កុមារ​ជាង៣០០នាក់ កោរ​សក់​បួស​ក្នុង​ថ្ងៃ​តែ​មួយ នៅ​វត្ត​ពុទ្ធ​មណ្ឌល

កុមារាកុមារីជាង ៣០០នាក់ បានសម្រេចចិត្តផ្អាកការសិក្សា មកបួសធ្វើជាព្រះសង្ឃ និងដូនជីទាំងវ័យនៅក្មេងខ្ចី ដើម្បីសងគុណឪពុកម្តាយរបស់ពួកគេ។
Loading...
  • ដោយ: ក. វិច្ចនី អត្ថបទ៖ក. វិច្ចនី ([email protected]) - យកការណ៍៖ហេង វុទ្ធី - ភ្នំពេញ ថ្ងៃទី ២១ កុម្ភៈ
  • កែប្រែចុងក្រោយ: February 21, 2015
  • ប្រធានបទ: សាសនា
  • អត្ថបទ: មានបញ្ហា?
  • មតិ-យោបល់

និយាយថា គួរឲ្យកោតសរសើរក្មេងៗទាំងនោះក៏បាន ព្រោះពួកគេស្ថិតនៅក្មេងវ័យ តែបានដាច់ចិត្តលះបង់​ សេចក្តីត្រូវការរបស់ខ្លួន ទៅបួសជាព្រះសង្ឃ និងដូនជី ដើម្បីជួយស្រោចស្រង់បាបកម្ម របស់មាតាបិតា របស់​ពួកគេ។ កុមារមួយចំនួន និយាយមិនទាន់ច្បាស់ ហើយខ្លះទៀត នៅហៀរសំបោរនៅឡើយ។

កុមារទាំងជាង ៣០០នាក់ ក្នុងនោះមានក្មេងស្រី ១០០នាក់ ដែលបានមកបួស ធ្វើជាដូនជីដែរនោះ ត្រូវបាន​ព្រះសង្ឃ គង់នៅវត្តពុទ្ធមណ្ឌលកម្ពុជា ដែលស្ថិតនៅភូមិដីឥដ្ឋ ឃុំដីឥដ្ឋ ស្រុកគៀនស្វាយ ខេត្តកណ្តាល ធ្វើ​ពិធី​បំបួសឲ្យពួកគេតំណាលគ្នា ក្នុងថ្ងៃតែមួយ នៅព្រឹកថ្ងៃទី ២១ ខែកុម្ភៈនេះ។ ពិធីសាសនានេះ បានប្រព្រឹត្ត​ទៅ​យ៉ាង​ទ្រហឹងអើងកង ដោយសារតែ ក្រុមអ្នកបួសស្ថិតនៅវ័យក្មេង ដោយមានខ្លះ និយាយ​មិនទាន់ស្តាប់​គ្នាបានផង។ ក្នុងចំណោមកុមារទាំងនោះ អ្នកមានវ័យច្រើនជាងគេ មានអាយុត្រឹម ១៧ឆ្នាំ និងអ្នកក្មេងជាងគេ មានអាយុ ៣ឆ្នាំ។

ប៉ុន្តែ ក្រុមអាណាព្យាបាល របស់អ្នកបួស បាននិយាយថា អ្នកបួសតូចៗទាំងនោះ បានយល់ដោយខ្លួនគេថា ការកោរសក់សាងផ្នួស នឹងឧទ្ធិសកុសលផលបុណ្យ ទៅដល់ឪពុកម្តាយ អ្នកមានគុណ។ កុមារភាគច្រើន ត្រូវ​បានអាណាព្យាបាលអះអាងថា ពួកគេមានចិត្តមកបួសនេះ ដោយសុទ្ធាជ្រះថ្លាខ្លួនឯង។

ម្ដាយកុមារអ្នកបួសមួយរូប អ្នកស្រី ឃឹម ធា បានប្រាប់ទស្សនាវដ្តីមនោរម្យ.អាំងហ្វូទាំងអួលដើមករថា អ្នកស្រី​សប្បាយចិត្តណាស់ ដែលកូនរបស់គាត់ហ៊ានលើកដៃ សុំគាត់មកបួសជាសង្ឃ។ អ្នកស្រីថា កូនរបស់គាត់​មាន​តែពីរនាក់ប៉ុណ្ណោះ ស្រីមួយ ប្រុសមួយ ហើយកូនប្រុស ដែលសុំគាត់មកបួសនេះ មានអាយុទើបតែ ១៣ ឆ្នាំ​នៅ​ឡើយទេ ប៉ុន្តែគេមានចិត្តជ្រះថ្លា សុំអ្នកកស្រីមកបួស។

