តាំងពីខែកញ្ញាមក តម្លៃភាគហ៊ុនរបស់អ័បផល ធ្លាក់ចុះប្រមាណជា ២០%។ ជាការធ្លាក់ចុះ គួរអោយព្រួយបារម្ភ និងបាន ទាញ​អោយអ្នកវិភាគ មានចម្ងល់គ្រប់ៗគ្នា។

ផលិតផលអាយផេដ៣ របស់អ័បផល ដែលរហូតមកទល់បច្ចុប្បន្ន មិនសូវឃើញមានការផ្លាស់ប្ដូ។

អ័បផលជា មានភាគហ៊ុនធំជាងគេ នៅទីផ្សារភាគហ៊ុនពិភពលោក គិតជាទឹកប្រាក់ប្រមាណជា ៥០០ កោដដុល្លាអាមេរិក។ ប៉ុន្ដែតំលៃភាគហ៊ុនរបស់អ័បផល បានបាត់បង់ប្រមាណជា ២០% បើប្រៀបធៀបនឹងការឡើងថ្លៃខ្ពស់បំផុត កាលពីខែកញ្ញា​កន្លងទៅ។ ក្រុមអ្នកវិភាគជំនាញខាងបច្ចេកវិទ្យា មានចម្ងល់ទៅលើសមត្ថភាពរបស់ក្រុមហ៊ុនអ័បផល ដែលត្រូវប្រឈម និងទប់នឹងការងើបជោរឡើងខ្លាំង នៃប្រព័ន្ធអេនដ្រ័ដ (Android) របស់ក្រុមហ៊ុនហ្គូហ្គើល (Google) ដែលមានប្រើប្រាស់ ក្នុងប្រព័ន្ធទូរស័ព្ទដៃ និងប្រព័ន្ធក្ដាបញ្ជា។

អ្នកវិភាគម្នាក់បានសរសេរថា «អ្នកដាក់ទុនបានបាត់បង់ជំនឿ ទៅលើការងាររបស់អ័បផល។​ ចង្វាក់នៃ ភាពជឿនលឿន​ទៅមុខនៃបច្ចេកវិទ្យា កំពុងស្ថិតក្នុងលម្អោនភាពមួយ ខណៈពេលដែលគូរប្រជែង កំពុងបង្កើនល្បឿនទៅមុខ។»

និយាយអោយពិត ផលិតផលបញ្ចេញមកលក់ ដោយអ័បផល កាលពីពេលថ្មីៗនេះ មិនបានលើកបង្ហាញពី របកគំហើញ​បន្ថែមទៀតនៃបច្ចេកវិទ្យា ទៅលើអ្វីដែលអ័បផលធ្លាប់មានពីមុនមកនោះទេ។ អាយផេដ មីនី (iPad mini) ចេញមក​លក់​ថ្មីៗនេះ មើលទៅដូចជាគ្រាន់តែ មាន​រូបរាង​​​តូចជាង អាយផេដ មុនប៉ុណ្ណោះ តែមានតម្លៃ ដល់ទៅ៤០% ថ្លៃជាងផលិតផល​របស់គូរប្រជែង ដែលមានលក្ខណៈប្រហាក់​ប្រហែល​គ្នា។ រីឯអាយផេដ ៤ (iPad4) ដែលចេញលក់នៅថ្ងៃនេះ ក៏នៅមិន​ខុស​គ្នាប៉ុន្មានពីអាយផេដ ដែលចេញមកលក់ពី ៦ខែ​មុន​ដែរ ដោយគ្រាន់តែបានបន្ថែម​ នូវកម្លាំងខ្លាំងជាមុនប៉ុណ្ណោះ។ ទូរស័ព្ទ អាយហ្វូន៥ ដែលដាក់ចេញមកលក់កាលពីចុងខែមុន ក៏មិន​មានអ្វីបន្ថែមផ្សេង ក្រៅតែពីបានផ្លាស់ប្ដូទំហំអេក្រង់ ខណៈ​​គូរ​ប្រជែងរបស់អ័បផល ធ្លាប់ផលិតអេក្រង់ទូរស័ព្ទធំៗបែបនេះ តាំងពីប៉ុន្មានឆ្នាំមុនមកម្លេះ។ បើគេមើលទ ផលិតផល​​កំព្យូទ័រ ផ្សេងទៀត ដូចជា អាយម៉ាក់ (iMac) ឬអាយប៊ុក ប្រូ (Macbook Pro) ឬក៏ម៉ាក មីនី (Mac Mini) ក៏អ័បផលបានបញ្ចេញ​មក​លក់ ទាំងមិនបានបន្ថែមមកជាមួយ នូវបច្ចេកវិទ្យាអ្វីផ្សេងទៀត អោយអស្ចារ្យនោះផងទេ។

