បែក​ធ្លាយ​ថា ថោង សារ៉ាត់ បាន​គេច​ខ្លួន​តាម​រថយន្ត​សាម៉ុយ​ដឹក​ឪពុក​ម្តាយ​ខ្លួន?

លោក ថោង សារ៉ាត់ ទំនងជាអាចគេចខ្លួន តាមរថយនសាម៉ុយ ដែលដឹកឪពុកម្តាយខ្លួន ហើយព្យាយាម​ចាក​ចេញ​ពី​កម្ពុជា តាមច្រកព្រំដែនបាវិត ទៅប្រទេសវៀតណាម បន្ទាប់ពីមានការដោះលែង ឲ្យនៅក្រៅឃុំ​ជា​បណ្តោះ​អាសន្ន របស់​សាលា​ដំបូង​រាជធានី​ភ្នំពេញ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី១៨ កុម្ភៈ ២០១៥
  • កែប្រែចុងក្រោយ: February 18, 2015
  • ប្រធានបទ: ឧក្រិដ្ឋកម្ម
  • អត្ថបទ: មានបញ្ហា?
  • មតិ-យោបល់

តាមប្រភពព័ត៌មានក្រៅផ្លូវការមួយ ពីមន្ត្រីមួយរូប ដែលស្និតនឹងកងរាជអាវុធហត្ថ ច្រកព្រំដែនបាវិត ថ្លែងក្នុង​ល័ក្ខខ័ណ្ឌ​មិនបង្ហាញឈ្មោះ បានប្រាប់ទស្សនាវដ្តីមនោរម្យ.អាំងហ្វូថា នៅក្នុងដំណើរនៃការប៉ុនប៉ងគេចខ្លួន ចេញ​ទៅ​កាន់​ប្រទេសវៀតណាម ដែលជាប្រទេសកំណើត នៃឪពុកម្តាយលោក ថោង សារ៉ាតនោះ គេបាន​ឃើញ​បុរស​ម្នាក់ ដែលមានភិនភាគដូចគ្មា ទៅនឹងលោក ថោង សារ៉ាត់ បានចាកចេញពីឡានសាម៉ុយ ដែលដឹកឪពុក​ម្តាយ​លោក ថោង សារ៉ាត់ នោះ ហើយគេចខ្លួនបាត់តែម្តង។

ប្រភពនោះបន្តថា ការគេចខ្លួនរបស់បុរសនេះ ត្រូវបានធ្វើឡើងមុនពេលដែល ក្រុមសមត្ថកិច្ចចាប់ខ្លួន​ឪពុក​ម្តាយ លោក ថោង សារ៉ាត់ ត្រឡប់មករាជធានីភ្នំពេញវិញ។ មន្ត្រីរូបនេះ បានធ្វើការសន្និដ្ឋានថា ប្រហែល​អាច​ជាការ​រៀបចំ​ទុកជាមុន ក្នុងការជម្លៀសលោក ថោង សារ៉ាត់ ចេញពីកម្ពុជា ក្រោមលេសថា ត្រូវបញ្ជូនឪពុក​ម្តាយ​​របស់​លោក ថោង សារ៉ាត់ ទៅព្យាបាលជំងឺនៅប្រទេសវៀតណាមនោះ។

មន្ត្រីដដែល បានថ្លែងឲ្យដឹងទៀតថា៖ «សុទ្ធតែជាផែនការគេរៀបចំ ចង់រំដោះ ថោង សារ៉ាត់ ចេញពីស្រុក​ខ្មែរ»។

មិនអាចទាក់ទងសុំការបំភ្លឺ ជុំវិញការបង្ហើបរបស់មន្ត្រីខាងលើ ពីលោក ខៀវ សុភ័គ អ្នកនាំពាក្យក្រសួង​មហា​ផ្ទៃ បានទេ នារសៀលថ្ងៃទី១៨ ខែកុម្ភៈនេះ ដោយទូរស័ព្ទរបស់លោកគ្មានអ្នកទទួល។