អ្នកស្រី ឃឹម ធា បានបន្តថា ក្រុមគ្រួសាររបស់គាត់ បានស្រុះស្រួលគ្នាអស់ហើយ ក្នុងការយល់ព្រមឲ្យកូន​របស់ខ្លួន មកបួស ព្រោះពួកគាត់គិតថា សាសនាជាផ្លូវល្អមួយសំរាប់កូនរបស់គាត់ ហើយកូនរបស់គាត់​អាច​យល់ដឹង ពីធម៌ព្រះបានច្រើន និងអាចជួយចង្អុលបង្ហាញមនុស្សគ្រប់គ្នា ឲ្យប្រព្រឹត្តអំពើល្អ ម្យ៉ាងទៀត បួស​នេះ​មិនមែនមានន័យថា កូនប្រុសរបស់គាត់ ផ្តាច់ជាមួយនឹងការសិក្សានោះទេ ប៉ុន្តែគេអាចរៀនសូត្របាន ដូច​ក្មេងដ៍ទៃទៀតដែរ។

រីឯលោកនេនតូចទើបនឹងបួសព្រះនាម សេង ចិត្រា ដែលមានព្រះជន្ម៣ វស្សា បានមានសង្ឃដីកា តបអ្នក​សារព័ត៌មាន​ទស្សនាវដ្ដី យ៉ាងសប្បាយរីករាយ ទាំងសម្លេងស្រួយស្រឹប គួឲ្យស្រលាញ់ថា ខ្លួននេនចង់មកបួស ធ្វើជាសង្ឃយូរឆ្នាំមកហើយ ហើយនេននឹងបួសសងគុណឪពុកម្តាយរបស់នេន ក្នុងរយៈពេល១០ព្រះវស្សា ទើបសឹកវិញ។ នេនតូចបន្ថែមថា នេនចង់គង់នៅក្នុងវត្តអារាមរហូត មិនយំទៅផ្ទះវិញទេ ព្រោះនេនស្រលាញ់​ព្រះសង្ឃ។

ឪពុករបស់នេនតូចខាងលើ លោក ស៊ិន សៀង បាននិយាយថា លោកគោរព និងស្រលាញ់ព្រះពុទ្ធសាសនា ដោយសារលោកធ្លាប់បានរៀនសូត្រ ចេះដឹង និងធ្លាប់បួសរៀននៅក្នុងវត្តពីមុនមក។ ដូច្នេះហើយ ទើបលោក​ចង់ឲ្យកូនរបស់លោក ក៏បានបួសរៀនដូចរូបលោកអញ្ចឹងដែរ។ ម្យ៉ាងទៀត កូនប្រុសតែមួយគត់របស់លោក ខ្លួនឯងចង់បួសខ្លាំងណាស់ ទើបលោកសម្រចចិត្តបំពេញ តាមបំណងរបស់កូនតែម្តង។

ចំណែកឯដូនជីវ័យក្មេងៗ ដែលទើបនឹងបួសវិញ មិនមានបំណងផ្តល់បទសម្ភាសន៍ ឲ្យអ្នកយកព័ត៌មាន​របស់​ទស្សនាវដ្ដីទេ ដោយទំនងជាលាក់ទុក នូវភាពអៀនប្រៀនរបស់ខ្លួន មិនចង់និយាយស្ដី។

គួបញ្ជាក់ថាពិធីបំបួសព្រះសង្ឃ និងដូនជីដែលមានចំនួនរាប់រយអង្គនេះ ក្នុងចំណោមនោះមាន​អង្គខ្លះ​បួស​ត្រឹម​តែ៧ថ្ងៃប៉ុណ្ណោះ ដើម្បីគ្រាន់តែមាននាម ថាបានបួសសងគុណឪពុកម្តាយ ប៉ុន្តែក៍មានអង្គខ្លះ ចង់បួស​ច្រើន​ឆ្នាំទៅមុខទៀតដែរ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...