«រូបស្រីអាក្រាតល្វែងលើនៅអង្គរ ជាសិល្បៈ» បើតាមអ្នកជំនាញ
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី២៥ មករា ២០១៥
- កែប្រែចុងក្រោយ: January 25, 2015
- ប្រធានបទ: ថតរូប
- អត្ថបទ: មានបញ្ហា?
- មតិ-យោបល់
-
ភាពរំជើបរំជួលបានផ្ទុះឡើង ប៉ុន្មានថ្ងៃចុងក្រោយនេះ បន្ទាប់ពីរូបស្ត្រីជាតិអាស៊ីមួយរូប អាក្រាតល្វែងខាងលើទទេ ត្រូវបានក្រុមអ្នកប្រើប្រាស់បណ្ដាញសង្គម យកមកបង្ហោះចែកចាយ។ ភាពរំជើបរំជួលខ្លាំង ព្រោះបើសូម្បីអាជ្ញាធរជាតិអប្សារា ដែលគ្រប់គ្រងតំបន់ប្រាសាទបូរាណរបស់ខ្មែរ ក៏បានចេញសេចក្ដីថ្លែងការណ៍«ថ្កោលទោស»យ៉ាងចាស់ដៃណាស់ដែរ ប្រឆាំងទល់នឹងទង្វើ បែបបង្អាប់បង្អោនយ៉ាងធ្ងន់ធ្ងរ «ដល់បេតិកភណ្ឌជាតិ និងកិត្តិយសនារីភេទ» របៀបនេះ។
«រូបថតសិល្បៈ ចាំបាច់ត្រូវមានលក្ខណៈសិល្បៈ។ បើយកមនុស្សធម្មតា មកស្លៀកពាក់ពេញខ្លួនដូចធម្មតា ហើយយកមកថតរូបដាក់តាំងបង្ហាញនោះ ធ្វើម៉េច វាក្លាយជាសិល្បៈទៅកើត? ទោះជាស្រី ឬប្រុសក៏ដោយ!» នេះជាការបកស្រាយយ៉ាងសមញ្ញ និងដោយផ្ទុះសំណើចបន្តិចៗផង របស់លោក ឡឹក សុទ្ធី អ្នកជំនាញដើមកំណើតខ្មែរមួយរូប ឯកទេសខាងសិល្បៈថតរូប និងគំនូរចម្លាក់ នៅរដ្ឋធានីប៉ារីស ប្រទេសបារាំង។ លោក សុទ្ធី ដែលជាម្ចាស់ហាងសិល្បៈមួយផងនោះ បាននិយាយទៀតថា៖ «មុននឹងប្រតិកម្មខ្លាំងៗដូច្នេះ គួរណាខ្មែរយើងស្វែងរកប្រភព និងសិក្សាឲ្យយល់ជាមុនសិន ថាតើរូបថតទាំងនេះ គេថតនៅក្នុងបរិបទអ្វី និងដើម្បីអ្វី»។
សារព័ត៌មានក្នុងស្រុកជាច្រើន បានយករូបថតទាំងនេះ មកធ្វើអត្ថាធិប្បាយបន្ថែមបន្ថយ បង្កឲ្យមានការចាប់អារម្មណ៍ កាន់តែខ្លាំងឡើង។ សារព័ត៌មានខ្លះ ថែមទាំងបានយកប្រភពមិនច្បាស់ការណ៍ មកអះអាងបញ្ជាក់ទៀតថា រូបថតទាំងនេះ ត្រូវបានបង្ហោះនៅក្នុងគេហទំព័រ«អាសអាភាស»មួយ ដែលមានទីតាំងនៅក្នុងប្រទេសចិន។ ពីក្នុងចំណោមអ្នកចូលរួមឈឺឆ្អាល មានមតិយោបល់មួយចំនួន បានទាញយកករណីនយោបាយ មកភ្ជាប់ជាមួយនោះផងទៀត។
តាមពិតទៅ រូបថតទាំងនេះ ជាស្នាដៃរបស់អ្នកថតរូបឯករាជ្យមួយរូប ដែលដាក់ឈ្មោះខ្លួនឯងថា WANIMAL ហើយត្រូវបានបង្ហោះនៅក្នុងគេហទំព័រ lofter.com មានទីតាំងក្នុងប្រទេសចិន ឬបង្ហោះនៅក្នុងគេហទំព័រ tumblr.com មានទីតាំងនៅទីក្រុងញ៉ូយក សហរដ្ឋអាមេរិក។ គេហទំព័រទាំងពីរនេះ មានលក្ខណៈជា Blog ឬអាចហៅបានជាបណ្ដាញសង្គមដែរ តែមានឯកទេសសម្រាប់ផ្ដល់ឱកាស ទៅឲ្យតែសិល្បៈករ វិចិត្រករ ឬអ្នកថតរូបវ័យក្មេងទាំងឡាយ អាចបញ្ចេញស្នាដៃរបស់ខ្លួន។
