រថយន្តការទូតចិន បុកម៉ូតូកាណាដា រួចចុះមកទារសំណង
- ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញថ្ងៃទី៣០ មករា ២០១៥
- កែប្រែចុងក្រោយ: January 30, 2015
- ប្រធានបទ: គ្រោះថ្នាក់
- អត្ថបទ: មានបញ្ហា?
- មតិ-យោបល់
-
នៅម៉ោង៨ និង៣០នាទីព្រឹក ថ្ងៃទី៣០ ខែមករានេះ មានករណីគ្រោះថ្នាក់ចររាចរណ៍មួយ បានកើតឡើងនៅ តាមបណ្តោយមហាវិថីព្រះសីហនុ កែងផ្លូវ២៧៤ ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ។ គ្រោះថ្នាក់បានបង្កឡើង រវាងរថយន្តម៉ាកកូរ៉ូឡា (COROLA) ពណ៍សពាក់ស្លាកលេខ CD17-016 (ស្លាកលេខការទូត) ដែលបើកបរដោយជនជាតិចិនម្នាក់ មិនចេះនិយាយភាសាខ្មែរ ជាមួយម៉ូតូ ម៉ាកសង់ឌ្រីមពណ៍ខ្មៅ ពាក់ស្លាកលេខភ្នំពេញ 1BI-4378 បើកបរដោយជនជាតិកាណាដា។ ករណីនេះ បានកើតឡើង នៅពេលកំពុងឆ្លងថ្នល់ ក្នុងផ្លូវកែងទល់គ្នា។
សាក្សីនៅកន្លែងកើតហេតុ បានបញ្ជាក់ថា ម៉ូតូជនជាតិកាណាដា បើកពីកើតទៅលិចក្នុងទីសដៅស្រប ចំណែកឯរថយន្តការទូតនោះ បានបើកឆ្លងកាត់ពីផ្លូវតូចមកដល់ចំណុចកែងផ្លូវ២៧៤នេះ ស្រាប់តែជ្រុលមកបុកម៉ូតូមួយនេះ ឲ្យដួលដេកនៅលើផ្លូវ បណ្តាលឲ្យភាគីទាំងសងខាង មានការខូចខាតតិចតួច ប៉ុន្តែភ្លាមៗនោះ ម្ចាស់រថយន្តខាងលើ បានចេញមកទាមទារឲ្យម្ចាស់ម៉ូតូ សងថ្លៃខូចខាតឡានរបស់ខ្លួនផ្នែកខាងមុខ។
លោក អែនដ្រូ (Andro) ជាម្ចាស់ម៉ូតូខាងលើ បានប្រាប់ទស្សនាវដ្តីមនោរម្យ.អាំងហ្វូថា លោកមិនបានធ្វើខុសទេ ដូច្នេះលោកមិនទទួលខុសត្រូវ ចំពោះការខូចខាតនេះឡើយ។ ជនជាតិកាណាដា ដែលបានចូលមករស់នៅ ក្នុងប្រទេសកម្ពុជាអស់រយៈពេល៥ឆ្នាំហើយនេះ បានថ្លែងថា សព្វថ្ងៃលោកធ្វើការនៅអង្កការទឹកស្អាត ក្នុងរាជធានីភ្នំពេញ។ អែនដ្រូ បន្ថែមថា លោកជិះនៅខាងស្តាំដៃ ត្រឹមត្រូវតាមច្បាប់ហើយ តែរថយន្តនោះបានឆ្លងមកទាំងបំពាន។
លោក ព្រំ ម៉ារីឌី ដែលជាសម្ថកិច្ចចររាចរណ៍ នៅប្រចាំការនៅខណ្ឌ៧មករានេះ បានឲ្យដឹងថា មិនមានភាគីណាមួយ ជាអ្នកខុសធ្ងន់ធ្ងរនោះទេ ដោយលោកបានធ្វើការសម្របសម្រួល នៅនឹងកន្លែងកើតហេតុ រួចបានបញ្ចប់រឿង ដោយមានការព្រមព្រៀងពីភាគីទាំងសងខាង មិនរករឿតទៅទៀត៕