លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា ក្នុងកិច្ចសម្ភាសជាមួយ​ទស្សនាវដ្តី​មនោរម្យ.អាំងហ្វូ​នាព្រឹកថ្ងៃទី២១ ខែកុម្ភៈនេះ បានលើកឡើងថា មិនចំពោះតែលោក អេឡិច ដែលជាជនជាតិអេស្ប៉ាញនោះទេ បណ្តា​ជនបរទេសទាំងអស់ ដែលស្នាក់នៅកម្ពុជា ហើយហួសសុពលភាព នៃការស្នាក់នៅនោះ ចាំបាច់ត្រូវ​ធ្វើការ​ស្នើសុំជាថ្មី។ តែនេះជាការ«ស្នើសុំ» មិនមែនជាការ«ទាមទារ»នោះឡើយ។

ដោយឡែកចំពោះការស្នើសុំនោះ ជាការសម្រេចរបស់រាជរដ្ឋាភិបាល ដែលជា«ម្ចាស់»ប្រទេស ថាតើគួឲ្យបន្ត ឬ​មិន​គួឲ្យបន្ត។ ករណីនេះ ក៏ត្រូវធ្វើការផ្អែកលើគោលការណ៍ជាក់លាក់មួយ នៃជនបរទេសនោះ ដែលត្រូវបនុ្ត​និង​ស្នាក់នៅកម្ពុជា ស្របតាមច្បាប់អន្តោប្រវេសន៍ និងច្បាប់នានារបស់ប្រទេសកម្ពុជានោះដែរ។

អ្នកនាំពាក្យរូបនេះ បានបញ្ជាក់ដូច្នេះថា៖ «អេឡិច ជាជនបរទេសឯកជនធម្មតាម្នាក់ មិនមែនជាជនបរទេស ដែល​តំណាងឲ្យប្រទេសអេស្ប៉ាញ មកធ្វើការនៅកម្ពុជាឡើយ។ (...) បើគាត់ជាអ្នកតំណាង ឲ្យប្រទេសអេស្ប៉ាញនោះ រដ្ឋាភិបាលកម្ពុជា ក៏នឹងធ្វើការពិចារណាឡើងវិញ ពីការបន្តទិដ្ឋការរបស់គាត់ដែរ ដើម្បីរក្សាទំនាក់ទំនងការទូត រវាងប្រទេសទាំងពីរ។ (...) តែនេះ គាត់ជាបុគ្គលឯកជន មកស្នាក់នៅកម្ពុជា ជាង១២ឆ្នាំ តើគាត់មកក្នុងគោល​បំណង​អ្វី? ក្នុង១២ឆ្នាំនេះ តើគាត់រស់បាន ដោយសារអ្វី? មិនមែនគាត់ មិនមានប្រយោជន៍នោះទេ បើមិនមាន​ការ​ជួយ ជាប្រយោជន៍ពីក្រៅ ក៏គាត់មិនអាចរស់នៅកម្ពុជា បានរហូតដល់១២ឆ្នាំនោះដែរ។»

មន្រ្តីនាំពាក្យ ដែលធ្លាប់ជាអ្នកវិភាគ ប្រចាំស្ថានីយទូរទស្សន៍ក្នុងស្រុករូបនេះ បានបន្តថា លោកគោរពគោលគំនិត និងភាពស្រលាញ់បរិដ្ឋាន របស់លោក អេឡិច សម្រាប់បរិដ្ឋាន និងព្រៃឈើនៅកម្ពុជា។ តែអ្វីដែលលោក ត្រូវ​ធ្វើ​ការ​ចោទសួរនោះ នៅត្រង់ថា តើប្រជាពលរដ្ឋខ្មែររាប់លាននាក់ ដែលជាម្ចាស់ប្រទេស មិនស្រលាញ់ព្រៃឈើខ្មែរ ឬស្រលាញ់បរិដ្ឋានខ្មែរ ដូចជនបរទេសម្នាក់នេះ ឬមិនស្មើរនឹងជនបរទេសរូបនេះទេឬ?