ស្របពេលជាមួយគ្នានេះ កម្មវិធីផែនទីថ្មីមួយ របស់អ័បផល ក៏មានដំណើរការមិនស្រួល ដោយរួមទាំងការ​ចាកចេញ​ទាំង​បង្ខំ របស់ស្កុត ហ្វ័រស្ត័ល ម្ចាស់គម្រោង នៃអាយអូអេស (iOS ជាប្រព័ន្ធមេរបស់អ័បផល ដើម្បីអោយផលិតផលកំព្យូទ័រ ដើរ​ទៅមុខ) ផងទៀត។ សូមបញ្ជាក់ថា ទូរស័ព្ទដែលប្រើប្រព័ន្ធអេនដ្រ័ដ បានបង្កើតការលក់ដាច់រហូតដល់ទៅ ៧៥%នៅក្នុង​ទីផ្សារ​ពិភពលោកសព្វថ្ងៃ។ រីឯ ក្ដាបញ្ជាអាយផេដ ដែលធ្លាប់តែមានភាពផ្ដាច់មុខ ដោយលក់ដាច់បានរហូតដល់ទៅ ៦៦% ក្នុងពេលមុន បានថយឥទ្ធិពលរបស់ខ្លួន ដោយលក់ចេញបានត្រឹមតែ ៥០%ប៉ុណ្ណោះ ក្នុងរយះពេលចុងក្រោយនេះ។ ភាគ​រយនៃការលក់ដាក់ ពីផលិតផលរបស់ខ្លួន បានថយចុះ ៤ដង តិចជាងហ្គូហ្គ័ល និងមីក្រូសូហ្វ៍ (Microsoft)។

ក្រោយមរណភាពរបស់ស្ទេវ ចប (Steve Jobs) ប្រវត្តិសាស្ត្ររបស់ក្រុមហ៊ុនអ័បផល ត្រូវបានដាក់អោយមានដំណើរ​ដើរទៅ​មុខ ដោយគ្មានអ្នកកាន់ចង្កូតច្បាស់លាស់ ហើយលែងសូវមានការរុករកស្រាវជ្រាវ និងការអភិវឌ្ឍន៍អ្វីអោយខ្លាំងដូចមុន។ តែទោះជាសភាពជាក់ស្ដែង បានបង្ហាញចេញអោយឃើញយ៉ាងដូច្នេះក៏ដោយ ក៏អ្នកវិភាគមួយចំនួនទៀត នៅតែមាន​សុទិដ្ឋិនិយមទៅលើក្រុមហ៊ុនមួយនេះដែរ។ ក្រុមអ្នកវិភាគនោះបាននិយាយថា «សហគ្រាសអ័បផល មានភាពជោគជ័យ ក្នុងការចំណាយចេញ តិចជាងសហគ្រាសផ្សេងទៀត ដោយនៅតែផ្ចង់អារម្មណ៍ ជាមួយនឹងផលិតផលដ៏ល្អរបស់ខ្លួន។» ការវិភាគនោះ បានរំពឹងថា ជាមួយនឹងទឹកប្រាក់ប្រមាណជា១០០កោដដុល្លា នៅក្នុងដៃដ៏រឹងមាំនេះ អ័បផលអាចនឹង​ប្រើ​ប្រាស់​វា ដើម្បីទិញបច្ចេកវិទ្យាណាផ្សេងទៀត ដើម្បីយកមកបង្កើនគុណភាព នៃផលិតផលរបស់ខ្លួន។ តែអ្វីៗ នឹងមិនអាច​ដឹងអោយច្បាស់ នៅមុនឆ្នាំក្រោយនេះទេ៕

------------------------------------------------
ដោយ សេក មនោរកុមារ - ប៉ារីស​ ថ្ងៃទី១៤ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