អ្នកថតរូប WANIMAL បានសរសេរពន្យល់ពីខ្លួនឯង នៅលើគេហទំព័រទាំងនោះថា ខ្លួនលោក«សុខចិត្តនៅសោយរាជ្យក្នុងថាននរក ជៀសជាងនៅថានសួគ៌ ដែលបានត្រឹមតែជាទាសករ»ប៉ុណ្ណោះ។
រីឯរូបថត ដែលមានរូបស្រីម្នាក់ព្រលែងខ្លួនខាងលើចោល ថតនៅជាមួយនឹងប្រាង្គប្រាសាទបូរាណខ្មែរនេះ សុទ្ធតែមានចំណងជើងថា «KHMER LADY (ស្ត្រីខ្មែរ)»។ រូបថតដ៏រំជើបរំជួល មិនមែនទើបនឹងត្រូវបានបង្ហោះទៅក្នុងបណ្ដាញអ៊ិនធើណែត ក្នុងខែមករា ឆ្នាំ២០១៥នេះ ដូចការអះអាងរបស់ប្រព័ន្ធផ្សព្វផ្សាយ ក្នុងប្រទេសកម្ពុជាមួយចំនួននោះទេ ប៉ុន្តែលោក WANIMAL បានបង្ហោះរូបថតរបស់ខ្លួន ទាក់ទងនឹងស្ត្រីដោះអាវនៅជាមួយប្រាសាទទាំងនេះ ជាបន្តបន្ទាប់រាប់ចាប់តាំងពីថ្ងៃទី៦ ខែតុលា ឆ្នាំ២០១៣មកម្លេះ។
មិនមែនរូបថតទាំងអស់ ដែលថតនៅក្នុងប្រទេសកម្ពុជា សុទ្ធតែមានលក្ខណៈអាក្រាតកាយទាំងស្រុងនោះទេ តែលោក WANIMAL ក៏បានបង្ហោះរូបថតមួយចំនួនទៀត ស្ដីពីរូបគំនូរប្រាសាទបូរាណរបស់ខ្មែរដែរ។
ទស្សនាវដ្ដីមនោរម្យ.អាំងហ្វូបានបង្ហាញរូបទាំងនេះ ទៅឲ្យលោក ឡឹក សុទ្ធី ដើម្បីទុកជូនលោកធ្វើការពន្យល់។ លោកនិយាយថា៖ «តាមរយៈរូបថតទាំងនេះ សរបញ្ជាក់ថា WANIMAL ជាអ្នកថតរូបបែបសិល្បៈមួយរូប ឬនិយាយឲ្យចំមែនទែន ជាអ្នកថតរូបសិល្បៈបែបកាមា។ កាមា តាមរយៈការបង្ហាញដើមទ្រូង អាចនិយាយថា ជាការទាក់ទាញមួយ។ តែក៏អាចនិយាយបានដែរថា នេះជាសេចក្ដីស្រឡាញ់មួយបែប នៅក្នុងសិល្បៈ។ ខ្ញុំមិននិយាយជំនួសម្ចាស់រូបថតទេ។ បើសម្រាប់ខ្ញុំ រូបទាំងនេះជាសេចក្ដីស្នេហា ចំពោះធម្មជាតិ ឬចំពោះប្រាង្គប្រាសាទរបស់ខ្មែរយើង។»។
លោក សុទ្ធី បានពន្យល់ទៀតថា ការព្រលែងខ្លួនខាងលើចោលនេះ មិនមានភាពអាសអាភាសទេ ព្រោះខ្មែរយើងនៅជំនាន់សម័យអាណានិគមនិយមបារាំងដំបូង ក៏ត្រូវបានជនបរទេសមកឃើញ ថាយើងនេះព្រលែងដងខ្លួនខាងលើចោលដែរ។ រូបចម្លាក់តួអង្គស្រី ដូចជាអប្សរា អ្នកស្រុកជានារីភេទ នៅលើប្រាង្គប្រាសាទ ឬតាមរយៈឯកសារសំណៅដើមរបស់ទូតចិន លោក ជីវ តាខ្វាន់ បានបញ្ជាក់ដូចគ្នាថា ខ្មែរនៅសម័យបូរាណមិនមានការបិទបាំងផ្នែកខាងលើទេ។ ហើយបើនិយាយមកក្នុងសិល្បៈសម័យទំនើបនេះ គេក៏ធ្លាប់ឃើញលោក ខៃ ប្រសិទ្ធ ស្រាតងូតទឹកបញ្ចេញគូទ ឬនាង ចាន់ ជាលីដា បញ្ចេញសុដន់មួយចំហៀង បូករួមនឹងភាពសិចស៊ី នៃតារាជាច្រើនទៀត នៅក្នុងភាពយន្ដដាក់បញ្ចាំងនៅតាមរោងនោះដែរ។
«នេះ ជាសិល្បៈ។ ហើយអង្គរក៏ល្បីល្បាញ ដោយសារសិល្បៈនេះដែរ។» លោក សុទ្ធី បានអះអាងជាចុងបញ្ចប់ថា៖ «ទាស់តែម្យ៉ាង... តើការថតរូបនេះ បានសុំការអនុញ្ញាត ពីអាជ្ញាធរនៅទីនោះឬអត់»៕