កម្មករ​រោង​ចក្រ​មេនហាតធេន ស្នើរ​អាមេរិក​ឲ្យ​ជួយ​​អន្តរាគមន៍

បន្ទាប់ពីរោងចក្រ មេនហាតធេន បានបដិសេធមិនទទួល យកតំណាងសហជីពរបស់ខ្លួន ឲ្យចូលធ្វើការងារវិញ ព្រោះ​ពួក​គេ​ទាំង​នោះ បានដឹកនាំកម្មករធ្វើបាតុកម្ម ទាមទារប្រាក់ខែមកនោះ កម្មករមួយចំនួននៅថ្ងៃនេះ បាន​ធ្វើ​កូដកម្ម​មិន​ចូល​ធ្វើការ ហើយបានស្នើឲ្យស្ថានទូតអារមេរិក ឲ្យចុះជួយធ្វើអន្តរាគមន៍។
Loading...
  • ដោយ: ក. វិច្ចនី អត្ថបទ៖ក. វិច្ចនី ([email protected]) - យកការណ៍៖ ស្រ៊ុន ទិត្យ - ភ្នំពេញ ថ្ងៃទី ៣០ មករា ២០១៥
  • កែប្រែចុងក្រោយ: January 30, 2015
  • ប្រធានបទ: វិបត្តិកម្មករ
  • អត្ថបទ: មានបញ្ហា?
  • មតិ-យោបល់

តំណាង​សហជីព​របស់​រោង​ចក្រ មេនហាតធេន បី​នាក់​ត្រូវ​បាន​រោង​ចក្រ​មិន​ទទួល ឲ្យ​ចូល​ធ្វើការ​បន្ត​ទៀត​នោះ​ទេ បន្ទាប់​ពី​អ្នក​ទាំង​បី ធ្លាប់​បាន​ដឹកនាំ​កម្មករ​ធ្វើ​បាតុកម្ម​ទាមទារ​ប្រាក់​ខែ និង​លក្ខខ័ណ្ឌ​ការងារ​មួយ​ចំនួន​នោះ។ ការ​មិន​ព្រម​ទទួល​តំណាង​សហជីព ឲ្យ​ចូល​ធ្វើការ​វិញ​នេះ បាន​ធ្វើ​ឲ្យ​កម្មករ​រាប់​រយ​នាក់ នៃ​រោងចក្រ មេនហាតធេន នាំ​គ្នា​ដង្ហែ​ញតិ្ត​មក​ដាក់​នៅ​ស្ថានទូត​អាមេរិក​ប្រចាំ​នៅ​កម្ពុជា នៅ​ព្រឹក​ថ្ងៃ​ទី ៣០ ខែ​មករា​នេះ ដើម្បី​ស្នើ​ឲ្យ​ឯកអគ្គរាជទូត​នៃ​ប្រទេស​មហា​អំណាច​មួយ​នេះ ជួយ​ធ្វើ​អន្តរាគមន៍​ទាម​ទារ​ឲ្យ​រោង​ចក្រ ព្រម​ទទួល​តំណាង​របស់​ពួក​គាត់ ចូល​ធ្វើ​ការងារ​វិញ។

តំណាង​សហជីព​របស់​រោងចក្រ មេនហាតធេន ទាំង​បី​នាក់​ដែល​រោងចក្រ​មិន​ព្រម​ទទួល​យក ឲ្យ​ចូល​ធ្វើ​ការ​ងារ​វិញ​នោះ មាន​លោក ចន ធាន - លោក ផាន់ ចន្នី និង​លោក ប៉េង ផល្លា។ អ្នក​ទាំង​បី​ត្រូវ​បាន​រោងចក្រ​បញ្ឈប់​ពី​ការងារ បន្ទាប់​ពី​ពួក​គាត់​បាន​ដឹកនាំ​កម្មករ​ធ្វើ​បាតុកម្ម ទាមទារ​ប្រាក់​ឈ្នួល​អប្បបរមា​ចំនួន ១៦០ ដុល្លារ ក្នុង​មួយ​ខែ​របស់​កម្មករ រវាង​ពីថ្ងៃ​ទី ២៤ ខែ​ធ្នូ ឆ្នាំ​២០១៣ រហូត​ដល់​ថ្ងៃ​ទី ០៣ ខែ​មករា ឆ្នាំ២០១៤។

