អ្នកស្រី ហ៊ូ គឿន បាន​ទទួល​មរណៈភាព នៅ​វេលា​ម៉ោង​៨​យប់​ថ្ងៃ​ទី១១ ខែ​កុម្ភៈ ឆ្នាំ​២០១៥ ក្នុង​វ័យ​៦១​ឆ្នាំ ដោយ​បន្សល់​ទុក នៅ​ក្នុង​ជីវិត​អាពាហ៍​ពិពាហ៍​របស់​អ្នក​ស្រី នូវ​កូន​៦នាក់ ស្រី​១នាក់ ប្រុស​៥នាក់ និង​ស្វាមី​ឈ្មោះ ប៉ែន ហី អាយុ​៦៧ឆ្នាំ។ អ្នកស្រី​បាន​លា​ចាក​លោក​ទៅ ខណៈ​ពេល​ដែល​ការ​ទាមទារ ឲ្យ​ដោះ​ស្រាយ​វិបត្តិ​ដីធ្លី នៅ​ក្នុង​សហគមន៍​អ្នកស្រី នៅ​មិន​ទាន់​បាន​សម្រេច​បាន​ជា​លទ្ធផល​នៅ​ឡើយ។

តំណាងសហគមន៍ឡពាងអ្នកស្រី អ៊ំ សុភី បានបង្ហាញការសោកស្តាយ ប្រាប់ទស្សនាវដ្ដីមនោរម្យ.អាំងហ្វូ ឲ្យ​ដឹង​ថា ក្នុងសហគមន៍អ្នកស្រី បានបាត់បង់មនុស្សម្នាក់ទៀតហើយ។ អ្នកស្រីបានរៀបរាប់ពីមូលហេតុដែលអ្នកស្រី ហ៊ូ គឿន ស្លាប់ថា ដោយសារតែការឡើង មកតវ៉ាដីធ្លីនៅរាជធានីភ្នំពេញ។ ហើយតាំងពីនោះមក អ្នកស្រី ហ៊ូ គឿន មានជម្ងឺស្លាប់មួយចំហៀងខ្លួន ឈឺរហូតមកដល់ថ្ងៃនេះ ជាថ្ងៃចុងក្រោយ។ អ្នកស្រីបន្តថា ពិធីបុណ្យ​សព​អ្នកស្រី ហ៊ូ គឿន នឹងបញ្ចប់នៅថ្ងៃទី១៣ ខែកុម្ភៈនេះ វេលាថ្ងៃត្រង់ ក្នុងភូមិឡពាង ឃុំតាចេស ស្រុកកំពង់ត្រឡាច ខេត្តកំពង់ឆ្នាំង ។

អ្នកស្រី អ៊ំ សុភី បានបន្ថែមថា ទោះជាអ្នកស្រី ហ៊ូ គឿន ទទួលមរណៈភាពក៏ដោយ ក៏ការតវ៉ានៅតែមានសម្រាប់​សហគមន៍អ្នកស្រី ជាពិសេសសម្រាប់គ្រួសារនៃសពតែម្តង។ អ្នកស្រីបញ្ជាក់ថា ក្រុមគ្រួសារមានរឿងពីរ ដែល​ពួកគេកំពុងសោកស្តាយ នោះគឺដីរបស់ខ្លួនមិនទាន់មានសំណងសមរម្យ និងពេលនេះ ភរិយានិងត្រូវជា​ម្ដាយជា​ទីស្រឡាញ់ បានចាកចោលពួកគេទៀត។ អ្នកស្រីបានលើកឡើងថា អ្នកស្រី និងអ្នកតវ៉ាផ្សេងទៀត នៅក្នុង​សហគមន៍​ឡពាង ក៏ដូចជាគ្រួសារនៃសព នឹងនៅតែរក្សាជំហរ ធ្វើការតវ៉ាជាបន្តទៀត។

ចំពោះករណីនេះ លោក នី ចរិយា ប្រធានផ្នែកអង្កេតនៃសមាគមន៍អាដហុក បានឲ្យដឹងថា តាមផ្លូវច្បាប់ក្រុម​គ្រួសារនៅតែមានសិទ្ធ ទោះជាមានម្នាក់ស្លាប់ក៏ដោយ។ លោកបានលើកឡើងថា៖ «តាមច្បាប់ត្រូវតែរកឲ្យឃើញ ហើយប្រគល់ឲ្យ ប្តីឬប្រពន្ធកូនដែលនៅបន្ត»។ លោកថាទោះជាគ្រួសារនោះ មានតែកូនតូចក៏ដោយ ក៏ច្បាប់​ត្រូវ​តែដោះស្រាយឲ្យដែរ មិនអាចគិតថា មនុស្សស្លាប់ទៅហើយ ចប់រឿងនោះទេ។

បិតភ្នែកមិនជិត

គួរំលឹកថា កាលពីថ្ងៃទី៣១ ខែមករា ឆ្នាំ២០១៥កន្លងទៅនេះ អ្នកតវ៉ាដីធ្លីដ៏រ៉ាំរៃ នៅភូមិបឹងកក់ម្នាក់ លោកយាយ សឺន កេ ក៏បានទទួលមរណៈភាពដែរ។ ការស្លាប់របស់ពួកគាត់ ត្រូវបានក្រុមជនរងគ្រោះនឹង​បញ្ហាដីធ្លីដូចគ្នា​ចាត់​ទុកថា ជាស្លាប់ទាំងបិតភ្នែកមិនជិត ដោយសាតែវិបត្តិដីធ្លីរបស់ពួកគាត់ នៅមិនទាន់មានដំណោះស្រាយ​សមរម្យ៕