សម រង្ស៊ី៖ ខ្ញុំនឹងខិតខំរក្សាវប្បធម៌សន្ទនារវាងគណបក្សទាំងពីរ
- ដោយ: ប្រាថ្នា អត្ថបទ៖ប្រាថ្នា ([email protected]) - ភ្នំពេញ ថ្ងៃទី២៣ មករា ២០១៥
- កែប្រែចុងក្រោយ: January 23, 2015
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
«ទោះជាដើមទីវាមានភាពរអាក់រអួល តែខ្ញុំនឹងខិតខំឱ្យមានភាពរលូនឱ្យល្អប្រសើរ ឱ្យមានបរិយាកាសឱ្យប្រជារាស្រ្តបានសុខ» នេះជាការអះអាងរបស់លោក សម រង្ស៊ី ក្នុងពេលដែលលោក បានទៅសួរសុខទុក្ខប្រជាពលរដ្ឋជាច្រើននាក់ នៅស្រុកមេមត់ ខេត្តត្បូងឃ្មុំ ក្នុងថ្ងៃទី២៣ ខែមករានេះ។ លោកបានបញ្ជាក់ថា លោកនឹងខិតខំក្នុងការរក្សាវប្បធម៌សន្ទនា ដែលបានព្រមព្រៀងគ្នានាពេលកន្លងទៅ នៅស្រុកមេមត់ ខេត្តត្បូងឃ្មុំ នៅថ្ងៃទី២៣ ខែមករានេះ។
ការថ្លែងអះអាងរបស់ប្រធានគណបក្សសង្រ្គោះជាតិរូបនេះ ធ្វើឡើងបន្ទាប់ពីលោកនាយករដ្ឋមន្រ្តី ហ៊ុន សែន បានព្រមានកាលពីថ្ងៃទី១៩ ខែមករាកន្លងទៅ ដាក់បញ្ចប់វប្បធម៌សន្ទនា ជាមួយគណបក្សប្រឆាំង ដោយលោកនាយករដ្ឋមន្ត្រី ចោទមេដឹកនាំទាំងពីររបស់គណបក្សជំទាស់មួយនេះ ថាបានក្បត់កិច្ចសន្យាក្នុងរដ្ឋសភា ហើយតែងតែដើរវាយប្រហាររូបលោក និងគណបក្សប្រជាជនកម្ពុជាជាបន្តបន្ទាប់។
លោក សម រង្ស៊ី បានបន្តថា៖ «និយាយឱ្យចំទៅ វប្បធម៌សន្ទនាគឺសម្តេច ហ៊ុន សែន និងខ្ញុំ សម រង្ស៊ី ជាអ្នកផ្តួចផ្តើមជាមួយគ្នាហើយ ខ្ញុំមិនឱ្យបាត់ទៅវិញទេ»។ លោកបន្តថា វប្បធម៌សន្ទនានេះ គឺបញ្ឈប់ការវាយប្រហារគ្នា ហើយគិតគូជាវិជ្ជមាន ដោះស្រាយបញ្ហានៅក្នុងប្រទេស។ លោកថា បើទោះបីជាគណបក្សណាឈ្នះ ក្នុងការបោះឆ្នោតខាងមុខក៏ដោយ ខ្មែរទាំងអស់នឹងបានសុខជាមួយគ្នា។
ទាក់ទងនឹងបញ្ហានេះដែរ អ្នករាយការណ៍ពិសេស របស់អង្គការសហប្រជាជាតិស្តីពីសិទ្ធមនុស្សប្រចាំនៅកម្ពុជា លោក សុរិយា ប្រសាទ ស៊ូប៊ែឌី ក៏បានជម្រុញឱ្យគណបក្សទាំងពីរ បន្តនូវវប្បធម៌សន្ទនាគ្នានេះដែរ។ នៅថ្ងៃអង្គារទី២០ ខែមករា ក្នុងពេលដែលលោកបានជួបពិភាក្សា ជាមួយមេដឹកនាំគណបក្សសង្រ្គោះជាតិ លោក ស៊ូប៊ែឌី បានថ្លែងឡើងថា កិច្ចសន្ទនារវាងបក្សទាំងពីរ នឹងនាំមកនូវនិតិរដ្ឋ ការគោរពសិទ្ធមនុស្ស និងជាដំណើរឆ្ពោះ ទៅកាន់លទ្ធិប្រជាធិបតេយ្យក៏ពិតប្រាកដនៅកម្ពុជា។ ហើយ ការបង្កើតគណៈកម្មាធិការជាតិរៀបចំការបោះឆ្នោត តាមកាលកំណត់នោះ ក៏ត្រូវការវប្បធម៌នៃកិច្ចសន្ទនានេះផងដែរ។
ចំណែកលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានសរសេរនៅលើទំព័រហ្វេសប៊ុករបស់លោកថា វប្បធម៌ដៃគូរពិភាក្សា «ដើម្បីបញ្ចប់ភាពឧទ្ទាមយកឈ្នះរៀងខ្លួន មិនខ្វល់ពីសន្តិសុខ សន្តិភាព ដែលជាផលប្រយោជន៍ជាតិ» ប៉ុន្តែគណបក្សសង្រ្គោះជាតិតែតែធ្វើការបរិហារ មកលើគណបក្សប្រជាជនកម្ពុជា។
លោក ផៃ ស៊ីផាន បានសរសេរបន្តថា៖ «ជាក់ស្តែងនៅពេលនេះ លោកសាស្ត្រាចារ្យ សុរិយា ស៊ូប៊ែឌី ធ្វើទស្សនៈកិច្ចមកកម្ពុជា CNRP បានស្តែង និងបង្កើននូវសកម្មភាពក្តៅជាប្រព័ន្ធរួមទាំង NGOs មួយចំនួន និងប្រព័ន្ធផ្សព្វផ្សាយរបស់ RFA វាយប្រហារ រៀបចំជាប្រព័ន្ធ ដើម្បីយកលេសក្នុងកិច្ចចោទប្រកាន់ កកូរកកាយ ដើម្បីប្រជាប្រិយភាពនយោបាយឱកាសរបស់គេ ដោយឋិតនៅឆ្ងាយ និងកាតព្វកិច្ច អ្នកតែងច្បាប់ ឬសមាជិកសភា ដែលមានចែងក្នុងបទបញ្ញាតផ្ទៃក្នុង ក៏ដូចជាកិច្ចព្រមព្រៀង»។
លោកបន្ថែមថាគណបក្ស CNRP តែងតែគៀងគរ កម្លាំងបិសាចបរទេស មកយាយី ដល់ឯករាជ្យភាពខ្លួនឯង បំបាត់ការគោរពដល់សិទ្ធិសម្រេចរបស់កម្ពុជា ដែលជាឆន្ទៈរាស្រ្ត រហូតដល់បរទេសបង្គាប់ឱ្យគណបក្សនោះចូលសភា ទើបគណបក្ស CNRP អនុវត្តតាម ការលើកឡើងរបស់បរទេស។ គឺមិនបានឲ្យអាទិភាពដល់កាតព្វកិច្ច និងផលរំពឹងទុករបស់ប្រជាពលរដ្ឋខ្មែរ ដែលបានធ្វើពលិកម្មបោះឆ្នោតជូន នូវជម្រើសរបស់ពលរដ្ឋដែលគេបានជ្រើសរើសយកសមាជិក សមាជិកា ជាអ្នកតំណាងរបស់គេនៅក្នុងរដ្ឋសភា៕