ករណីនេះ ត្រូវបានក្រុមប្រឹក្សាអាជ្ញាកណ្តាល បានចេញសេចក្តីបង្គាប់ ឲ្យពួកគាត់ចូលធ្វើការងារធម្មតាវិញ ប៉ុន្តែក្រុមហ៊ុន មេនហាតធេន មិនបានទទួលយកអ្នកទាំងបី ឲ្យចូលធ្វើការដូចក្រុមប្រឹក្សាអាជ្ញាកណ្តាល បាន​បង្គាប់នោះទេ និងបង្កឲ្យកម្មកររោចក្រមួយចំនួន បាននាំគ្នាធ្វើបាតុកម្មតវ៉ាអស់រយៈពេល ជាងមួយខែមក​ហើយ ពោលគឺចាប់តាំងពី ថ្ងៃទី ២២ ខែធ្នូ ឆ្នាំ ២០១៤ រហូតមកទល់ពេលនេះ ប៉ុន្តែនៅតែពុំទាន់មាន​ដំណោះ​ស្រាយ។

ការនាំគ្នាមកដាក់ញតិនៅស្ថានទូតអាមេរិក ដើម្បីស្នើឲ្យជួយធ្វើអន្តរាគមន៍ របស់ក្រុមកម្មករនេះ ព្រោះម្ចាស់​រោងចក្រ មេនហាតធេន ដែលមានទីតាំងស្ថិតនៅក្នុងស្រុកកំពង់សៀម ខេត្តកំពង់ចាម នោះ ជាជនជាតិ​អាមេរិកាំង។ ដូច្នេះហើយបានពួកគាត់សង្ឃឹមថា សហរដ្ឋអាមេរិកដែលជាប្រទេសមួយ​ដែលគោរពសិទ្ធិ​មនុស្ស និងជាប្រទេសដែលកាន់លទ្ធិប្រជាធិបតេយ្យបានល្អជាងគេនោះ នឹងយកចិត្តទុកដាក់ លើការស្នើរ​សុំ​របស់កម្មករ៕

កញ្ញា លក្ខណា ជាកម្មករនៅរោងចក្រនេះ បានប្រាប់អ្នកសារព័ត៌មានឲ្យដឹងថា កញ្ញាមកស្នើរសុំឲ្យស្ថាន​ទូត​អាមេរិកជួយធ្វើអន្តរាគមន៍ នៅថ្ងៃនេះទាំងភ័យខ្លាច ប៉ុន្តែប្រសិនបើកញ្ញាមិនមកស្នើរសុំ ឲ្យតំណាងសហជីព​ទាំងនោះចូលធ្វើការវិញទេ រោងចក្រនៅតែបន្តធ្វើការគាបសង្កត់លើកម្មករសព្វគ្រប់បែបយ៉ាង ហើយឈាន​ដល់​ការបញ្ឈប់ពីការងារទៀត ប្រសិនបើកម្មករធ្វើការងារមិនពេញចិត្តពួកគេនោះ។

កញ្ញា បានបង្ហាញក្ដីសង្ឃឹមយ៉ាងមុតមាំថា ស្ថានទូតនៃប្រទេសមហាអំណាចនឹងជួយធ្វើអន្តរាគមន៍​លើបញ្ហា​នេះ បើទោះជាមានខាងក្រុមហ៊ុន បានទូរស័ព្ទមកគំរាមថា នឹងដកពួកគាត់ចេញពីការងារ ព្រោះពួកគាត់នាំគ្នា​មកដាក់ញតិនៅស្ថានទូត ក៏ដោយ។ កញ្ញាបានបញ្ជាក់យ៉ាងដូច្នេះថា មុននឹងក្រោយ គេគង់តែដេញចេញ​ដដែល ដូច្នេះមានតែតស៊ូមករកអ្នកជួយធ្វើអន្តរាគមន៍តែម្តង ទើបមានសង្ឃឹមខ្លះ។

