បន្ទាប់ពីពលរដ្ឋធ្វើកាតវ៉ាទាមទារ ជាញឹកញាប់ រហូតដល់សាលាខេត្តនោះ ឥឡូវនេះ ចៅហ្វាយខេត្ត​បន្ទាយ​មាន​ជ័យ បានទម្លាក់រឿងរ៉ាវ ជម្លោះដីធ្លីដ៏រាំរ៉ៃមួយនេះ ទៅឲ្យចៅហ្វាយស្រុកទៅវិញ។ ដោយឡែក ចំពោះអភិបាល​ស្រុក​នេះ មេភូមិ និងមេឃុំ នៅមិនទាន់ផ្ដល់ ការអនុញ្ញាតណាមួយ ឲ្យប្រជាពលរដ្ឋ បានចូលជួបអភិបាល​ស្រុក​នៅ​ឡើយ។ នេះបើតាមការឲ្យដឹង ពីអ្នកភូមិថ្នល់បត់ ស្រុកអូជ្រៅ ខេត្តបន្ទាយមានជ័យ ដោយរាល់ការ​អះអាង​ទាំង​អស់ ពីថ្នាក់ខេត្ត ឬស្រុកនោះ ឃើញមានតែពាក្យសម្តី មិនទាន់មានជាឯកសាអ្វីទេ។

អ្នកស្រី ឡុង សុគន្ធី ជាតំណាងអ្នកភូមិ ដែលមានជម្លោះដីធ្លី ជាង១០០គ្រួសារ នៅភូមិថ្នល់បត់ ឃុំអូបីជាន់ ស្រុក​អូជ្រៅ ខេត្តបន្ទាយមានជ័យ បានឲ្យទស្សនាវដ្តីមនោរម្យ.អាំងហ្វូដឹង នៅថ្ងៃទី១៩ ខែកុម្ភៈ ឆ្នាំ២០១៥នេះថា ប្រជា​ពលរដ្ឋនៅក្នុងភូមិទាំងអស់គ្នា នៅតែបន្តភាពអស់សង្ឃឹមរបស់ពួកគេ បើទោះជាបានលឺសម្តី របស់អភិបាល​ខេត្ត​ថា «ចាំដោះស្រាយឲ្យ» នេះ ជាច្រើនលើកច្រើនសារហើយក៏ដោយ។ អ្នកស្រីបានថ្លែងថា៖ «តែលទ្ធផល នៅតែ​គ្មានដដែល»។

តំណាងខាងលើបានឲ្យដឹងទៀតថា រហូតមកដល់ពេលនេះ ពលរដ្ឋនៅមិនទាន់ឃើញមានការចុះ មកត្រូតពិនិត្យ​ដីធ្លីពលរដ្ឋ ឲ្យបានច្បាស់លាស់នៅឡើយ ពីសំណាក់អាជ្ញាធរខេត្តបន្ទាយមានជ័យ។

ការដែលមិនបានដោះស្រាយយ៉ាងនេះ ហើយប្រធានភូមិ ហាក់មិនអើពើមួយកម្រិតទៀត។ អ្នកស្រី សុគន្ធី បាន​ថ្លែង​ទៀតថា ដូចជាការជួបប្រជុំជាមួយថ្នាក់ស្រុក និងថ្នាក់ខេត្ត ពីបញ្ហាដីធ្លីទាំងនេះ នៅមានការលាក់បាំង មិន​ផ្តល់​ព័ត៍មាន ដល់អ្នកភូមិឲ្យដឹងផងទេ។ ប៉ុន្តែនៅទីបំផុត អភិបាលខេត្តបន្ទាយមានជ័យ លោក គោ ស៊ុំសារឿន បែរ​ជាបានបង្គាប់ ទៅអភិបាលស្រុកអូជ្រៅទៅវិញ ជាអ្នកទទួលបន្ទុក ដោះស្រាយបញ្ហានេះ ឲ្យពលរដ្ឋ។

ទស្សនាវដ្តីមិនអាចទាក់ទងទៅលោក អភិបាលស្រុកអូជ្រៅ លោក សាន ជាងហូរ បានទេ នៅថ្ងៃទី១៩កុម្ភៈនេះ ដោយទូរស័ព្ទរបស់លោក មិនអាចទាក់ទងបាន។ តែយ៉ាងណាក៏ដោយ ក៏ទស្សនាវដ្ដីនឹងស្វែងរកការបំភ្លឺ ពីបញ្ហា​ទាំងអស់នេះ ហើយនឹងចុះផ្សាយ នៅអត្ថបទក្រោយ។ គួរំលឹកដែថា អភិបាលស្រុកខាងលើ ទើបតែឡើងមក​កាន់​តំណែងថ្មី បានប្រមាណជាមួយសប្តាហ៍ប៉ុណ្ណោះ៕