នា​មជ្ឈ​មណ្ឌល​កោះពេជ្រ ក្នុង​រាជធានី​ភ្នំពេញ ប្រធាន​រដ្ឋសភា​កម្ពុជា លោក ហេង សំរិន និង​ជា​ប្រធាន​កិត្តិយស​នៃ​គណបក្ស​ប្រជាជន​កម្ពុជា បាន​លើក​ឡើង​ថា ថ្វី​បើ​គណបក្ស​ប្រជាជន​កម្ពុជា ជា​គណបក្ស​ចាស់ តែ​គណបក្ស​នេះ​នៅ​តែ​មាន​ការ​គាំទ្រ​ខ្ពស់ ពី​ប្រជា​ពលរដ្ឋ។ លោក​ថា ករណី​សំខាន់​ក្នុង​អាណត្តិ​ទី​ប្រាំ​នេះ គណបក្ស​ចំណាស់​របស់​លោក បាន​ថម​ថយ​នូវ​កម្លាំង​អាសនៈ​ក្នុង​រដ្ឋសភា ដោយ​សារ​មាន​កំណើន​សម្លេង​ខ្លាំង ទៅ​រក​គណបក្ស​ប្រឆាំង។

យ៉ាង​នេះ​ក្តី លោក​បាន​ចាត់​ទុក​ថា នេះ​ជា​បរិបទ​មួយ​ថ្មី ដែល​គណបក្ស​ប្រជាជន​កម្ពុជា​កំពុង​ជួប​ប្រទះ និង​ត្រូវ​ស្វែង​រក​ដំណោះ​ស្រាយ។ លោក​បញ្ជាក់​ដូច្នេះ​ថា៖ «ប្រការ​នេះ តម្រូវ​ឲ្យ​យើង​ត្រូវ​សិក្សា ឲ្យ​បាន​គ្រប់​ជ្រុង​ជ្រោយ​អំពី​មូលហេតុ ដែល​នាំ​ឲ្យ​កើត​មាន​ស្ថានភាព​ដូច្នេះ។ (…) ចំណុច​ខ្លាំង ចំណុច​ខ្សោយ មេ​រៀន បទ​ពិសោធន៍​ថ្មីៗ​របស់​គណបក្ស សំដៅ​ជំរុញ​ការ​ធ្វើ​កំណែ​ទម្រង់ ឲ្យ​បាន​ខ្លាំង​ក្លា​ទាន់​ពេល​វេលា និង​មាន​ប្រសិទ្ធ​ភាព។ (…) យើង​ត្រូវ​តែ​ប្តូរ​ផ្តាច់​ដើម្បី​ធ្វើ​ការងារ។»

នៅចំពោះការប្ដេជ្ញាចិត្តខាងលើ ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីអ្នកនាំពាក្យ របស់​គណបក្សសង្គ្រោះជាតិ ដែលជាគណបក្សប្រឆាំងបានទេ​នារសៀលនេះ។

កន្លងមក លោក សម រង្ស៊ី ក៏ដូចជាលោក កឹម សុខា ថ្នាក់ដឹកនាំកំពូលគណបក្សសង្គ្រោះជាតិ តែងតែ​ព្យាយាមបង្កើននូវប្រជាប្រិយភាព និងការគាំទ្រពីប្រជាពលរដ្ឋ សម្រាប់គណបក្សរបស់ពួកលោក តាមរយៈ​ការចុះតាមមូលដ្ឋានទាំងក្នុង និងក្រៅប្រទេស។ ជាមួយនឹងការចុះពង្រឹងការងារក្នុងមូលដ្ឋាននោះ លោក​តែង​តែបានថ្លែងថា ប្រជាប្រិយភាពនិងកម្លាំងគាំទ្រ ស្ថិតលើសកម្មភាពពិត មិនស្ថិតលើការសន្យា ឬពាក្យសំដី​នោះ​ឡើយ។ នេះជាយុត្តិសាស្រ្តរបស់គណបក្សប្រឆាំង ដើម្បីទទួលបានជំនឿចិត្តពីអ្នកគាំទ្ររបស់ខ្លួន។

តែយ៉ាងណាក៏ដោយ គេសង្កេតឃើញថា បច្ចុប្បន្ននេះគណបក្សទាំងពីរក្នុងរដ្ឋសភា កំពុងសង្វាតនៅកៀក​ជាមួយពលរដ្ឋ ដែលជាម្ចាស់ឆ្នោតតែរៀងៗខ្លួន។ ជាពិសេស សម្រាប់គណបក្សប្រជាជនកម្ពុជាថ្មីៗនេះ តាម​រយៈរដ្ឋាភិបាលដែលនៅក្នុងអំណាច បានបង្ហាញសកម្មភាពយ៉ាងសកម្មជាងមុខ ក្នុងការយកចិត្តប្រជាពលរដ្ឋ តាមរយៈការដំឡើងប្រាក់បៀរវត្សជូនមន្ត្រីរាជការ និងកម្មករ ការបញ្ចុះតម្លៃអគ្គិសនីសម្រាប់ផ្ទះជួល និងការ​បញ្ចុះតម្លៃសាំងជាដើម។

ក្នុងមហាសន្និបាតលើកទី៣៧ នាថ្ងៃទី៣០ ខែមករា ឆ្នាំ២០១៥ របស់គណបក្សប្រជាជនកម្ពុជានេះ លោក ហេង សំរិន បានបង្ហាញនូវ«គោលជំហរចំនួនប្រាំង» ដែលសុទ្ធសឹងជាប្រធានបទដ៏សំខាន់ ដើម្បីបន្ត​ចូលរួម​ប្រកួតប្រជែង ជាមួយគណបក្សសង្គ្រោះជាតិ ក្នុងការដណ្តើមប្រជាប្រិយភាព ពីប្រជាពលរដ្ឋឡើងវិញ។ ជំហរ​សំខាន់ទាំងប្រាំ របស់គណបក្សប្រជាជនកម្ពុជានោះ រួមមាន៖

- របាយការណ៍ពីការកែទម្រង់ការបោះឆ្នោត។
- អនុម័តលើសេចក្តីព្រាងរបាយការណ៍លើសភាពការណ៍ទូទៅ សភាពការណ៍នៃការជ្រើសតាំងតំណាងរាស្ត្រ ទិសដៅ និងភារកិច្ចរបស់គណបក្ស។
- ការបោះឆ្នោតបំពេញបន្ថែមសមាជិកគណៈកម្មាធិការកណ្តាល។
- គោលជំហរពិសេសរបស់គណបក្ស គឺការជ្រើសរើស«យុវជន» បញ្ជូលក្នុងគណៈកម្មាធិការកណ្តាល​របស់​គណបក្ស។
- និងលើកស្ទួយការថែរក្សាសន្តិភាព ស្ថេរភាព សន្តិសុខ សណ្តាប់ធ្នាប់សង្គមឲ្យបានល្អ ជូនប្រជាពលរដ្ឋ​នៅ​ទូទាំងប្រទេស ដោយគ្មាននិន្នាការនយោបាយ៕