កម្មការិនីរូបនេះបានអំពាវនាវដល់ក្រសួងពាក់ព័ន្ធទាំងអស់ ឲ្យជួយដោះស្រាយដើម្បីជម្រុញឲ្យរោងចក្រ ព្រម​ទទួលយកតំណាងសហជីពចូលធ្វើការវិញ ព្រោះសព្វថ្ងៃ នៅពេលដែលគ្មានសហជីពនៅធ្វើការជាមួយ ពួក​គាត់វេទនាខ្លាំងណាស់ ដោយរងការគាបសង្កត់ពីក្រុមហ៊ុន។

មានទាក់ទងដល់តុលាការ...

ប្រធានសហភាពសហជីពកម្ពុជា លោក រ៉ុង ឈុន (និងជាប្រធានសមាគមគ្រូបង្រៀនកម្ពុជាឯករាជ្យ) ដែល​បានចូលរួមក្នុងការដាក់ញត្តិនេះដែរ បានថ្លែងថា ក្រៅពីការទាមទារឲ្យស្ថានទូតអាមេរិក ជួយធ្វើងអន្តរាគមន៍ ដើម្បីឲ្យកម្មករនិងតំណាងសហជីពបានចូលធ្វើការវិញនោះ ក្រុមកម្មករចង់ស្ថានទូតនេះ ជួយធ្វើយ៉ាងណា​ជួយឲ្យតុលាការសាលាដំបូង ខេត្តកំពង់ចាម ទម្លាក់ចោលនូវរាល់ការចោទប្រកាន់ ទៅលើអ្នកទាំងបីនាក់​នោះ​ផងដែរ។ លោកថា តុលាកាគួរតែធ្វើការទំលាក់ការចោទប្រកាន់នេះ ព្រោះក្រុមសហជីពមានសិទ្ធិជាមូលដ្ឋាន ក្នុងការទាមទារប្រាក់ឈ្នួលរបស់គាត់ និងកម្មករ និងការដឹកនំាកម្មករទាមទារលក្ខខ័ណ្ឌការងារ ព្រមទាំង​ទាម​ទារសិទ្ធិសេរីភាពក្នុងការងារបស់ពួកគាត់ផងដែរ។ ប៉ុន្តែផ្ទុយទៅវិញ នយោជកបែជាចោទប្រកាន់ពួកគាត់ថា ធ្វើការញុះញង់ឲ្យកម្មករធ្វើបាតុកម្មទៅវិញ។

លោក រ៉ុង ឈុន បានបញ្ជាក់ថា ប្រាក់ខែត្រឹមតែ ៨០ដុល្លា មិនអាចចាយវាយបានគ្រប់គ្រាន់នោះទេ បើសិនជា​មិនឲ្យពួកគាត់ធ្វើការតវ៉ា។ លោកថា រោងចក្រនៅក្នុងប្រទេសកម្ពុជាមានច្រើនណាស់ ហើយក៍ចំណេញច្រើន​ពីការធ្វើវិនិយោគដែរ ប៉ុន្តែពួកគេមិនដែលយកប្រាក់ចំណេញនោះ មកចែកឲ្យកម្មករដែលជួយធ្វើការ​ឲ្យអស់​ទាំងកំលាំងកាយ និងកំលាំងចិត្តនោះទេ។ ផ្ទុយទៅវិញ ពួកគេបែជាយកប្រាក់នោះ ទៅឲ្យជនពុករលួយ ហើយ​នាំគ្នាមកព្រួតធ្វើបាបកម្មករទៅវិញ។ លោកនិយាយថា នេះមិនមែនជាអំពើមួយដែលអាចធ្វើឲ្យកម្មករ នៅស្ងៀមតទៅទៀតបានឡើយ។

មិនអាចទាក់ទងអ្នកទទួលខុសត្រូវ របស់រោងចក្រ មេនហាតធេន ដើម្បីធ្វើកាបកស្រាយពីបញ្ហាចោទ​ប្រកាន់​ខាងលើនេះ បាននៅឡើយ នៅថ្ងៃនេះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...