លោកថា មិនសម្រាប់តែកម្ពុជានោះទេ ដែលត្រូវធ្វើការពិចារណាជាថ្មី ទៅដល់ជនបរទេសណាម្នាក់ ដែលត្រូវ​បន្ត​ទិដ្ឋការ សម្រាប់ការស្នាក់នៅរបស់ពួកគេ នៅកម្ពុជានោះ ក្នុងបណ្តាប្រទេសមួយចំនួន ដូចជាជប៉ុន អូស្ត្រាលី អាមេរិក បារាំងជាដើម មិនថាសម្រាប់តែជនបរទេសទៅស្នាក់នៅ ទៅរកស៊ី ឬធ្វើការនោះទេ សូម្បីតែទៅសិក្សា ក៏គេត្រូវយកចិត្តទុកដាក់ ក្នុងការគ្រប់គ្រងទៅលើជនជាតិបរទេសទាំងនោះដែរ។

មន្រ្តីនាំពាក្យគណបក្សប្រជាជនកម្ពុជា ដែលទើបនឹងតែងតាំងថ្មីនេះ លោកបានលើកឡើងថា ចំពោះបញ្ហា លោក អេឡិច រដ្ឋាភិបាលក៏មិនមែនបដិសេធទាំងស្រុងនោះដែរ តែត្រូវចាកចេញមួយរយៈ និងស្នើជាសុំទិដ្ឋាការ​ជាថ្មី​មក​កម្ពុជា។ ការស្នើសុំទិដ្ឋការថ្មីនេះ ធ្វើឡើងព្រមគ្នា ជាមួយនឹងការបង្ហាញនូវកិច្ចការនានា ដែលខ្លួននឹងត្រូវស្នើ​សុំ​ទិដ្ឋាការ មករស់នៅបន្តនៅកម្ពុជា។ ឯការសម្រេចឲ្យ ឬមិនឲ្យអាស្រ័យលើកម្ពុជា។ កម្ពុជាមានសិទ្ធិសម្រេច​ពេញ​លេញ ដោយភ្ជាប់ជាមួយនឹងហេតុផលសមស្របណាមួយ ដែលអាចទទួលយកបាន ចំពោះការស្នើសុំនោះ។

លោក ឈឹម ផលវរុណ បានបង្ហាញនូវភាពសោកស្តាយ ចំពោះអនុប្រធានទីមួយនៃរដ្ឋសភា និងប្រធាន​ក្រុម​តំណាង​រាស្រ្ត មតិភាគតិចនៃរដ្ឋសភា ដែលមិនបានគិតគួរ ឲ្យបានគ្រប់ជ្រុងជ្រោយ មុននឹងធ្វើការគាំទ្រ ឬរំខាន​ដល់​អង្គព្រះមហាក្សត្រ ព្រោះតែការស្នើសុំ នៃបុគ្គលបរទេសម្នាក់នេះ។ លោកបញ្ជាក់ដូច្នេះថា៖ «កុំយក​បញ្ហា​នៃ​បុគ្គលបរទេសម្នាក់នេះ មកស្វែងរកចំណេញ ផ្នៃកនយោបាយរបស់ខ្លួន។ (...) កុំទាញបញ្ហានេះ មកភ្ជាប់នឹង​រឿង​នយោបាយ។ (...) នេះមិនមែនជានុយនយោបាយ ដែលគណបក្សប្រឆាំង ត្រូវធ្វើការព្យាយាមទាញយកនោះទេ។ (...) វាជារឿងច្បាប់របស់កម្ពុជា ដែលមាន ដែលនឹងត្រូវអនុវត្ត។ (...) ខ្ញុំស្វាគមគមន៍ ចំពោះសមាជិកនៃគណបក្ស​ប្រឆាំងក្នុងរដ្ឋសភា ដែលមានចេតនា និងគំនិតចង់ឲ្យមាន ការអនុវត្តច្បាប់អន្តោប្រវេសន៍។ (...) គណបក្ស​ប្រឆាំង​ត្រូវរួមគ្នា ការពារ គោរព និងពង្រឹងច្បាប់អន្តោប្រវេសន៍នេះ ដើម្បីសង្គមកម្ពុជាទាំងអស់គ្នា។»៕