ដំណឹងបែកធ្លាយនេះ មិនត្រូវបានក្រុមមន្ត្រីអង្កការសង្គមស៊ីវិល ដែលធ្វើការស្និត នឹងសំនុំរឿងយុត្តិធម៌​ជា​ច្រើន​នោះ ធ្វើការអត្ថាធិប្បាយអ្វីទេ។ សម្រាប់ លោក អ៊ូ វីរៈ អតីតប្រធានមជ្ឈមណ្ឌលសិទ្ធិមនុស្សកម្ពុជា វិញ លោក​គ្រាន់​តែបានសម្ដែង ការយល់ឃើញរបស់លោក ប្រាប់ទស្សនាវដ្ដីថា អាចជាចេតនាមួយ ដែលមាន​គម្រោង​រៀប​ចំ​ទុកជាមុន ក្នុងការព្យាយាមចាកចេញពីកម្ពុជា ទៅកាន់ប្រទេសវៀតណាម នៃក្រុម​គ្រួសារ​ឪពុក​ម្តាយលោក ថោង សារ៉ាត់។ លោក វីរៈ បានថ្លែងយោងមូលហេតុថា អ្នកទាំងពីរជាជនជាតិវៀតណាម​ដែល​មានប្រាក់ ដូច្នេះ​គាត់មានសិទ្ធិ និងអាចមានផ្ទះ នៅប្រទេសវៀតណាម។ ករណីដែលថាមានការបន្លំខ្លួន ជា​មួយ​នឹងគម្រោងនេះ លោកក៏មិនបានបង្ហាញថា ពិត ជាមានចេតនាក្នុងការរំដោះលោក ថោង សារ៉ាត់ នោះ​ឡើយ។

សូមបញ្ជាក់ដែរថា ការចាប់ខ្លួនឪពុកម្តាយលោក ថោង សារ៉ាត់ ត្រឡប់មកភ្នំពេញវិញ ខណៈពួកគេទាំងពីរ មាន​បំណងឆ្លងដែន ចូលទៅប្រទេសវៀតណាម ដោយមិនគោរពតាមបទបញ្ជាតុលាការ ដែលមិនអនុញ្ញាត​ឲ្យចាក​ចេញ ពីប្រទេសកម្ពុជានោះ។ ការចាប់ខ្លួន និងបញ្ជូនទៅកាន់ពន្ធនាគារជាលើកទីពីនេះ បន្ទាប់ពី​មាន​ការថ្លែង​ក្ដៅ​ក្រហាយ របស់លោករដ្ឋមន្រ្តីក្រសួងមហាផ្ទៃ លោក ស ខេង ចំពោះសាលាដំបូងរាជធានីភ្នំពេញ ថា​មាន​ភាពមិន​ប្រក្រតី​ក្នុងការអនុញ្ញាត ឲ្យឪពុកម្តាយលោក ថោង សារ៉ាត់ នៅក្រៅឃុំ។

តាមការបញ្ជាក់របស់លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្ស លីកាដូ បានអះអាងថា សមត្ថកិច្ចជំនាញ បានចាប់ខ្លួនលោក ថោង ចំរើន និងលោកស្រី កែវ សារី ដែលជា​ឪពុក​ម្តាយ​លោក ថោង សារ៉ាត់ មកវិញនៅព្រំដែនបាវិត ដោយពួកគេមានបំណង ឆ្លងទៅកាន់ប្រទេស​វៀតណាម កាល​ពី​ថ្ងៃទី ១៥ កុម្ភៈ។ អ្នកទាំងពីរត្រូវបានលោក លី សុខឡេង ចៅក្រមស៊ើបអង្កេត នៃសាលា​ដំបូងរាជធានី​ភ្នំពេញ ដោះលែងឲ្យនៅក្រៅឃុំបណ្តោះអាសន្ន កាលពីម៉ោង៩ព្រឹក ថ្ងៃទី៧ ខែកុម្ភៈ កន្លងទៅ ក្រោមហេតុផល​ជំងឺ​​ប្រចាំកាយ និងឲ្យស្នាក់នៅ ក្នុងបុរី៩៩៩ សង្កាត់ចាក់អង្រែក្រោម ខណ្ឌមានជ័យ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...