោកបារ៉ាក អូបាម៉ា (Barack Obama) យកមកពិភាក្សា ក្នុងកិច្ចប្រជុំកំពួល​អាស៊ានលើកទី២១ ដែលកម្ពុជាធ្វើជាម្ចាស់ផ្ទះ។ ទស្សនាវដ្តី មនោរម្យព័ងអាំងហ្វូ បានជួបសម្ភាសជាមួយប្រជាពលរដ្ឋ មួយ​ចំនួន ទាក់ទងទៅនឹងក្តីរំពឹងទុករបស់ពួកគាត់។


កម្ពុជារៀបចំ «កិច្ចប្រជុំកំពូលអាស៊ាន» ថ្ងៃទី១៨-២០វិច្ឆិកា។ នេះជារូបសញ្ញារបស់អាស៊ាន រៀបចំក្នុងសួនច្បារ
នៅពីមុខវិមានសន្តិភាពរបស់រដ្ឋាភិបាល។ រូបថត MONOROOM.info/ Phnom Thom។

លោកព្រំវាសនា ជានិស្សិតទើបបញ្ចប់ការសិក្សា នៅសាកលវិទ្យាល័យធនធានមនុស្ស បានបញ្ចេញទស្សនៈថា «ខ្ញុំគិតថា ការមកដល់របស់ប្រធានធិបតីបារ៉ាក អូបាម៉ា(Barack Obama ) គឺល្អ ព្រោះវានឹងជួយ ឲ្យបញ្ហាសិទ្ធិមនុស្ស និងបញ្ហារំលោភ​ដីធ្លី ដែលកើតមានក្នុងប្រទេសកម្ពុជាប្រសើរឡើង។ ខ្ញុំសង្ឃឹមថាលោក បារ៉ាក អូបាម៉ា នឹងក្រឡេកមើលទៅ (លើបញ្ហា) សម្បទាន​ដីធ្លី ដែលប៉ះពាល់ដល់ប្រជាពលរដ្ឋ។ ទឹកមាត់របស់ លោកបារ៉ាក អូបាម៉ា ប្រៃ។ ដូច្នេះ បញ្ហាអាស៊ាន ក៏ដូចជា​បញ្ហាប្រទេសកម្ពុជានឹងល្អឡើង នៅក្រោយកិច្ចប្រជុំនេះ។»

ដោយឡែកចំពោះ អ្នកស្រីទេព វណ្ណីដែលជាតំណាងរងគ្រោះពីជម្លោះដីធ្លី នៅតំបន់បឹងកកវិញ បានបញ្ចេញក្តីសង្ឃឹម​របស់​ពួកគាត់ ថាចង់ «សុំឲ្យសហរដ្ឋអាមេរិកបន្តជួយគាំទ្រ និងដោះស្រាយជម្លោះដ៏រុំារ៉ៃ ដល់ប្រជាជនបឹងកក់ដែល រដ្ឋាភិបាល​កម្ពុជា​កំពុងរំលោភសិទ្ធិដីធ្លី។ ខ្ញុំសង្ឃឹម ៧០% ពីលោកបារ៉ាក អូបាម៉ា»។

និស្សិតស្ត្រីមួយរូបទៀត ដែលរៀននៅឯសាកលវិទ្យាល័យភូមិន្ទភ្នំពេញ ក្នុងលក្ខខ័ណ្ឌមិនបញ្ចេញឈ្មោះ នាងបានលើក​ឡើង​ថា «វត្តមានរបស់លោកប្រធានាធិបតី សហរដ្ឋអាមេរិកបារ៉ាក់ អូបាម៉ា នឹងជួយដោះស្រាយជម្លោះដីធ្លីនៅបឹងកក និង​សេរីភាពសិទ្ធិមនុស្ស។ ខ្ញុំសង្ឃឹមពី ៣០ទៅ ៤០%។ ប្រទេសយើងអាចនឹងអនុវត្ត គោលនយោបាយសិទ្ធិមនុស្សបានល្អ បន្តិចម្តងៗ ព្រោះអីយើងទទួលជំនួយ ពីសហរដ្ឋអាមេរិកច្រើនដែរ។»

លោកពូ ឡុង ខន ប្រជាពលរដ្ឋម្នាក់ រស់នៅក្នុងរាជធានីភ្នំពេញ បានផ្ដល់ក្ដីសង្ឃឹម ប្រមាណជា៧០% ពីវត្តមានរបស់លោក​ប្រធានាធិបតី បារ៉ាក អូបាម៉ាថា «គាត់នឹងជួយធ្វើឲ្យប្រសើរឡើង នូវបញ្ហាសិទ្ធិមនុស្ស នៅក្នុងប្រទេសកម្ពុជា»។ លោកបាន​ និយាយយោងជាពិសេស ទៅដល់បញ្ហានយោបាយក្នុងប្រទេស ដែលទាក់ទង នឹងការបោះឆ្នោតនាពេលខាងមុខ។ ជាមួយ​នឹងកិច្ចអន្តរាគមរបស់ ប្រធានាធិបតីអាមេរិក លោកពូសង្ឃឹមថា «​មេដឹកនាំគណបក្សសង្គ្រោះជាតិ លោកសមរង្សី អាចនឹង​ត្រឡប់ចូលស្រុកវិញ ដើម្បីប្រកួតប្រជែងការបោះឆ្នោតថ្នាក់ជាតិ ឆ្នាំ២០១៣ខាងមុខ។ លោកអូបាម៉ានឹងជជែក ពីការផ្លាស់​ប្តូរ​សមាសភាព គណគម្មាធិការជាតិរៀបចំការបោះឆ្នោត ហៅ​កាត់​ថា គ ជ ប នៅប្រទេសកម្ពុជា»។

ចំណែកលោក គិត ទួច មន្រ្តីជាន់ខ្ពស់ នៃគម្រោងច្បាប់ដីធ្លី និងធនធានធម្មជាតិ របស់មជ្ឍមណ្ឌលអប់រំច្បាប់សម្រាប់​សហគមន៏ លោកមិនសូវជាមានសុទិត្ថិនិយមប៉ុន្មាន ចំពោះប្រធានាធិបតីអាមេរិក ថានឹងយកចិត្តទុកដាក់ ទៅលើបញ្ហា​ដែលកើតមាននៅក្នុងប្រទេសកម្ពុជាប៉ុន្មានទេ។ លោកបានបញ្ចេញទស្សនៈថា «ខ្ញុំគិតថាមេដឹកនាំសហរដ្ឋអាមេរិក នឹង​ផ្តោតទៅលើបញ្ហាធំៗ ដែលកើតមានឡើង ក្នុងតំបន់អាស៊ី និងអាស៊ីអាគ្នេយ៏ដូចជា សមុទ្រចិនខាងត្បូង បញ្ហាជម្លោះ​សាសនា ក៏ដូចជាបញ្ហាសេដ្ឋកិច្ច ច្រើនជាងពិភាក្សា ទៅបញ្ហាសិទ្ធិមនុស្ស អំពើរំលោភដីធ្លីនៅក្នុងប្រទេសកម្ពុជា»៕

------------------------------------------------------------
ដោយ៖ សុខ ចាន់ - ភ្នំពេញថ្ងៃទី១៦ វិច្ឆិកា ឆ្នាំ២០១២
រក្សាសិទ្ធិគ្រប់យ៉ាង ដោយមនោរម្យព័ងអាំងហ្វូ។

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...