មន្ទីររៀបចំដែនដីនគរូបនីយកម្ម និងសំណង់រាជធានី បានចេញប្លង់ថ្មី ឲ្យមន្ទីរពេទ្យបង្អែករាជធានីភ្នំពេញ ដែល​គេធ្លាប់ស្គាល់ថាជាសម្ភពក្រុង ដាក់ឲ្យប្រើប្រាស់នាពេលថ្មីៗនេះ ប៉ុន្តែប្លង់មន្ទីរពេទ្យថ្មី ត្រូវបានបុគ្គលិក​នៃ​មន្ទីរពេទ្យនេះ បដិសេធមិនព្រមទទួលយក មកប្រើប្រាស់នោះទេ។ បុគ្គលិកនៃមន្ទីរពេទ្យនេះ បាន​ធ្វើការ​បដិសេធ​ព្រមៗគ្នាថា ប្លង់ថ្មីដែលមន្ទីររៀបចំដែនដី នគរូបនីយកម្ម បានចេញឲ្យថ្មីនោះ បានលេបត្របាក់​យក​អាគាខាងមុខនៃមន្ទីរពេទ្យទាំងស្រុង ដោយនៅក្នុងប្លង់នេះ មាននៅសល់តែអាគារផ្នែកខាងក្រោយ។

លោក ហូរ វ៉ាន់ មានការភ្ជាក់ផ្អើលយ៉ាងខ្លាំង នៅពេលដែលលោកបានទទួលញត្តិ ពីក្រុមបុគ្គលិកនៃ​មន្ទីរ​ពេទ្យ​មួយនេះ កាលពីល្ងាចម៉ោង ៥:០០ថ្ងៃទី ០៧ កុម្ភៈនេះ ដែលពួកគេបានប្តឹង ទៅគណៈកម្មកាទី ១០ នៃរដ្ឋសភា មិនព្រមទទួលយកប្លង់ថ្មីនេះ និងបានស្នើឲ្យជួយបំភ្លឺ គម្រោងប្លង់មន្ទីរពេទ្យទាំងមូលផងដែរ។ លោកថា​ លោក​សុំស្នើ ឲ្យមន្ទីររៀបចំដែនដីនគរូបនីយកម្ម និងសំណង់រាជធានី ពិនិត្យប្លង់មន្ទីរពេទ្យនេះឡើងវិញ ព្រោះ​តាមការពិនិត្យរបស់លោក បានឃើញថា បន្ទាប់ពីមន្ទីរបានចេញប្លង់ថ្មីនេះមានភាពមិនប្រក្រតីពីរយ៉ាង៖

- ភាពមិនប្រក្រតីទី០១ លោកថា មន្ទីររៀបចំដែនដីនគរូបនីយកម្ម និងសំណង់រាជធានី បានចេញ​សេចក្តី​ប្រកាស​ប្លង់មន្ទីរពេទ្យនេះ តាំងពីថ្ងៃទី ០៨ ខែមករាឆ្នាំ ២០១៥ មកម្លេះ ប៉ុន្តែបុគ្គលិកនៅមន្ទីរពទ្យនេះ ទើបតែ​ដឹង និងបានឃើញសេចក្តីប្រកាស នៅថ្ងៃទី ០៦ ខែកុម្ភៈនេះ ប៉ុណ្ណោះ។

- ភាពមិនប្រក្រតីទី០២ លោកថា ប្លង់ថ្មីមានតែគំនូសផ្នែកខាងក្រោយនៃមន្ទីរពេទ្យ ហើយផ្នែកខាងមុខដែល​ជាប់នឹងផ្លូវ ១៦៩ បានបាត់មិនមាននៅក្នុងប្លង់ទៅវិញ។

លោកបន្ថែមថា ភាពប្រក្រតីទាំងពីរនេះហើយ ដែលធ្វើឲ្យបុគ្គលិកមន្ទីរពេទ្យមិនសុខចិត្តទទួលយក ដោយ​សង្ស័យថា មានឧបាយកលអ្វីជាមិនខាន ព្រោះសេចក្តីប្រកាសនេះមិនធ្វើជាសាធារណៈ ហើយទើបតែបិទ​ប្រកាស ជូននៅមន្ទីរពេទ្យ នាថ្ងៃចុងបញ្ចប់ទៅហើយនោះ។

គួបញ្ជាក់ថា មន្ទីរពេទ្យបង្អែករាជធានីភ្នំពេញ នៅផ្នែកខាងមុខដែលមិនមាននៅក្នុងប្លង់ថ្មីនោះ គឺមាន​ប្រមាណ​ជាង ១០ល្វែង រាប់បញ្ចូលទាំងមន្ទីរពេទ្យ ៧មករាផងដែរ។

តាមការបញ្ជាក់របស់អ្នកស្រីបុគ្គលិកពេទ្យម្នាក់ សុំមិនបញ្ចេញឈ្មោះ បានលើកឡើងថា ការបិទសេចក្តី​ប្រកាស​នេះ ជាការលួចបិទមិនឲ្យបុគ្គលិកដឹងទាន់ពេល ព្រោះគេបិទនៅម៉ោង ៥:៣០ ល្ងាចនៅថ្ងៃទី ០៥ ខែកុម្ភៈ ដូច្នេះមិនមានបុគ្គលិកណាម្នាក់ដឹងលឺនោះទេ។ អ្នកស្រីបន្តថា អ្នកស្រីមានការព្រួយបារម្ភណាស់ នៅពេលដែលបាត់អាគារមន្ទីរពេទ្យខាងមុខដូច្នេះ ព្រោះមន្ទីរពេទ្យនេះ ជាមន្ទីរពេទ្យតែងតែជួយប្រជាជន ហើយពួកគេជឿជាក់មន្ទីរពេទ្យនេះណាស់។ បើលក់មន្ទីរពេទ្យនេះហើយ មានអ្វីរីកចំរើនទៀតនោះទេ។

ស្ត្រីពេទ្យរូបនេះ បានបញ្ជាក់ទៀតថា កាលពីប្រជុំលើកមុន គេបានបង្ខំឲ្យបុគ្គលិក ដែលនៅធ្វើការនៅអាគារ​ខាងមុខ រើអីវ៉ានចេញ ប៉ុន្តែដោយបុគ្គលិកមិនព្រម ក៍ចេះបន្តមកព្យាបាលរហូតដល់ថ្ងៃ ដែលគេចេញប្លង់​ថ្មី​នេះ។

មិនអាចទាក់ទងមន្ត្រីទទួលខុសត្រូវ នៃមន្ទីររៀបចំដែនដីនគរូបនីយកម្ម និងសំណង់រាជធានី បានភ្លាមៗ ដើម្បី​សុំការបកស្រាយបានទេ នៅពេលនេះ៕