ព័ត៌មាន​​គ្រាប់​បែក បាន​បង្ខំ​ឲ្យ​យន្ដហោះ​ពីរ​ចុះ​ចត​ជា​បន្ទាន់

យន្ដហោះដឹកអ្នកដំណើរពីរគ្រឿង ត្រូវបានបង្ខំឲ្យចុះចតជាបន្ទាន់ នៅព្រលានយន្ដហោះអន្តរជាតិ ហាតហ្វៀល ចាក់សុន (Hartsfield-Jackson) បន្ទាប់ពីទទួលការគម្រាម ដែលអាចយកជាបានការ ថាមានគ្រាប់បែកនៅក្នុងយន្ដហោះ។
Loading...
  • ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី២៥ មករា ២០១៥
  • កែប្រែចុងក្រោយ: January 25, 2015
  • ប្រធានបទ: ភេវរកម្ម
  • អត្ថបទ: មានបញ្ហា?
  • មតិ-យោបល់

យន្ដហោះ​ចម្បាំង​ធុញ​ប្រដេញ​ជា​ច្រើន​គ្រឿង របស់​បញ្ជាការដ្ឋាន​ការពារ​អាកាស នៃ​តំបន់​អាមេរិក​ខាង​ជើង (NORAD) បាន​ហោះ​ទៅ​អម​យន្ដហោះ​ដឹក​អ្នក​ដំណើរ​ទាំង​ពីរ​គ្រឿង កាល​ពី​រសៀល​ថ្ងៃ​សៅរ៍​ម្សិល​ម៉ិញ​ និង​បាន​បង្ខំ​ឲ្យ​ធ្វើការ​ចុះ​ចត​ជា​បន្ទាន់ នៅ​ព្រលាន​យន្ដហោះ​អន្តរជាតិ នៃ​ទីក្រុង​អាត្លង់តា បន្ទាប់​ពី​ការ​គម្រាម​មួយ​អាច​យក​ជា​ការ​បាន ត្រូវ​បាន​បង្ហោះ​ផ្សាយ​នៅ​លើ​បណ្ដាញ​សង្គម​ទ្វីសធើរ ស្ដី​ពី​វត្តមាន​គ្រាប់​បែក​នៅ​ក្នុង​យន្ដហោះ។

យន្ដហោះ​ទាំង​ពីរ​គ្រឿង ដែល​ភ្ជាប់​ជើង​ហោះហើរ​ក្នុង​ស្រុក បាន​ចុះ​ចត​ដោយ​សុវត្ថិភាព នៅ​ព្រលាន​យន្ដហោះ​​អន្តរជាតិ​ ហាតហ្វៀល ចាក់សុន នៃ​ទីក្រុង​អាត្លង់តា ភាគ​ខាង​កើត​សហរដ្ឋ​អាមេរិក។ យន្ដហោះ​ទី​មួយ នៃ​ជើង​ហោះ​ហើរ​លេខ ១១៥៦ របស់​ក្រុមហ៊ុន​អាកាស​ចរណ៍ ដែលតា (Delta) ហោះ​ចេញ​ពី​ក្រុង ផ័រឡេន (Portland) នៅ​ក្នុង​រដ្ឋ អូរ៉េហ្គន (Oregon) និង​យន្ដហោះ​ទី​ពីរ នៃ​ជើង​ហោះ​ហើរ​លេខ ២៤៩២ របស់​ក្រុមហ៊ុន​អាកាសចរណ៍ សោធវ៉េស (Southwest) ហោះ​ចេញ​ពី​ក្រុង ម៉ៃវ៉ូគេ (Milwaukee) នៅ​ក្នុង​រដ្ឋ វីស្កុនស៊ីន (Wisconsin)។

អ្នកដំណើរនៅក្នុងយន្ដហោះទាំងពីរត្រូវបានជម្លៀសខ្លួនចេញ ហើយក្រុមភ្នាក់ងារឯកទេស ខាងរាវរកមីន និងជាតិផ្ទុះ ដោយមានជំនួយពីឆ្កែផង បានធ្វើការងារត្រួតពិនិត្យរបស់ខ្លួន នៅគ្រប់កន្លុកកន្លៀតទាំងអស់ នៃ​យន្ដហោះ។

ក្រុមហ៊ុនអាកាសចរណ៍ សោធវ៉េស បានចេញសេចក្ដីប្រកាសព័ត៌មាន នៅរសៀលថ្ងៃដដែលថា៖ «ក្នុង​មូលហេតុ​​នៃបញ្ហាទាក់ទងនឹងសុវត្ថិភាព យន្ដហោះនៃជើងហោះហើរ ២៤៩២ ត្រូវបាននាំទៅកាន់ទីកន្លែង​មួយ ដែល​ទាំងអតិថិជន និងយន្ដហោះនឹងត្រូវបានត្រួតពិនិត្យយ៉ាងម្មត់ចត់។ អាទិភាពរបស់យើង គឺសុខ​សុវត្ថិភាព​របស់​អ្នកដំណើរ និងបណ្ដាជនទាំងឡាយ។ យើងមិនអាចធ្វើអត្ថាធិប្បាយអ្វីបន្ថែមបាន​ឡើយ ដោយ​​យោង​ទៅលើចរិកនៃព្រឹត្តិការណ៍នេះ។»

លុះមកដល់យប់ ថ្ងៃសៅរ៍ដដែល សារព័ត៌មាន New York Times បានដកស្រង់សម្ដីរបស់អ្នកនាំពាក្យ ឲ្យ​ការិយាល័យស៊ើបអង្កេតសហព័ន្ធ របស់អាមេរិក ហៅកាត់ថា FBI មករាយការណ៍ថា ក្នុងអំឡុងពេល​រុករក​នេះ គ្មានគ្រាប់បែកណាមួយ ត្រូវបានគេរកឃើញ នៅក្នុងយន្ដហោះទាំងពីរទេ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...